هەواڵ

سێیەمین قۆناغی گەڕاندنەوەی رووفاتی بارزانیەكان بەڕێوەچوو

دوای گەڕاندنەوەیان لەڕێگەی فڕۆكەخانەی نێودەوڵەتیی هەولێرەوە، ئەمڕۆ یەكشەممە بە ئامادەبوونی نێچیرڤان بارزانی سەرۆكی هەرێمی كوردستان ومەسعود بارزانی سەرۆكی پارتی و كەسوكاری قوربانییەكان و ژمارەیەك بەرپرسی حكومی و حزبی و نوێنەری وڵاتان، رێوڕەسمی بەخاكسپاردنی 100 رووفاتی ئەنفالكراوی بارزانییەكان بەڕێوەچوو.
رووفاتەكان ئێوارەی دوێنێ رۆژی شەممە 30-07-2022 لە 39یەمین ساڵیادی جینۆسایدكردنی بارزانییەكان، گەڕایەوە بۆ هەولێر و رێوڕەسمێك بە ئامادەبوونی نێچیرڤان بارزانی، سەرۆكی هەرێمی كوردستان و رێواز فایەق، سەرۆكی پەرلەمانی كوردستان و مەسعود بارزانی سەرۆكی پارتی و قوباد تاڵەبانی، جێگری سەرۆكی حكومەتی هەرێمی كوردستان، شاندێكی باڵای حكومەتی عێراق، نێردەی تایبەتی سكرتێری گشتیی رێكخراوی نەتەوەیەكگرتووەكان، نوێنەر و كۆنسوڵی وڵاتانی بیانی، سەرۆك و سكرتێر و نوێنەرانی حیزب و لایەنە سیاسییەكانی هەرێمی كوردستان و عێراق و ژمارەیەكی زۆر لە كەسایەتییە ناوخۆیی و بیانییەكان و كەسوكاری ئەنفال و جینۆسایدكراوان لە فڕۆكەخانەی نێودەوڵەتیی هەولێر، بەڕێوەچوو.
لە رێوڕەسمی بەخاكسپاردنی 100 رووفاتی ئەنفالكراوی بارزانییەكان لە مۆنیومێنتی ئەنفال لە بارزان، عەبدوڵڵا حاجی مەحموود، وەزیری كاروباری شەهیدان و ئەنفالكراون، لەبارەی پلان و بەرنامەیان بۆ دۆزینەوەی گۆڕە بەكۆمەڵەكان و هەڵدانەوەیان و گەڕاندنەوەی رووفاتەكان رایگەیاند: وەك وەزارەتی كاروباری شەهیدان و ئەنفالكراون، بەپێی پلان و بەرنامەی خۆمان بەدواداچوون و گەڕانمان هەیە بۆ هێنانەوەی رووفاتی سەرجەم شەهیدانی گەلی كوردستان، رووفاتی شەهیدانی بارزانی و ئەو شەهیدانەی كە كاتی خۆی جینۆسایدكراون بارزانییەكان و شەهیدانی شاڵاوەكانی ئەنفال لە گەرمیان و چەمچەماڵ و ناوچەكانی دیكەی كوردستان.
وتیشی: هەماهەنگی هەیە و هیچ رێگرییەك نییە، پێشتر بەهۆی كۆرناوە پرۆسەكە دواكەوت، لە ئێستا بەدواوە هەوڵ و بەرنامەمان هەیە و بەپێی ئەو پلانەی هەیە، بەدواداچوون دەكەین بۆ هێنانەوەی رووفاتی شەهیدانی خەڵكی كوردستان.
وەزیری كاروباری شەهیدان و ئەنفالكراون، لەبارەی هەوڵەكان بۆ گۆڕە بە كۆمەڵەكانی كوردانی ئێزدی وتی: بەردەوامین و كاریش كراوە؛،لیژنەیەكی تایبەتمەند پێكهێندراوە، ئەوەی بە ئێمە بكرێت كەمتەرخەمی ناكەین. 
ئەمە سێیەم قۆناغی گەڕاندنەوەی رووفاتی بارزانییەكانە، پێشتریش لە 2005 و 2014 دوو قۆناغی دیكەی گەڕاندنەوەی رووفاتەكان بەڕێوەچوو و گەڕێندرانەوە، تاوەكو ئێستا لە كۆی هەشت هەزار ئەنفالكراوی بارزانی، رووفاتی 696 كەس گەڕێندراوەتەوە و هێشتا رووفاتی 7304 بارزانی لە بیابانەكانی عێراق ماون و نەگەڕێندراونەتەوە.

هەواڵ

راپرسییەک بۆ پێوانەکردنی ئاستی دابڕانی کلتوریی لە هەرێمی کوردستان

دامەزراوەی ڤیژن فاوندەیشن، بۆ لێکۆڵینەوەی ستراتیژی، کار لەسەر پرۆژەیەک دەکات بۆ پێوانەکردنی ئاستی دابڕانی کلتوریی لە ناوچە جیاجیاکانی لە هەرێمی کوردستان، بۆ ئەومەبەستە فۆرمێکی ئەلیکترۆنی بڵاودەکاتەوە.

لە پێناسەی پرۆژەکەدا دامەزراوەی ڤیژن ئاماژە بەوەدەکەن، "کۆمەڵگای کوردستانی لە هەرێمی کوردستان سەرەڕای بوونی ژێرخانێکی دەوڵەمەندی کلتووری و تۆڕێک پەیوەندی هەمەجۆر لەناو کۆمەڵگاکەماندا، بەڵام هێشتا بەربەست و گرفتی گەورەی ناوخۆیی و بگرە جۆرێک لەدابڕانی کلتوریش هەیە، کە دەکرێ وەکو مەترسی سەیر بکرێ، بۆ هاوبەشی و یەکگرتویی کۆمەڵگا".

ئاماژە بەوەکراوە کە ئەو ناوچانەی هەرێمی کوردستان کە بە "شێوەزاری بادینی" دەدوێن و دەنوسن و دەخوێننەوە، لەگەڵ ئەو ناوچانەی کە بە "سۆرانی" دەدوێن و دەنوسن و دەخوێننەوە دابڕانە کلتورییەکە زیاتر بەدیدەکرێت.

ئامانجی پرۆژەکە دەرخستنی راستی و روونی و قەبارەی ئەو دابڕانە کلتووریەی لە نێوان ناوچە جیاوازەکانی هەرێمی کوردستاندا هەن، بۆ دەستنیشانکردنی بەربەست و رێگرییەکانی بەردەم ئاڵوگۆڕی کلتوورییە.

بەپێی پرۆژەکەی دامەزراوەی ڤیژن، لەکۆتاییدا پەڕاوێکی پێشنیاز بۆ حکومەتی هەرێمی کوردستان و پەرلەمان ئامادەدەکرێت و لەپێناوی "گەشەپێدانی کلتووری و چارەسەرکردنی گرفت و لابردنی بەربەستەکان". 

لێرە دەتوانیت فۆرمەکە پڕبکەیتەوە:

https://docs.google.com/forms/d/e/1FAIpQLSdJmmTCgpRhFI-5XhJlNMNmci6tLRQdgDAm7DtiRf_pbr5sHw/viewform?pli=1