-18

چۆن وادەکەیت جەستەی خۆتت خۆشبوێت بەو شێوەیەی هەیە؟

Mic
2021-07-17

زۆرێك لە خەڵک، بەتایبەتی هەرزەکاران، زۆر بیر لە رووخساری دەرەوەیان دەکەنەوە و هەست دەکەن کە کەم و کورتییان هەیە، بەڵام ئەم بیرکردنەوە لە رادەبەدەرە سەردەکێشێت بۆ متمانە بەخۆنەبوون و دواجاریش چەندین لێکەوتەی خراپی دەبێت.  

زۆر لە هەرزەکاران شێوەی خۆیان بەدڵ نییە و لەگەڵ خۆیاندا دڵخۆش نین، بەڵام هەتا جەستەی خۆیان قبوڵ نەکەن بەو جۆرەی هەیە ناتوانن هەنگاو بنێن بۆ جەستەیەکی باشتر و تەندروستتر.

پێش هەموو شتێک دەبێت ئەوە ڕوون بێت هیچ کەس پێویستی بە جەستەیەکی نموونەیی نییە تا جوان دەرکەوێت. کاتێک بەو شێوەیەی خۆیان خۆشدەوێت کە هەن، جیاواز سەیری خۆیان دەکەن و متمانە بەخۆیان زیاد دەکات.

لەگەڵ ئەوەی هەندێک خەڵک پێیان وایە هەوڵدان بۆ جەستەیەکی جوانتر ڕەنگە وات لێبکات باشتر خۆتت پێ پەسەند بێت، بەڵام بە پێچەوانەوە پێش هەموو شتێک باشترە جەستە بەو شێوەیە قبوڵ بکرێت کە هەیە، پاشان گۆڕانکاری بۆ جەستەیەکی تەندروستتر و باشتر بکرێت.

لێرە چەند خاڵیک دەخەینەڕوو بۆ هەر کەسێك کە بێمتمانەیی بۆ دروست بووە بتوانێت باشتر دەربکەوێت و لەهەمان کاتیشدا هەستی بەرامبەر جەستەی بگۆڕێت لە بێمتمانەییەوە بۆ متمانە بەخۆبوون.

1- جەستەت قبوڵ بکە

کەس نمونەیی نییە.

هەموو کەسێک دەیەوێت وەک خۆی پەسەند بکرێت و جوان ببینرێت، ئەمە بۆ هەموو کەسێک و هەموو جەستەیەک ڕاستە.

جەستەت ببینە بەو شێوەیەی هەیە، کەمتر ڕەخنەی لێ بگرە و بە چاوێکی هاوڕێیانە تێیبڕوانە.

شەرم لە جەستەی خۆت مەکە

قسەکردنی نەرێنی لەسەر جەستەت، باوەڕ بەخۆبوونت کەم دەکاتەوە. ئیتر ئەم قسەکردنە دەکرێت بە دەنگی بەرز بێت یاخود تەنها بیرکردنەوە بێت لێی، بۆیە میهرەبان بە و  رێزی جەستەی خۆت بگرە.

خووی باشتر دروست بکە

بۆ چاککردنی خووی خۆبەکەم زانین باشترە خوویەکی دیکەی باشتر بکەیتە جێگەی، بۆ نموونە: لەجیاتی ئەوەی بەخراپی باسی خۆت بکەیت بیر لە جوانی و باشییەکانی خۆت بکەرەوە.

2- جەستەت خۆشبوێت

ئەو شتانەی بەدڵتن لە خۆتدا

 لەوانەیە تۆ قژی خۆتت لا جوان بێت، یان چاوت و پێکەنینەکەت. بیر لەمانە بکەرەوە و پرسیاری هۆکاری جوان بینینت بۆ ئەمانە لەخۆت بکە.

سەرنج بخەرە سەر تواناکانی جەستەت

 جەستەت لە تەنها شکڵ و شێوە زۆر زیاترە. جەستەت دەتوانێت ڕابکات، سەربکەوێت، شت دروست بکات و وەرزش بکات، بۆیە بەها و نرخی جەستەت بزانە.

داواکاریەکانی جەستەت چین

ڕۆژانە جەستەت پشتگوێ مەخە. فێربە هێواشتر و ئارامتر هەناسە بدەیت کاتێک دەجوڵێیت، خواردنی باش بخۆ و پشوو بدە.

3- ئاگاداری جەستەت بە

خواردنی تەندروست بخۆ

بزانە چ خواردنێک بۆ جەستەت باشە و بڕی پێویست چەندە کە پێویستی پێیەتی.

بەپەلە نان مەخۆ و چێژی لێ ببینە چونکە کاتێک بەشێوەیەکی تەندروست مامەڵە لەگەل جەستەت دەکەیت، دەربارەی خۆت هەست بە باشی دەکەیت.

بزانە چەند خەوت پێویستە لەتەمەنێکی دیاریکراودا. لە کاتی خۆیدا بخەوە و پێش خەو مۆبایل بەکارمەهێنە.

هەموو ڕۆژێک چالاک بە

جەستەت پێویستی بە جوڵەیە بۆ ئەوەی بەهێز و تەندروست بێت. دەتوانیت وەرزش، یۆگا و مەلە بکەیت بۆ ئەوەی بە جەستەت بە چالاکی بهێڵیتەوە.

