رۆژنامەنوسێکی دیاری جەزیرە بە تەقەی هێزەکانی ئیسرائیل کوژرا

کەناڵی جەزیرەی قەتەری رایگەیاند شیرین ئەبو عاقلە، کە پەیامنێرێکی دیاری میدیاکەیە، لە کەمپی جنین لە کەرتی رۆژئاوا بە تەقەی هێزەکانی ئیسرائیل لێیدراوە و دواتر گیانی لەدەستداوە.

ئەبو عاقلە لەگەڵ تیمە رۆژنامەوانییەکەیدا سەرقاڵی رووماڵی هێرشەکانی ئیسرائیل بووە لە شاری جنین کاتێک گوللـەیەکی بەردەکەوێت و بەپەلە دەبرێت بۆ یەکێک لە نەخۆشخانەکانی فەلەستین.

دواتر وەزارەتی تەندروستی فەلەستین گیانلەدەستدانی پەیامنێرەکەی کەناڵی جەزیرە شیرین ئەبو عاقلەی ڕاگەیاند بەهۆی سەختی برینەکەیەوە.

وەزارەتی تەندروستی دەڵێت رۆژنامەوانێکی دیکەی فەلەستینیش کە کاری بۆ رۆژنامەی قودس کردووە، بە فیشەک پێکراوە و گوللـە بەر پشتی کەوتووە، بەڵام ڕەوشی تەندروستی ئەو جێگیرە.

میدیاکارێکی جەزیرە کە لەگەڵ ئەبو عاقلە بووە دەڵێت، فیشەک بەر سەری ئەبو عاقلە کەوتوە لەکاتێکدا کە سەرقاڵی رووماڵکردنی رووداوەکانی شاری جنین بووە.

ئەبو عاقلە وەک رۆژنامەنوس لە ساڵی 2000 دەستی بە کارکردن کردووە بۆ کەناڵی جەزیرەی قەتەری و بەردەوام کاری رۆژنامەوانی لەبارەی گرژییەکانی نێوان ئیسرائیل و فەلەستین ئەنجامداوە.

لە تویتەر باڵیۆزی فەلەستین بۆ بەریتانیا نوسیویەتی، "هێزە داگیرکەرەکانی ئیسرائیل رۆژنامەنوسی خۆشەویستمان ئەبو عاقلەیان تیرۆر کرد لەکاتێکدا کە ئەمڕۆ رووماڵی کارە دڕندانەکانی ئەوانی دەکرد لە جنین."

هەواڵ

لیای 10 ساڵ، ئەو کیژۆڵەی دووجار بەخاکسپێردرا

کیژۆڵەیەکی 10 ساڵان، تەنها لە هەفتەیەکدا دووجار بەخاکسپێردرا، ئەوەش بەهۆی ئەوەی گومان لەدۆسییە کوشتنەکەیدا هەبوو، بەڵام دواجار دادگا دۆسییەکەی یەکلاییکردەوە.

باوكی لیا كە چەند رۆژێك لەمەوبەر گیانی لەدەستدا دەڵێت پزیشكی دادوەری پشتڕاستیكردوەتەوە كە كچەكەی بەهۆی پەلاماردانی سەگەوە گیانی لەدەستداوە، وتەبێژی پۆلیسی سلێمانیش دەڵێت لێكۆڵینەوە لەگەڵ بنەماڵەی منداڵەكە و خاوەنی سەگەكانیش كراوە.

عەلی ڕەحیم، باوكی لیای تەمەن 10 ساڵ، ئەو كچەی ھەفتەی رابردوو لە گەڕەكی ڕاپەڕینی شاری سلێمانی سەگ پەلاماری دا و گیانی لەدەست دا بە مایكی ڕاگەیاند: تەرمی كچەكەم لە پەیمانگەی پزیشكی دادی سلیمانی وەرگرتەوە و جارێكی دیكە بە خاكمان سپاردەوە".

وتیشی: "بەپێی ڕاپۆرتی پەیمانگەی پزیشكی دادی سلێمانی، دەركەوتووە كچەكەم بەھۆی پەلاماردانی سەگەوە گیانی لەدەست داوە و خواردوویەتی، بۆیە سبەی بنەماڵەكەمان لەسەر ئەو ھەموو تۆمەتانەی ئاڕاستەمان كراوە، لە كۆنگرەیەكی رۆژنامەوانیدا ھەڵوێستمان دەبێت".

باوكی لیای تەمەن 10 ساڵ، وتیشی: "ئەو سێ سەگەی كچەكەمیان خواردووە، كوژراون، بەڵام من سەگەكانم نەكوشتووە".

لەوبارەیەوە سەركەوتن ئەحمەد وتەبێژی پۆلیسی سلێمانی بەمایكی وت:"لەسەر دۆسیەی لیا لێكۆڵینەوە لەگەڵ بنەماڵەی لیا و ئەو بنەماڵەیەش كە سەگەكانیان هەیە كراوە".
وتیشی :"لەسەر دۆسیەكە لێكۆڵینەوەی تەواو كراوە و ئەوەی هەیە پەیوەندی بەدادوەری گشتیەوە هەیە".
هاوكات بەرزان محەمەد بەڕێوەبەری پزیشكی دادی سلێمانی بەمایكی راگەیاند: سەرجەم ئەو پرسیارانەی سەبارەت بە مردنی لیا لەپزیشكی دادوەری لەلایەن داواكاری گشتیەوە كراون وەڵاممان داونەتەوە".
پێشتریش هەر سەبارەت بەو پرسە، گوڵستان سەعید ئەندامی لیژنەی مافی مرۆڤی پەرلەمانی كوردستان بەمایكی وت:"سەبارەت بەو پرسە قسەمان لەگەڵ دەستەی مافی مرۆڤ كردووە، ئەوان پێیان وتین لەسەر دۆسیەكە لێكۆڵینەوەیان كردووە، بەڵام وەكو پەرلەمان ناتوانین دەستێوەردان لەكاروباری داواكاری گشتی بكەین".
بەڕێوەبەرایەتیی پۆلیسی سلێمانی لە روونكردنەوەیەكدا كە رۆژی هەینی رابردوو بڵاویكردەوە، رایگەیاند: بە بڕیاری دادوەر و بە ئامادەبوونی مەفرەزەكانی بنكەی پۆلیسی راپەڕین، تیمەكانی بەشی بەڵگەی تاوان و پزیشكانی دادوەری، تەرمی لیا لەناو گۆڕەكەی دەرهێنراوەتەوە و توێكاری بۆ لاشەكەی دەكرێت و لێكۆڵینەوەش لە رووداوەكە بەردەوام دەبێت".
16 یی ئەم مانگە هەواڵی گیانلەدەستدانی كچێكی 10 ساڵ لە سلێمانی بەهۆی پەلاماردانی سەگ بڵاوبویەوە، هەواڵەكە و پاشانیش لێدوانی باوكی منداڵەكە كاردانەوەی بەدوای خۆیدا هێنا بەتایبەتیش لەتۆڕە كۆمەڵایەتیەكان، بەوهۆیەشەوە لەسەر فەرمانی داواكاری گشتی گۆڕەكەی لیا هەڵدرایەوە.