وەزیری دارایی عێراق: ئەگەر هەرێم لەگەڵ بەغدا رێكنەكەوێت پشكی لەیاسای بودجەدا نابێت

وەزیری دارایی عێراق رایگەیاند ئەگەر هەرێمی كوردستان لەگەڵ وەزارەتی نەوتی حكومەتی فیدراڵیی عێراق رێكنەكەوێت، لە یاسای بودجەدا پشكی نابێت، دەشڵێت بڕیاری دادگەی فیدراڵیی عێراق تایبەت بە یاسای نەوت و گازی هەرێمی كوردستان رێگە بە حكومەتی عێراق نادات پشكی هەرێمی كوردستان لە یاسای بودجەی گشتییدا تەرخان بكات. 
عەلی عەللاوی، وەزیری دارایی عێراق لە وەڵامی پرسیارێكدا سەبارەت بە شایستە و پشكی هەرێمی كوردستان بە  عێراق ئۆیڵ ریپۆرتـی راگەیاند: لە بودجەكانی رابردوودا بڕگەیەك هەبوو كە تێیدا 12%ـی خەرجییەكانی هەرێمی كوردستانی لەخۆگرتبوو، بەو مەرجەی هەولێر لە بەرامبەردا داهاتی نەوتی هەناردەكراو لە كێڵگەكانی هەرێمی كوردستان رادەستبكات، بەڵام ئەو رێككەوتنە، جێبەجێنەكراوە. 
عەلی عەلاوی وتیشی: دواتر ئەمە گۆڕدرا بە رێككەوتنێكی كاتی نێوان هەولێر و بەغدا، بەپێی رێككەوتنەكە مانگانە بەشێوەیەكی نیمچە رێكخراو 200 ملیار دیناری عێراقی (138 ملیۆن دۆلار) رەوانەی كوردستان كراوە، بەڵام ئەم ناردنە بەردەوام نابێت. 
 وەك عەلی عەلاوی دەڵێت: ئەركم جێبەجێكردنی یاسایە، نەوەك پێشێلكردنی، لە بودجەی 2021دا مەرجێك دانرا كە دەبێت حكومەتی هەرێمی كوردستان هەناردەكردنی نەوت رادەستی سۆمۆ بكات یان پارەی یەكسان بە بڕی نەوتی هەناردەكراو، رادەستبكات و ئەمەش نەكرا، بۆیە ناردنی پارە بۆ حكومەتی هەرێمی كوردستان وەك شایستە لە بودجەی گشتی چی دیكە نابێت.
 وەزیری دارایی عێراق ئەوەشی خستەڕوو: پێشتر كاتێك پارەمان دەنارد، گفتوگۆكانمان لەسەر ئەو بنەمایە بوون كە نەوتەكە موڵكی حكومەتی هەرێمی كوردستانە و مافی دەرهێنانی ئەو نەوتەی هەبووە، بەڵام ئێستا بابەتەكە جیاوازە.
 "هەرچی ئێستایە بابەتی خاوەندارێتی كێڵگەكانی نەوت لە هەرێمی كوردستان سەری هەڵداوە؛ بۆیە ئەگەر بێتو شایستە داراییەكانیان بخەینە نێو بودجەوە بەهەر رێژەیەك بێت، ئەوا بەشی دووەمی كێشەكە چارەسەر ناكات كە ئەویش خاوەندارێتی نەوتەكەیە كە بەگوێرەی بڕیاری دادگەی فیدراڵیی عێراق خاوەنداریەتییەكەی بۆ حكومەتی هەرێمی كوردستان ناگەڕێتەوە." وەزیری دارایی عێراق وای وت.
 بەوتەی عەلی عەلاوی: پێشتر دانپێدانانێكی راشكاوانە هەبوو كە ئەوە نەوتی حكومەتی هەرێمی كوردستانە، بەڵام ئێستا بەپێی بڕیاری دادگەی فیدراڵیی عێراق، هەرێمی كوردستان مافی نییە مامەڵە بە نەوتەوە بكات، هەرچەندە هەرێمی كوردستان بەم قسەیە رازی نابێت، بەڵام ئێستا ئەم نەوتە موڵكی ئێمەیە. 
 رۆژی 15ـی شوباتی 2022، دادگای باڵای فیدراڵیی عێراق یاسای نەوت و گازی هەرێمی كوردستانی بەپێچەوانەی دەستوور دانا كە لە ساڵی 2007 لەلایەن پەرلەمانی كوردستانەوە دەركراوە. 
وتەكانی عەلی عەلاوی لەكاتێكدایە، دوو رۆژ لەمەوبەر جوتیار عادل وتەبێژی حكومەتی هەرێم رایگەیاند: هەموو شتێكمان رادەستی بەغدا كردووە و ئامادەی رێككەوتنین.
 رۆژی 28ـی شوباتی 2022، بە سەرپەرشتیی نێچیرڤان بارزانی، سەرۆكی هەرێمی كوردستان هەرچوار سەرۆكایەتییەكە لە سەرۆكایەتیی هەرێمی كوردستان كۆبوونەوه، دواتر لە راگەیەندراوێكدا رایانگەیاند: بڕیارەكەی دادگەی فیدراڵیی عێراق پێچەوانەی دەق و گیان و بنەما راستەقینەكانی سیستمی فیدراڵییە و پێشێلكردنێكی زەق و ئاشكرای ماف و دەسەڵاتە دەستوورییەكانی هەرێمی كوردستانە.
لە ساڵی ڕابردووەوە بەغدا بۆ دابینكردنی مووچەی فەرمانبەرانی هەرێمی كوردستان بڕی 200 ملیار دینار دەنێرێت بۆ هەولێر، بەڵام لەپاش بریارەكەی دادگای فیدڕاڵی عێراق لەبارەی نایاسایبوونی فرۆشتنی نەوتی هەرێم بەغدا ناردنی 200 ملیارەكەی بۆ هەرێم ڕاگرتووە.

