تۆڕێكی بازرگانیكردن بە گون و گورچیلەوە دەستگیركران

وەزارەتی ناوخۆی عێراق رایگەیاند تۆڕێكیان دەستگیركردووە كە لەگەڵ چەند كەسێك لەئۆكرانیا پەیوەندییان هەبووە و بازرگانییان بە گون و گورچیلەوە كردووە.
عەمید ویسام ئەلزوبەیدی بەڕێوەبەری لێكۆڵینەوەكانی دژ بە بازرگانیكردن بە ئەندامانی جەستەی مرۆڤ لەوەزارەتی ناوخۆی عێراق رایگەیاند: تۆڕێكی بازرگانیمان دەستگیركردووە كە پەیوەندییان لەگەڵ تۆڕێك لە وڵاتی ئۆكرانیا هەبووە و بازرگانییان بە گون و گورچیلەی عێراقیەكانەوە كردووە.
وتیشی: نرخی هەر گونێك لە دەرەوەی عێراق دەگاتە 80 هەزار دۆلار و نرخی هەر گورچیلەیەكیش دەگاتە 33 هەزار دۆلار.
عەمید عیسام ئەلزوبەیدی دەشڵێت: زۆرینەی بازرگانییەكان بە مرۆڤەوە سەرنجیان لەسەر فرۆشتنی گورچیلەیە، دەستمان گرتووە بەسەر تۆڕێكی بازرگانی  فرۆشتنی گوندا لەنێوان عێراق و ئۆكرانیادا.
ئەلزوبەیدی باسی لەوەشكردووە: مەفرەزەكانی بازرگانیكردن بە مرۆڤەوە لە هەموو نەخۆشخانەیەكدا بوونیان هەیە كە چاندنی ئەندامەكانی جەستەی ئەنجامدەدەن.
ئەو بەرپرسەی وەزارەتی ناوخۆی عێراق جەختیشیكردەوە وەزارەتی ناوخۆ لەو دیو سنورەكانەوە كاردەكات بۆ بەرەنگاربوونەوەی بازرگانیكردن بە ئەندامەكانی لەشی مرۆڤەوە.
"چەندین كەس هەیە كە وەك دەڵاڵ كاردەكەن بۆ بازرگانیكردنی بە ئەندامەكانی جەستەی مرۆڤەوە، هەموو ئەو لاپەڕە ئۆنڵاینانەی پەیوەستن بە بازرگانیكردن بە مرۆڤەوە راگیراون و ئۆپەراسیۆنەكانی لەناوبردنی باندەكانی بازرگانیكردن بە مرۆڤەوە لەم دواییانەدا زیادی كردووە".
عەمید ویسام ئەلزوبەیدی بەڕێوەبەری لێكۆڵینەوەكانی دژ بە بازرگانیكردن بە ئەندامانی جەستەی مرۆڤ لەوەزارەتی ناوخۆی عێراق وای وت.
بازرگانیكردن بە گون و گورچیلەی مرۆڤ لەجیهان و عێراق شتێكی نوێ نییە، لەهەرێمی كوردستان تائێستا هیچ تۆڕێكی بازرگانیكردن بە گون و گورچیلە و ئەندامەكانی جەستەی مرۆڤ دەستگیرنەكراون، بەڵام ناوبەناو هەواڵی فرۆشتنی ئەندامەكانی جەستەی مرۆڤ بڵاودەبنەوە.