پارێزگاری لە کێشێکی تەندروست بکە.

هەبوونی کێشێکی تەندروستی شتێکی باشە و یارمەتیت دەدات لەگەڵ خۆتدا ئاسودەتر بیت.

More News

Most Popular

هەواڵ

لیای 10 ساڵ، ئەو کیژۆڵەی دووجار بەخاکسپێردرا

Mic
2022-05-23

کیژۆڵەیەکی 10 ساڵان، تەنها لە هەفتەیەکدا دووجار بەخاکسپێردرا، ئەوەش بەهۆی ئەوەی گومان لەدۆسییە کوشتنەکەیدا هەبوو، بەڵام دواجار دادگا دۆسییەکەی یەکلاییکردەوە.

باوكی لیا كە چەند رۆژێك لەمەوبەر گیانی لەدەستدا دەڵێت پزیشكی دادوەری پشتڕاستیكردوەتەوە كە كچەكەی بەهۆی پەلاماردانی سەگەوە گیانی لەدەستداوە، وتەبێژی پۆلیسی سلێمانیش دەڵێت لێكۆڵینەوە لەگەڵ بنەماڵەی منداڵەكە و خاوەنی سەگەكانیش كراوە.

عەلی ڕەحیم، باوكی لیای تەمەن 10 ساڵ، ئەو كچەی ھەفتەی رابردوو لە گەڕەكی ڕاپەڕینی شاری سلێمانی سەگ پەلاماری دا و گیانی لەدەست دا بە مایكی ڕاگەیاند: تەرمی كچەكەم لە پەیمانگەی پزیشكی دادی سلیمانی وەرگرتەوە و جارێكی دیكە بە خاكمان سپاردەوە".

وتیشی: "بەپێی ڕاپۆرتی پەیمانگەی پزیشكی دادی سلێمانی، دەركەوتووە كچەكەم بەھۆی پەلاماردانی سەگەوە گیانی لەدەست داوە و خواردوویەتی، بۆیە سبەی بنەماڵەكەمان لەسەر ئەو ھەموو تۆمەتانەی ئاڕاستەمان كراوە، لە كۆنگرەیەكی رۆژنامەوانیدا ھەڵوێستمان دەبێت".

باوكی لیای تەمەن 10 ساڵ، وتیشی: "ئەو سێ سەگەی كچەكەمیان خواردووە، كوژراون، بەڵام من سەگەكانم نەكوشتووە".

لەوبارەیەوە سەركەوتن ئەحمەد وتەبێژی پۆلیسی سلێمانی بەمایكی وت:"لەسەر دۆسیەی لیا لێكۆڵینەوە لەگەڵ بنەماڵەی لیا و ئەو بنەماڵەیەش كە سەگەكانیان هەیە كراوە".
وتیشی :"لەسەر دۆسیەكە لێكۆڵینەوەی تەواو كراوە و ئەوەی هەیە پەیوەندی بەدادوەری گشتیەوە هەیە".
هاوكات بەرزان محەمەد بەڕێوەبەری پزیشكی دادی سلێمانی بەمایكی راگەیاند: سەرجەم ئەو پرسیارانەی سەبارەت بە مردنی لیا لەپزیشكی دادوەری لەلایەن داواكاری گشتیەوە كراون وەڵاممان داونەتەوە".
پێشتریش هەر سەبارەت بەو پرسە، گوڵستان سەعید ئەندامی لیژنەی مافی مرۆڤی پەرلەمانی كوردستان بەمایكی وت:"سەبارەت بەو پرسە قسەمان لەگەڵ دەستەی مافی مرۆڤ كردووە، ئەوان پێیان وتین لەسەر دۆسیەكە لێكۆڵینەوەیان كردووە، بەڵام وەكو پەرلەمان ناتوانین دەستێوەردان لەكاروباری داواكاری گشتی بكەین".
بەڕێوەبەرایەتیی پۆلیسی سلێمانی لە روونكردنەوەیەكدا كە رۆژی هەینی رابردوو بڵاویكردەوە، رایگەیاند: بە بڕیاری دادوەر و بە ئامادەبوونی مەفرەزەكانی بنكەی پۆلیسی راپەڕین، تیمەكانی بەشی بەڵگەی تاوان و پزیشكانی دادوەری، تەرمی لیا لەناو گۆڕەكەی دەرهێنراوەتەوە و توێكاری بۆ لاشەكەی دەكرێت و لێكۆڵینەوەش لە رووداوەكە بەردەوام دەبێت".
16 یی ئەم مانگە هەواڵی گیانلەدەستدانی كچێكی 10 ساڵ لە سلێمانی بەهۆی پەلاماردانی سەگ بڵاوبویەوە، هەواڵەكە و پاشانیش لێدوانی باوكی منداڵەكە كاردانەوەی بەدوای خۆیدا هێنا بەتایبەتیش لەتۆڕە كۆمەڵایەتیەكان، بەوهۆیەشەوە لەسەر فەرمانی داواكاری گشتی گۆڕەكەی لیا هەڵدرایەوە.