هەواڵ

وردەكاری گیانلەدەستدانی 46 كۆچبەر لەئەمریكا

لە شاری سان ئەنتینۆی ویلایەتی تەکساس لە هەوڵێکی قاچاخیدا لەنێوان سنوری ئەمریکا و مەکسیک نزیکەی 46 کەس بە مردوویی دۆزرانەوە.

لە شاری سان ئەنتینۆی  ویلایەتی تەکساس لەنا ترێلەیەکدا 46 کەس بەمردوویی دۆزرانەوە، کە پێدەچێت هەوڵێکی قاچاخچێتی بێت لە نێوان ئەمریکا ومەکسیک، لەگەڵ ئەوەشدا چارڵز هود بەڕێوبەری ئاگرکوژینەوەی سان ئەنتۆنیۆ ڕایگەیاندووە کە 16 کەسی دیکە هەر لەو ترێلەیەدا ڕۆژی دووشەممە دۆزراونەتەوە کە بەهۆی جەڵدەی گەرما تەندروستیان تێکچووە وگەیەنراونەتە نەخۆشخانە، کە لە نێوانیاندا چوار کەسیان تەمەنیکی کەمیان هەبووە.
بەهۆی ڕووداوەکەوە سێ کەس دەستگیرکراون 
ئە و بارهەڵگرە بارهەڵگرێکی ساردکەرەوە بوو، بەڵام هیچ یەکەیەکی تەندرووستی تیدا نەبووە، لە تەنیشت هێڵی شەمەندەفەر لە ناوچەیەکی دوور لە بەشی باشوری شارەکە دۆزرایەوە.
بەڕێوەبەری ئاگرکوژێنەوەی سان ئەنتۆنیۆپ وتیشی:  لەناو کوژراوەکاندا دوو هاوڵاتی گواتیمالای تێدا بووە کە بە ناسنامەی ساختەی یەکێتی ئەوروپا هاتوونەتە سان ئەنتۆنیۆ.
ڕووداوەکە لە ڕۆژی دووشەمەدا روویداوە کە پلەکانی گەرما لە سان ئەنتۆنیۆ کە نزیکەی 260 کیلۆمەتر لە سنوری مەکسیکەوو ودوورە بۆ نزیکەی  39 پلەی سیلیزی بەربۆتەوە لەگەڵ شێداریەکی زۆر.
ڕۆن نیربێرگ سەرۆکی شارەوانی سان ئەنتۆنیۆ ڕوداوەکەی رۆژی دووشەممەی بە کارەساتیکی ترسناك و مرۆیی ناوبرد، هەروەها وتیشی کە کوژراوەکان خێزانیان هەبووە و پێدەچیت بۆ ژیانیکی باشتر هەوڵیان دابێت.
 ڕەنگە کارەساتەکە یەکێک بێت لە کوشندەترین ڕووداوەکانی قاچاخکردنی مرۆڤ لە سنوری ئەمریکا ومەکسیک لە دەیەکانی ڕابردوودا.
هاوکات لە ساڵی 2017 شدا 10 کەس لەناو بارهەڵگرێکدا گیریان خواردبوو لە سان ئەنتۆنیۆ وەستابوو، گیانیان لەدەست دا، لە ساڵی 2019شدا 19کەسی دیکە لە بارهەڵگرێکی دیکەدا لەبەشی باشووری ڕۆژهەڵاتی شارەکە بە مردوویی دۆزرانەوە.