ئێران: توانای بەرهەمهێنانی بۆمبی ئەتۆمیمان هەیە

محەمەد ئیسلامی سەرۆكی رێكخراوی وزەی ئەتۆمی ئێران رایگەیاند وڵاتەكەی توانای ئەوەی هەیە بۆمبی ئەتۆمی بەرهەم بهێنێت بەڵام ئەوكارە ناكات.
بەپێی هەواڵێكی ئاژانسی فارس، وتەكانی محەمەد ئیسلامی دوای ئەوەدێت رافائیل گروسی سەرۆكی ئاژانسی نێودەوڵەتی وزەی ئەتۆم رایگەیاند: هیچ زانیاریمان نییە بیسەلمێنێت ئێران توانای بەرهەمهێنانی بۆمبی ئەتۆمی هەیە، بەڵام ئەو هەوڵ وپلانەی ئێران كاری لەسەردەكات ئاماژە بەوەدەكات ئێران بەرەو دروستكردنی بۆمبی ئەتۆمی هەنگاو دەنێت.
رافائیل گروسی بە تۆڕی سی ئێن ئێنی وتووە: نازانین چی ڕوودەدات لەبەرنامەی ئەتۆمی ئێران، لەڕاستیدا ئێران ژمارەیەك لەكامێراكانی بەرنامە ئەتۆمیەكەی داخستووە بۆیە هیچ شتێك ڕوون نییە.
سەرۆكی ئاژانسی نێودەوڵەتی وزەی ئەتۆم هیچ كاتێكی دیارینەكردووە تا ئێران بتوانێت بۆمبی ئەتۆمی دروستبكات، بەڵام رایگەیاند: ئێران بەرێژەی %60 دەستی بەپیتاندنی یۆرانیۆم كردووە، ئەو رێژەیەش لە %90 دەتوانێت بۆمبی ئەتۆمی پێ دروست بكرێت.
رافائیل گروسی وتیشی: ناتوانین متمانە بە قسە بكەین، پێویستە ئێران رێگە بە پشكنەرە نێودەوڵەتیەكان بدات بچنەوە وڵاتەكەی، چونكە ئێستا گفتوگۆكانی نێوان ئێران و وڵاتانی رۆژئاوا لەقۆناغێكی هەستیاردایە و بەو هەنگاوە ئەگەری رێككەوتن رۆژ بەرۆژ قورستر دەكات.
سەبارەت بە داخستنی كامێراكانی بەرنامەی ئەتۆمی ئێران، محەمەد ئیسلامی دەڵێت تا ئەوكاتەی رێككەوتنی ساڵی 2015 سەبارەت بەبەرنامەی ئەتۆمی ئێران زیندوو دەكرێتەوە كامێراكان هەڵناكرێنەوە.
پێشتر ئێران ئاژانسی نێودەوڵەتی وزەی ئەتۆمی ئاگاداركردووەتەوە لەوەی 27 كامێرای بەرنامە ئەتۆمیەكەی داخستووە، ئەویش بەپێی رێككەوتنێك بووە.
رێككەوتنی ئەتۆمی نێوان ئێران و وڵاتانی رۆژئاوا لەساڵی 2015 چەند كۆت و بەندێكی لەسەر بەرنامەی ئەتۆمی ئێران داناوە، كە ئەویش لەبەرامبەر هەڵگرتنی سزا نێودەوڵەتیەكانی سەر ئێران بوو، بەڵام لەساڵی 2018 دۆناڵد ترەمپ سەرۆكی ئەوكاتی ئەمریكا لەڕێككەوتنەكە كشایەوە و دووبارە سزاكانی بەسەر ئێراندا سەپاندەوە.
لەمانگی سێی ئەمساڵ گفتوگۆی بەرنامەی ئەتۆمی نێوان ئێران و وڵاتانی رۆژئاوا دەستیپێكردەوە، بەڵام تائێستا نەگەیشتوونەتە رێككەوتنی كۆتایی.

