هەواڵ

بەهۆی تیرۆری چالاكوانێكی كورد، ئەمریكا سزا بەسەر ڕێكخراوێكی نزیك لەتوركیا دەسەپێنێت

Mic
2021-07-29

ویلایەتە یەكگرتووەكانی ئەمریكا بەهۆی تیرۆركردنی ژنە چالاكوانێكی كورد، سزا بەسەر ڕێكخراوێكی چەكداری سوری دا دەسەپێنێت، نوسینگەی مافی مرۆڤی سەر بە نەتەوەیەكگرتوەكانیش دەڵێت كوشتنی هەڤرین خەلەف تاوانی جەنگە.

"ئەحرار ئەلشەرقییە" ناوی ئەو ڕێكخراوە توندڕەوەیە كە ئەمریكا بەهۆی تیرۆركردنی هەڤرین خەلەف ژنە چالاكوان و سیاسی كورد سزای بەسەردا سەپاندوون، سزاكان  دوو كەسایەتیش دەگرێتەوە كە تۆمەتبارن بە هاوكاریكردنی ئەو توندڕەوانە، یەكێك لەو كەسانە ئێستا لە توركیا نیشتەجێیە، پێنج بەرپرسی ئۆپۆزسیۆنی سوریاش لە كوژرانی ئەو كچە كوردە تێوەگلاون بەڵام هەر پێنجیان لە زیندانەكانی حكومەتی سوریادان.

تیرۆركردنی هەڤرین خەلەف لەلایەن ڕێكخراوی ئەحرار ئەلشەرقییە بەر لە دوو ساڵ بوو، كاتێك سوپای توركیا هێرشیكردە سەر ناوچە سنوریەكانی باكوور و ڕۆژئاوای كوردستان و بەشێك لەو ناوچانەی داگیركرد.

بەوتەی شایەتحاڵەكان چەكدارانی ئەو ڕێكخراوە توندڕەوە، لەسەر ڕێگەی هەڤرین بازگەیان داناوە و پاش ئەوەی ئەو كچە چالاكوانەیان ناچار كردووە لە ئۆتۆمبێلەكەی داببەزێت، پاش لێدانێكی زۆر و ئەشكەنجەدانی بە فیشەك كوشتوویانە.

لەوبارەیەوە نوسینگەی مافی مرۆڤی نەتەوەیەكگرتووەكان، تیرۆركردنی هەڤرینی 35 ساڵ بە تاوانی جەنگ لەقەڵەم دەدات.

ئەو ڕێكخراوی تاوانبار كراوە بە تیرۆركردنی هەڤرین خەلەف تا ئەو كاتەی توركیا لە تشرینی یەكەمی 2019 هێرشیكردەسەر ناوچە كوردیەكانی ڕۆژئاوای كوردستان ناوبانگی نەبوو، ئەمریكا ئەو ڕێكخراوە بەوەش تۆمەتبار دەكات كە لەنزیك شاری حەلەب سەدان كەسی كوشتووە.

بەوتەی بەرپرسانی ئەمریكا، ئەو ڕێكخراوە لە ساڵی 2018ەوە تۆمەتبارە بە كوشتن و ئەشكەنجەدانی هەزاران كەس، بۆیە بە هەموو شێوەیەك مامەڵەكردن لەگەڵ ڕێكخراوەكە قەدەغەكراوە.

چاودێران پێیان وایە پەیوەندیەكانی نێوان ئەمریكا و توركیا كە ئەندامی ناتۆن، ئێستا قورسیی تێكەوتووە، لەكاتێكدا ئیدارەی ترەمپ ڕێگری لەتوركیا نەكرد لەشكركێشی بۆ باكووری سوریا بكات، بەڵام ئیدارەی جۆ بایدن لە زۆر دۆسیەدا پشتی كردووەتە توركیا بەتایبەت لە دۆسیەی سوریا و قوبرس، بەڵام لەهەمانكاتدا لەسەر مانەوەی هێزەكانی توركیا لە ئەفغانستان پشتیوانی توركیای كرد.


More News

Most Popular

هەواڵ

هێزيکی ئاسایش وێنەگری دیجیتاڵ میدیایی 'مایک'یان دەستبەسەرکرد

Mic
2024-03-25

سلێمانی ـ MIC

لەکاتی ڕووماڵی خۆپیشاندانی مامۆستایان و فەرمانبەرانی ناڕازیی ئەمڕۆ دووشەممە، هێزێکی ئاسایشی سلێمانی، گریڤان فەرمان یان بۆ ماوەیەک دەستبەسەرکرد و دەستیان بەسەر کەلوپەلە رۆننامەوانیەکدا گرت.

گریڤان فەرمان بە دیجیتاڵمیدیای MIC وت”هێزەکەی ئاسایش سەرجەم ئەو وێنە و دیمەنانەی خۆپیشاندانەکە، کە تۆمارم کردبوون سڕییانەوە و رێگەشیان نەدا رووماڵەکە بکەین.”

وتیشی” پاش سڕینەوەی دیمەنەکان ناچاریان کردین شوێنی خۆپیشاندانە جێبهێڵین.”
مامۆستایان و فەرمانبەرانی ناڕازی ئەمڕۆ لەدژی نەدانی مووچەکانیان و پرۆژەی هەژماری من، خۆپیشاندانیان ئەنجامدا و هەوڵیاندا بچنە دەباشان وچاویان بە بافڵ تاڵەبانی سەرۆکی یەکێتی بکەوێت، بەڵام لەلایەن هێزە ئەمنییەکانەوە رێگری کرا لە خۆپیشاندانەکە.

هەروەها رێگری کرا لە چەند کەناڵێکی میدیایی کە رووماڵی خۆپیشاندانەکە بکەن.