هەواڵ

100 كارگە لەهەرێم لەژێر هەڕەشەی داخستندان

سەرۆكی ژوری بازرگانی و پیشەسازی سلێمانی رایگەیاند، لە هەرێمی كوردستان 100 كارگە هەن كە زیاتر لە پێنج هەزار كەس كاریان تێدا دەكەن، دەشڵێت بەهۆی كارئاسانی نەكردنی حكومەت بۆ خاوەنكارگەكان لەژێر هەڕەشەی داخستندان.
ئەمڕۆ دووشەممە، سیروان محەمەد سەرۆكی ژوری بازرگانی و پیشەسازی سلێمانی لە كۆنفرانسێكی رۆژنامەوانیدا رایگەیاند: زیاتر لە 100 كارگە لە هەرێمی كوردستان هەن كە پێنج هەزار كەس لەوكارگانەدا كاردەكەن.
سەرۆكی ژووری بازرگانی سلێمانی وتیشی: 20 هەزار كەس لە داهاتی ئەو كارگانە سودمەند دەبن، بەڵام ئەگەر ئەم بارودۆخە بەردەوامبێت و حكومەت كارئاسانییان بۆ نەكات، ئەوا خاوەنەكانیان ناچاردەبن كارگەكانیان دابخەن.
سیروان محەمەد ئەوەشی خستەڕوو: پێویستە حكومەتی هەرێمی كوردستان گومرگی سەر ماددە خاوەكان لاببات، بۆ ئەوەی كارگەكانی ناوخۆ بتوانن ركابەری كاڵای هاوردە بكەن.
بەوتەی سەرۆكی ژووری بازرگانی و پیشەسازی سلێمانی لە ئێستادا حكومەت باج و گومرگی لەسەر ماددە پاكەرەوەكان لاداوە پێویستە باج و گومرگ بخاتە سەریان، بۆ ئەوەی نرخی بەرهەمی كارگەكانی ناوخۆ بەرزبێتەوە.
وەك سیروان محەمەد دەڵێت: بەرهەمی كارگەكانی هەرێمی كوردستان زیاتر لە 80٪ی بۆ شارەكانی ناوەڕاست و خوارووی عێراق دەنێردرێت.
لەهەرێمی كوردستان زۆری رۆتیناتی حكومەت و نەبوونی خزمەگوزار پێشكەوتوو و پێویست لە بەردەم وەبەرهێنەران و خاوەن كارگە و پیشەكان و بەردەوام زیادكردنی باج لەسەریان، هەروەها قۆرغكردنی كەرتەكانی نەوت و دەرمان بۆ كۆمپانیاكانی یەكێتی و پارتی، كێشەو گرفتی زۆری بۆ هاوڵاتییان و خاوەن كار و پڕۆژەكان دروستكردووە و هەر بەوهۆیەشەوە سەدان پرۆژە راگیراون و سەدان كۆمپانیاش ئیفلاسیان كردووە یاخود نزیكن لەوەی ئیفلاس بكەن، بەتایبەتیش لەسنووری پارێزگای سلێمانی

هەواڵ

بەرهەمهێنانی نەوت راگیراوە و تا هەرێمی کوردستانیش نەوت رادەست نەکات مووچە نایەت

بەپێی رێککەوتنی حکومەتی هەرێمی کوردستان و حکومەتی عێراق تا نەوت رادەستی کۆمپانیای سۆمۆ نەکرێت بەغدا پارەی مووچە رەوانە ناکات؛ زیاتر لە 24 کاتژمێرە بەهۆی هێرشە درۆنییەکانەوە بەرهەمهێنانی نەوت لە هەرێمی کوردستان راگیراوە. 

 حکومەتی هەرێمی کوردستان دوای چەندین کۆبوونەوە لەگەڵ حکومەتی عێراق لەسەر پرسی نەوت و داهاتە نانەوتییەکان رێککەوتنی کرد. 

بەپێی دەقی ئەو رێککەوتنە کە ئەنجومەنی وەزیرانی عێراق بڵاویکردوەتەوە، تا وەزارەتی نەوت و کۆمپانیا سۆمۆ وەرگرتنی نەوت لە بەندەری جەیهان پشتراست نەکەنەوە، وەزارەتی دارایی پارە بۆ هەرێمی کوردستان نانێرێت. 

بەپێی رێککەوتنەکەی هەولێر و بەغدا دەبێت هەرێمی کوردستان رۆژانە 280 هەزار بەرمیل نەوت بەرهەم بهێنێت، 230 هەزاری بداتە بەغدا و 50 هەزاریشی لە ناوخۆدا بەکاربهینێتەوە. 

ناردنی پارەی مووچە بە مەرجی رادەستکردنی نەوت لە کاتێکدایە زیاتر لە 24 کاتژمێرە بەهۆی هێرشی درۆنییەوە بەرهەمهێنانی نەوت لە هەرێمی کوردستان رایگراوە. 

عەزیز ئەحمەد جێگری بەڕێوەبەری نوسینگەی سەرۆکی حکومەتی هەرێمی کوردستان و کۆمەڵەی پیشەسازی نەوتی کوردستان - ئەپیکور لە دوو راگەیەندراوی جیاوازدا رایانگەیاند، بەهۆی هێرشە درۆنییەکانەوە هەرێمی کوردستان نزیکەی 200 هەزار بەرمیل بەرهەمهێنانی نەوتی لەدەستداوە. 

ئەگەرچی هەولێر و بەغدا رێککەوتنیان کردووە، بەڵام ناو بەناو هێرشی دۆرنییەکان دەست پێدەکەنەوە و کێڵە نەوتییەکان بە ئامانج دەگرن دیار نیە درۆنەکان رێگە بە دەستپێکردنەوەی نەوت دەدەن یاخود هێرش دەکەنەوە. 

هەموو ئاماژەکان بەو ئاڕاستەیەن رێککەوتنەکەی هەولێر و بەغدا کۆتایی بە هێرشی درۆنەکان بهێنێت، چونکە ئەو هێرشانە وەک کارتی فشار دژی هەرێمی کوردستان دەبینران تا نەرمی بۆ رێککەوتن بنوینێت و نەوتەکەی رادەست بکات.