هەواڵ

کرملین: پوتن داوای لێبوردنی لە سەرۆکوەزیرانی ئیسرائیل نەکردووە

سەرۆکایەتی رووسیا رەتیکردەوە ڤلادیمیر پوتن لە پەیوەندییەکەی تەلەفونیدا داوای لێبوردنی لە ئیسرائیل کردبێت لەسەر لێدوانێکی وەزیری درەوەی رووسیا سێرگی لاڤرۆڤ، کە وتبووی هیتلەر خوێنی جولەکەی تێدابوو.

پێشتر سەرۆکوەزیرانی ئیسرائیل رایگەیاند پوتن لە پەیوەندییەکی تەلەفونیدا داوای لێبووردنی کردووە ئەویش بەهۆی لێدوانی وەزیری دەرەوەی ئەو وڵاتە کە وتبووی ئەدۆلف هیتلەر جولەکەیە و خوێنی جولەکەی تێدابووە.

بەڵام کۆشکی سەرۆکایەتی رووسیا کرملین راگەیەندراوێکی بڵاوکردەوە لەبارەی پەیوەندی تەلەفونی نێوان سەرۆکوەزیرانی ئیسرائیل نافتالی بێنێت و سەرۆکی رووسیا ڤلادیمیر پوتن، بەڵام هیچ ئاماژەیەکی بە داوای لێبووردنی پوتن نەداوە.

وتەبێژی کرملن دمیرتی پێسکۆڤ ناوەڕۆکی گفتوگۆی نێوان پوتن و بێنێت-ی پشتڕاستکردەوە و ڕایگەیاند گفتوگۆکانی هەردوولا "بەتەواوەتی لەسەر ئەوەبووە کە ئاماژەی پێدراوە."

ئەوەش لەکاتێکدایە لێدوانێکی سێرگی لاڤرۆڤ وەزیری دەرەوەی روسیا سەبارەت بە خوێنی ھیتلەر، پەیوەندییەکانی نێوان روسیاو و ئیسرائیل-ی خراپ کردووە و ئیسرائیل دەڵێت ئەوە ھەڵەیەکە لێخۆشبوونی نییە و مۆسکۆ دەیەوێت بەو لێدوانانە ماف بە کردەوە دڕندانەکانی رووسیا لە ئۆکراین بدات.

لاڤرۆڤ لە لێدوانێکدا ڕایگەیاند "جولەکە بوونی سەرۆکی ئۆکراین ئەو راستییە ناشارێتەوە کە کەسانی نازی لەناو حکومەتەکەیدا ھەن، ئەگەر بە بیرم بێت و ھەڵە نەبم، ھیتلەریش ھەڵگری خوێنی جولەکەکان بووە، بۆیە ئەوە ھیچ مانایەکی نییە، بۆیە پێموایە بەشێک لە ژدە جولەکەکان ھەر جولەکە بوون.".

یائیر لاپید، وەزیری دەرەوەی ئیسرائیل بە توندی ئیدانەی لێدوانەکەی "لاڤرۆڤ" دەکات سەبارەت بەوەی ئەدۆلف ھیتلەر سەرۆکی نازییەکان بنەچەی جولەکەی ھەبوبێت و رایانگەیاند، ئەو لێدوانە ھەڵەیەکی گەورەی مێژووییە و لێخۆشبوونی نییە.

ھەر لەسەر توڕەیی ئیسرائیل لەسەر ئەو لێدوانە، وەزارەتی دەرەوەی ئیسرائیل باڵیۆزی روسیای بانگردووە و داوای لێکردووە پۆزش بھێننەوە.

هەواڵ

ئەنجوومەنی دەوڵەت وەڵامی ئەنجوومەنی وەزیرانی عێراق دەداتەوە

کۆبوونەوەی ئەنجوومەنی دەوڵەت لەبارەی داهاتی نانەوتیی هەرێمی کوردستان کۆتایی هات و چاوەڕوان دەکرێت ئەمڕۆ وەڵامی ئەنجومەنی وەزیرانی عێراق بداتەوە.

بەگوێرەی زانیارییەکان لە کۆبوونەوەکەدا شاندێکی هەرێمی کوردستان بەشداربوون، کۆبوونەوەکە بە هەنگاوێکی گرنگ بۆ چارەسەری گرفتی مووچەی هەرێمی کوردستان دادەنرێت.

ئەنجوومەنەکە ئەمڕۆ چوارەم کۆبوونەوەی لەسەر پرسی داهاتی ناوخۆی هەرێمی کوردستان ئەنجامدا و، تێیدا تاوتوێی پرسی داهاتی نانەوتیی هەرێم، کە یەکێکە لە خاڵە ناکۆکانی نێوان حکومەتی هەرێم و عێراق.

هەر بەگوێرەی زانیارییەکان؛ پێشبینیدەکرێت ئەمڕۆ ئەنجوومەنی دەوڵەت ئەنجامی کۆبوونەوەکە بە راپۆرتێک بۆ ئەنجوومەنی وەزیرانی عێراق بەرزبکاتەوە.

رای ئەنجوومەنەکە لە بارەی کێشەی هەولێر و بەغدا لەسەر داهاتی ناوخۆ بە یەکلاکەرەوە ناو دەبرێت و بۆ چارەسەری پرسی داهاتیی ناوخۆی هەرێمی کوردستان لەنێوان هەولێر و بەغدا.

لە کاتێکدا ژمارەیەک لە چاودێران پێیان وایە، ئەو ئەرکەی بە ئەنجوومەنی دەوڵەت سپێردراوە؛ کاری ئەو نییە و ناتوانێت چارەسەر بۆ کێشەکە بدۆزێتەوە، بەڵکو دەبێت کێشەی داهاتی ناوخۆی هەرێم، دادگای باڵای فیدراڵی بڕیاری لەبارەوە بدات.