هەواڵ

لەدهۆك و هەولێر بەنزینی 800 دیناری دابەش دەكرێت، سلێمانیش چاوەڕێیە

دوای ئەوەی دوێنێ وەزارەتی سامانە سروشتیەكانی حكومەتی هەرێم رایگەیاند بەنزینی 800 دیناری دەدرێتە هەولێر و دهۆك، جگە لەوەی بەنزینی 690 دیناری دابەش دەكرێت، بەڵام لەسلێمانی هیچ یەكێك لەو جۆرە بەنزینانە دابەش ناكرێت، وتەبێژی بەنزینخانەكانی سلێمانیش دەڵێت هەوڵەكان بەردەوامن.

دوێنێ نەبەز عەبدولحەمید، قایمقامی هەولێر رایگەیاند: بڕیاری دابینكردنی بڕێكی زۆری بەنزین دراوە و لە رۆژی پێنجشەممەوە جگە لە دابەشكردنی بەنزین لە 14 بەنزینخانە بە نرخی 690 دینار، لە 17 بەنزینخانەی دیكەش دەست بەدابەشكردنی بەنزین دەكرێت بە نرخی 800 دینار، چوار  بەنزینخانەی دیكەش لە ناو سەنتەری شاری هەولێر بۆ پێدانی بەنزین بە تەكسییەكان زیاد دەكرێت.

بەهمەن قادر وتەبێژی بەنزینخانەكانی سلێمانی بەمایكی وت:"لەهەوڵی بەردەوام دابین بەنزین بەزوترین كات بۆ سلێمانی دابین بكەین هاوشێوەی هەولێر و دهۆك تا نرخی بەنزین داببەزێت".

هاوكات عەلی حەمەساڵح، سەرۆكی لیژنەی سامانە سرووشتییەكانی پەرلەمانی كوردستان بەمایكی وت: "بڕی 3 ملیۆن لیتر بەنزین بە نرخی 800 دینار بۆ هەولێر و دهۆك تەرخانكراوە و پشكی سلێمانی تێدا نییە، هەوڵدەدەین   بەنزین بۆ سلێمانی لە سلێمانییەوە بەرهەم بێت".

 عەلی حەمەساڵح وتیشی:"چارەسەر ئەوەیە بەنزین لەناوخۆی سلێمانی بەرهەم بهێندرێت چونكە لەهەر شوێنێك بەنزین بهێندرێت كاریگەری لەسەر نرخەكەی نابێت، هەرچەندە حكومەتی هەرێم بەڵێنیداوە  پاڵپشتی نرخی بەنزین بكات".

وەك سەرۆكی لیژنەی سامانە سروشتیەكانی پەرلەمانی كوردستان دەڵێت:"بۆ سلێمانیش لەهەوڵی بەردەوامداین بەنزین دابین بكەین، شەوی رابردوو لەگەڵ وەزیری سامانە سروشتیەكان قسەم كرد دیسان بەڵێنیداوە هاوكاربێت لەدابینكردنی بەنزین بۆ سلێمانی".

دوێنێ  وەزارەتی سامانە سرووشتییەكانی هەرێمی كوردستان لەبارەی گرانبوونی نرخی بەنزین و رێگەگرتن لە گرانبوونی زیاتری، راگەیەندراوێكی بڵاوكردەوە و تێیدا هاتبوو: "حكومەتی هەرێمی كوردستان پاڵپشتیی دارایی بۆ چارەسەركردنی ئەم كێشەیە دەكات و بەشێكی زۆری رسومات و باجەكان لەسەر هاوردەكردنی بەنزین هەڵدەگرێت و كارئاسانی پێشكەش بە هەموو كۆمپانیاكان دەكات بۆ  هێنانی بەنزین بەمەرجێك كاریگەریی  لەسەر كوالێتیی بەنزین و تەندروستیی هاووڵاتییان نەبێت و لەگەڵ رێنماییەكانی پاراستنی ژینگەدا بگونجێت، هاووڵاتییانیش دڵنیا دەكەینەوە لەماوەیەكی كورتدا كۆنترۆڵی نرخەكان دەكەین".

حكومەتی عێراق پێشتر رۆژانە یەك ملیۆن و 69 هەزار لیتر بەنزینی بۆ هەرێمی كوردستان دەنارد، كە بە 690 دینار دەدرایە شۆفێران، بەڵام ئێستا ئەركەكە دراوەتە كۆمپانیا حزبیەكانی پارتی و یەكێتی ئەوانیش بەشی سلێمانی نادەن بەهۆی ئەوەی گرێبەستیان هەیە لەگەڵ حكومەتی عێراق و تەنها بەنزین دەدەنە حكومەتی عێراق.

