هەواڵ

سوپای عێراق ڕزگاربووانی جینۆساید لە شنگال دەکاتە ئامانج

ماوەی دوو ڕۆژە سوپای عێراق بە بیانوی دەرکردنی پەکەکە لە شنگال، ئۆپەراسیۆنێکی سەربازی دەستپێکردووە کە هاوکاتە لەگەڵ هێرشەکانی سوپای تورکیا بۆسەر چەند ناوچەیەکی هەرێمی کوردستان.

نادین ماینزا، كۆمسیاری ئەمریكا بۆ ئازادییە ئاینییەكان لەجیهاندا رایگەیاند هێرشەکەی سوپای عێراق لەدژی ئەو خەڵکەیە کە لەسەر دەستی داعش ڕووبەڕووی جینۆسایدکردن بوونەتەوە.

لە تویتێکدا، نادین ماینزا رایگەیاند "سوپای عێراق هێرشدەکاتە سەر یەبەشە لە شنگال کە ئێزیدین و رزگاربووی جینۆسایدن و ئەوان تەنیا دەیانەوێت پارێزگاری لە خەڵکەکەی خۆیان بکەن."

كۆمسیاری ئەمریكا بۆ ئازادییە ئاینییەكان لەجیهاندا دەشڵێت، یەبەشە بریتینیە لە پەکەکە و ئەوان هەڕەشە نین بۆ تورکیا و عێراق، کەچی دووبارە ئێزیدییەکان ئاوارە دەبنەوە.

بە وتەی پیر دەیان پیر جەعفەر، بەڕێوەبەری کۆچ و کۆچبەران و رووبەڕووبوونەوەی قەیرانەکان لە پارێزگای دهۆک، بەهۆی هێرشەکەی سوپای عێراق تاوەکو ئێستا 701 خێزان ئاوارەی پارێزگای دهۆک بوون کە ژمارەی ئەندامانی ئەو خێزانانە چوار هەزار و 83 کەسن.

ئەوەش لەکاتێکدایە، سێ رۆژ دوای سەردانەکەی مەسرور بارزانی سەرۆکی حکومەتی هەرێم بۆ تورکیا، شەوی 17ی ئەم مانگە سوپای تورکیا دەستپێکردنی ئۆپەراسیۆنێکی سەربازی راگەیاند و تاوەکو ئێستا بەردەوامە.

تەندروستی

بەکارهێنانی مەیکەپی دژە ئاو مەترسیدارە؟

توێژینەوەیەک کە لە گۆڤاری زانستی ژینگە و تەکنۆلۆژیادا بڵاو کراوەتەوە ئاماژەی بەوە داوە، بەشێک لە بابەتی جوانکارییەکان کە ئەمڕۆ بەکار دێت، ڕێژەیەکی زۆر لە ماددە کیمیایییە ژەهراوییەکان لە پێکهاتەیاندا هەیە وەک پۆڵی فلۆرۆ ئەڵکیل (PFAS ) . کە بەداخەوە لە پێکهاتەی ماددە جوانکارییەکاندا ئەم ماددە نانووسرێت بۆ ئەوەی خەڵک هۆشیار بێت.

ئیدارەی خۆراک و دەرمانی ئەمریکی (FDA) باس لەوە دەکات، بەشێک لە بابەتە جوانکارییەکانی وەکوو بۆیەی نینۆک و کرێمەکان و سوراو و قەڵەم چاو و ماسکەرا، دەکرێت ئەم ماددانەی تێ بکرێت بۆ ئەوەی زۆرتر بە درەوشاوەیی دەربکەوێت. بۆیە زۆر گرنگە ئەو بابەتە جوانکارییانە بەکار دێت کە دڵنیان لەوەی ئۆریجیناڵە و کوالێتی بەرزە.