هەواڵ

30 پەرلەمانتار: سەلامەتی گیراوانی بادینان لەئەستۆی داواكاری گشتی و چاكسازی گەورانی هەولێرە

30 پەرلەمانتاری هەرێمی كوردستان یاداشتێكیان لەبارەی دۆخی زیندانییانی بادینان بڵاوكردەوە و ڕایدەگەیەنن، سەرباری ئەوەی زیندانیانی بادینان مەرجەكانی ئازادبوونی مەرجدار دەیانگرێتەوە، بەڵام بە مەبەست هێڵدراونەتەوە لە زینداندا، جەختیش دەكەنەوە سەلامەتیی گیانی گیراوانی بادینان لە ئەستۆی داواكاری گشتی چاكسازیی و بەڕێوەبەری چاكسازیی گەورانی هەولێر دایە.
نزیكەی مانگێكە 60 زیندانیكراوی بادینان مانیان لەخواردن گرتووە بەهۆی ئەوەی ئازادكردنی مەرجدار دەیانگرێتەوە، بەڵام تاوەكو ئێستا ئازادنەكراون، 30 پەرلەمانتاری هەرێمی كوردستانیش یاداشتێكیان لەوبارەیەوە بڵاوكردووەتەوە و تێیدا هاتووە: زیندانیانیی بادینان پاش ئەوەی ئەحكامی مەرجەكانی بەربوونی مەرجدار دەیانگرێتەوە، كە لە ماددەی 331ی یاسای بنەما دادگەرییە سزاییەكاندا هاتووە، پێویست بوو كارڕایی ئازادكردنیان بۆ ئەنجام بدرایە، بەڵام بەداخەوە بەمەبەست و پێشێلكردنی یاسا هێڵدراونەتەوە لە كونجی زینداندا.
هەر لەیاداشتەكەدا هاتووە: ماوەی 26 ڕۆژە زیندانییانی بادینان مانیان گرتووە و دۆخی تەندروستیی بەشێكیان ناجێگیرە و ژیانیان لە مەترسیدایە، لەبەر ئەوە دەبوو  بەڕێوەبەریی چاكسازی گەورانی هەولێر ئەركی فەرمانبەریی خۆی ڕاپەڕاندایە و كارڕایی بەردانی مەرجداری ئاڕاستەی داواكاری گشتی بكردایە، ئەركی داواكاری گشتیشە بەزووترین كات مامەڵەكانیان ئاڕاستەی دادگای كەتن بكات، تا كاروبارەكانیان ڕاییبكرێت و ئازاد بكرێن و یاسا سەروەربێت .
ئەو پەرلەمانتارانە جەختیش دەكەنەوە، بەپێی یاسای داواكاری گشتیش، دەبێت داواكاری گشتی بێلایەنانە كارەكانی خۆی ئەنجام بدات، هاوكات داواش لە سەرۆكایەتیی داواكاری گشتیی دەكەن:”لێكۆڵینەوەی جددی لە داواكاریی گشتی چاكسازیی گەورانی هەولێر بكات، بەهۆی  كەمتەرخەمیكردنی لە ئەركی چاودێرییكردن لە سستی كارڕاییەكان.
ئەو پەرلەمانتارانە داوا لە وەزیری كاروكاروباری كۆمەڵایەتی و سەرۆكی دەستەی دەستپاكیی دەكەن، كە لێكۆڵینەوە و لێپرسینەوەی جددی بكەن لە بەڕێوەبەریی چاكسازیی گەورانی هەولێر، سەبارەت بە كەمتەرخەمییكردنی لە ڕاپەڕاندنی ئەركەكەیدا.
هەر لەیاداشتی ئەو پەرلەمانتارانەدا هاتووە: سەلامەتیی گیانی گیراوانی بادینان لە ئەستۆی داواكاری گشتی چاكسازیی و بەڕێوەبەری چاكسازیی گەورانی هەولێر دایە و دەڵێن “هەر مەترسییەك لەسەر ژیانی ئەو زیندانییانە دروست ببێت، دەكەوێتە ئەستۆی ئەوان، هاوكات ئەوەش هاتووە: ئێمەش لە پەرلەمانی كوردستان هەموو هەوڵێك و ڕێكارێكی یاسایی دەگرینە بەر بەمەبەستی پێشێلنەكردنی ماف و پاراستنی شكۆی مرۆڤ و بەكارنەهێنانی دادگا و دەزگاكان بۆ مەرامی سیاسی و تۆڵە كردنەوە.