هەواڵ

سەدر بۆچی خۆپیشاندانە ملیۆنیەكەی دواخست؟

موقتەدا سەدر رێبەری ڕەوتی سەدر بەتویتێك خۆپیشاندانی ملیۆنی لایەنگرانی لەبەغدا دواخست، كە ئەوەش بڕیارێكی كتوپڕی سەدر بوو وەك هەمیشە،ئەوەش لەكاتێكدایە،  ئەمرۆ وەزیرەكەی لایەنە شیعەكانی ناو چوارچێوەی هەماهەنگی بە هەوڵدان بۆ نانەوەی شەڕی ناوخۆ تۆمەتبار كرد.
موقتەدا سەدر رێبەری ڕەوتی سەدر ئەمرۆ لەتویتێكدا رایگەیاند خۆپیشاندانی ملیۆنی رۆژی شەممەی داهاتوو دوادەخات، بەڵام راشیگەیاند تا بەدەستهێنانی داواكاری خۆپیشاندەران لەمانگرتن بەردەوام دەبن.
سەدر لەتویتەكەیدا نوسیویەتی: گەل لەمانگرتن بەردەوام دەبێت تا داواكارییەكانی جێبەجێ دەكرێت، بەڵام كاتی خۆپیشاندانە ملیۆنیەكە بۆ رۆژی شەممەی داهاتوو دوادەخەین تا كاتێكی دیكە و رێنمایی نوێ دەدەین.
هەرچەندە پێشتر سەركردەیەكی نزیك لەموقتەدا سەدر رایگەیاندبوو داواكاری خۆپیشاندانی لایەنگرانی چوارچێوەی هەماهەنگی، موقتەدا سەدر ناترسێنێت لەوەی خۆپیشاندانی ملیۆن ڕێكبخات، بەڵام وەك بەشێك لەمیدیا عێراقیەكان بڵاویانكردووەتەوە هۆكارەكەی ئەوەیە كە سەدر ترسی ئەوەی هەبووە لەكاتی خۆپیشاندانی ملیۆنی رۆژی شەممە لەنێوان لایەنگرەكانی و لایەنگرانی هەماهەنگی شیعەكان ئاڵۆزی دروست ببێت و دۆخەكە لەدەست دەربچێت.
پێشتر ساڵح محەمەد عێراقی كە بەوەزیرەكەی سەدر ناسراوە، لەتویتێكدا رایگەیاند: سێ یەكی پەكخەر یاری بە ئاگر دەكەن، كە مەبەست لێی هەماهەنگی شیعەكان و لایەنەكانی نزیك لێیەتی، هەروەها تۆمەتباریشی كردن بە نانەوەی ئاژاوە و هەوڵدان بۆ دروستكردنی شەڕی ناوخۆ لەنێوان گەلانی عێراق، هاوكات تۆمەتباریشی كردن بەوەی دەیانەوێت توندوتیژی بەرامبەر هێزە ئەمنیەكان بەكاربهێنن.
وەزیرەكەی سەدر ئەوەشی خستەڕوو: ڕەوتی سەدر بۆ چاكسازی خۆپیشاندان دەكات، بەڵام هەماهەنگی شیعەكان دژ بە چاكسازی خۆپیشاندان دەكات، وتیشی هەرچەندە تێبینیمان هەیە لەسەر ئەنجومەنی باڵای دادوەری بەڵام هێرشكردنەسەری هێڵی سورە.
رەوتی سەدر و هەماهەنگی شیعەكان شەقام بۆ فشار خستنە سەر یەكتر بەكاردەهێنن، رۆژی 30 ی مانگی رابردوو لایەنگرانی رەوتی سەدر چوونە ناو بینای پەرلەمانی عێراق و دەستیان بەسەرداگرت، دواتریش هەماهەنگی شیعەكان داوایان لەلایەنگرانیان كرد بچنە ناوچەی سەوزی بەغدا.
لە 10 ی ئۆكتۆبەری ساڵی رابردوەوە هەڵبژاردنی پەرلەمانی عێراق بەڕێوەچووە، بەڵام جگە لە هەڵبژاردنی سەرۆكی پەرلەمان لایەنە عێراقیەكان نەیانتوانیوە سەرۆكوەزیران و سەرۆك كۆمار هەڵبژێرن، ئێستاش سەدر داوای هەڵوەشاندنەوەی پەرلەمان و هەماهەنگی شیعەكانیش داوای مانەوەی دەكەن.