بەپێی زانیاریەكانی مایك هەوڵەكان بۆ ئەوەیە بەنزین لەچەند بەنزینخانەیەكی سنووری پارێزگای سلێمانییەوە دابین بكرێت،لەلایەكی دیكەوە نەوەی نوێ هەفتەیەكە لەسلێمانی و چەند شار و شارۆچكەیەك بەردەوامە لەدابەشكردنی بەنزینی 650 دیناری.

هەواڵ

دروزەکان نزیکن لەوەی کۆمەڵکوژ بکرێن

دوو رۆژە هێرشی سوپای سوریا بۆسەر دروزەکان دەستیپێکردووە، ئەمڕۆ ڤیدیۆی بە کۆمەڵکوشتنیان و دەستبردنی بۆ پیرۆزییەکانیان"سمێڵ تاشین" تۆڕەکۆمەڵایەتییەکانی تەنی، بۆ پاراستنی خۆیان و شوناسیان بە هەموو توانایانەوە رووبەڕووی سوپای سوریا بوونەتەوە.

دروزەکان کۆمەڵگەیەکی رەسەن و خاوەن بیروباوەڕێکی تایبەت بە خۆیانن و مەڵبەندی نیشتەجێبونیان پارێزگای سوەیدای سوریا و دەوروبەریەتی، دابونەریت و کلتورەکەیان، هەروەها شێوازی جلوبەرگ و سمێڵ و ریشیان، لە خەڵکی سوریایان جیادەکاتەوە.

لەساڵانی رابردوودا لەگەڵ ئەوەی پێکهاەیەکی رەسەنی سوریان، کەچی کەمتر لە ئاستی ناوچەکە و نێودەوڵەتی ناسراوبوون، بەڵام لەگەڵ کەوتنی دەسەڵاتی بەشار ئەسەددا، پرسی دروزەکان بوو بە باسی میدیاکان، بەتایبەت کاتێک دەسەڵاتی ئەحمەد شەرعیان رەتکردەوە و رووبەڕوی چەکدارەکانی بوونەوە.

دروزەکان تائێستا توانیویانە پارێزگاری لە دەسەڵاتی خۆبەڕێوەبەری خۆیان بکەن لە سوریان دوای ئەسەد، ئەوان پێێان وایە ئەحمەد شەرع هیچ گۆڕانێک لە بیروبۆچونیدا رووینەداوە بەرامبەریان، بۆیە بە هەموو توانایانەوە پارێزگاری پێگە و دەسەڵاتی خۆیان دەکەن.

ئیسرائئیل لەدوای کەوتنی بەشار ئەسەد و هێرشەی گروپەکانی سەر بە ئەحمەد شەرع بۆسەر دروزەکان، پشتیواننی خۆی بۆ دروزەکان راگەیاند، ئەمڕۆیش، ئەمیچای چیکلی، وەزیری ڕاگەیاندن و کاروباری رەوەندی جوی ئیسرائیل رایگەیاند،  نابێت لە بەرانبەر تیرۆری ئیسلامی-نازیی ڕژێمی قاعیدەدا بێدەنگ بین یان بێ هەڵوێست بین و داوای لەناوبردنی ئەحمەد شەرعی کرد.

ئەم سوکایەتى و بێڕێزیانەى چەکدارانى شەرع دەیکەن، بەتاڵکردنەوەى هەموو ئەو بەڵێن و دروشمانەیە کە ئەحمەد شەرع بۆ سوریاى نوێى هۆنیوەتەوە، پێشمان دەڵێت کردەوەی چەکدارەکانی لەسەر زەوی، وێنەیەکی جیاواز نیشان دەدات و ئایندەیەکی نادیار بۆ پێکەوەژیانی ئایینی و نەتەوەیی لە سووریای نوێدا دەخاتەڕوو

لە ئێستادا دروزەکان شەڕی مان و نەمان دەکەن و بەتەواوی پڕچەکن و وەک هێزێک رووبەڕووی سوپاکەی ئەحمەد شەرع وەستاونەتەوە، سوپاکەی شەرعیش دەیەوێت بە هەر نرخێک بێت ناوچەکانی درۆزەکان کۆنترۆڵ بکات و بۆ گەیشتن بەو ئامانجە دەست ناپارێزێت.