هەواڵ

ڕووداوی كوشتنی گەنجێك لەسلێمانی گومانی لای كەسوكارەكەی دروستكردووە

رووداوی كوشتنی گەنجێك لەسلێمانی كە ئاسایش دەڵێت بەهەڵە بووە گومانی دروستكردووە، ئەو كەسەی كوژراوە ناوی ئەحمەدە و كوڕی بەڕێوەبەری كۆمپانیای خۆراكی سلێمانییە.
ئێوارەی دوێنێ بە تەقەی هێزێكی ئاسایشی سلێمانی گەنجێكی تەمەن 22 ساڵ كوژرا، كەسوكاری كوژراوەكە دەڵێن، ڕووداوەكە هەڵە نەبووە و بە ئەنقەست كوڕەكەیان كوشتووە، بەوتەی كەسوكارەكەی،هێزەكەی ئاسایش گوللـەیەكیان لەو كوڕەكەیان داوە و دواتر چوونەتەسەری و گوللـەیەكی دیكەشیان لێداوە، بەڵام ئاسایشی سلێمانی پێشتر لەڕوونكردنەوەیەكدا رایگەیاند بەهەڵە كوژراوە و لێكۆڵینەوە دەكەن.
لەوبارەیەوە عادل ئەحمەد، خاڵی گەنجە كوژراوەكە لە پرسەی كوڕەكەیاندا لە لێدوانێكیدا بۆ میدیاكان قسەیكرد و وتی: ئێمە گومانمان لە ڕووداوەكە هەیە، چونكە دوو گوللـە بەر كوڕەكەمان كەوتووە یەكێك لە پێشەوە یەكێك لە دواوە، واتە ڕووداوەكە لە مەبەست دەچێت، نەك قەدەر و ڕووداوی نەخوازراو.
وتیشی: هەروەها ئاسایش شەو دەڵێن، بۆ گرتنی دوو تیرۆرست چوون، ئەمڕۆ بە ئێمە دەڵێن، بۆ دەستبەرداگرتنی مادەی هۆشبەر چوون، واتە بە گشتیی شتەكان جێگەی گومانن.
عادل ئەحمەد دەشڵێت: بەوتەی شایەتحاڵانی ڕووداوەكە،هیچ تۆمەتبار و كەسێك لە شوێنی ڕووداوەكە نەبووە، هێزەكەی ئاسایش هەر كە چوون دەستیان كردووە بە تەقە و یەكەم گوللـە بە خوشكەزاكەی منیانەوە ناوە، ئەو لە ترسا ڕایكردووە، دواتر چوونەتە سەری و گوللـەیەكی دیكەیان لێداوە، تەنانەت بە برینداریش وەك تاوانبار مامەڵەیان لەگەڵدا كردووە و ویستویانە كەلەپچەی بكەن، تا دواتر بردوویانەتە نەخۆشخانە و گیانی لەدەستداوە.
بەوتەی خاڵی گەنجە كوژراوەكە "ئەحمەد لە قۆناغی چوارەمی زانكۆ بووە، وتیشی داوا لە بەڕێوەبەری ئاسایش دەكەین لێكۆڵینەوە لە ڕووداوەكە بكەن و ڕاستییەكان بۆ ئێمە ئاشكرا بكەن، ئەگەر ڕووداوەكە هەڵە بووە، پێویستە ئەو كەسانەی تەقەیان كردووە بدرێنە دادگا، ئەگەریش هەڵە نیە ئەوا با بزانین."
"ئەم ڕووداوە هەڵە نەبووە، ئێمە بنەماڵەیەكین چەندین ساڵە پێشمەرگەی ئەم نیشتیمانەین و هەندێك شارەزاییمان هەیە، كاتێك هیچ كەس و تۆمەتبارێك تەقەی نەكردووە، هێزەكەی ئاسایش بۆ تەقەی كردووە، دواتر ڕووداوەكە لە 5:00ی ئێوارە ڕوویداوە، بەڵام ئاسایش لە 12:00ی شەودا ڕوونكردنەوە دەدات دەڵێت، بە هەڵە بووە."خاڵی ئەحمەد وا دەڵێت
شەوی رابردوو لەڕوونكردنەوەیەكدا ئاسایشی سلێمانی رایگەیاند: پاش  نیوەڕۆی  یەكشەمە ١٤/٨/٢٠٢٢ لەكاتێكدا هێزەكانی ئاسایشی سلێمانی  لەئەركێكی فەرمیدا و لەسەر فەرمانی دادوەر لەناوبازاڕی شاری سلێمانی  هەستان بەدەستگیركردنی دوو تیرۆریست، لەكاتی دەستگیركردنیاندا تیرۆریستەكان هەوڵیاندا  خۆیان  دەربازبكەن ، بەڵام هێزەكانمان لێیان هاتنە دەست و قۆلبەست كران ، جێگەی داخە لەكاتی ڕووبەڕوو بوونەوە لەگەڵ تیرۆریستەكان هاوڵاتیەكی شارەكەمان كە لە خێزانێكی دڵسۆز و خەباتگێرن  شەهید بوو.
ئاسایشی سلێمانی ئەوەشی خستووەتەڕوو: وەك بەڕێوەبەرایەتی ئاسایشی سلێمانی ئەوپەڕی دڵتەنكی خۆمان و پرسەو ماتەمینی  ڕادەگیەنین ، داواكارین لەخوای پەروەردگار بە بەهەشتی شاد بكات ،دوا بەدوای ڕووداوەكە دەست بەجێ لیژنەیەكی لێكۆڵینەوە پێكهێنرا و لێكۆڵینەوە بەردەوامە .

هەواڵ

کۆمسیۆن کارەکانی ڕاگرت و هەڵبژاردن ناکرێت

بەڕاگرتنی کارەکانی کۆمسیۆنی هەڵبژاردنەکانی عیراق بۆ هەڵبژاردنی پەرلەمانی کوردستان جارێکی دیکە هەڵبژاردنەکە لەوادەی خۆیدا ناکرێت و هێشتا دیاریش نییە وادەی نوێ کەیە.

ئەمڕۆ چوارشەممە، جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق رایگەیاند "دوای بڕیارەکەی دادگەی باڵای فیدراڵی، دوێنێ سێشەممە 7ی ئایاری 2024 ئەنجوومەنی کۆمیسیارانی کۆمیسیۆنی باڵای سەربەخۆی هەڵبژاردنەکانی عێراق بڕیاری دا سەرجەم رێکارە تەکنیکی و داراییەکانی تایبەت بە هەڵبژاردنی پەرلەمانی کوردستان رابگرێت، تاوەکو ئەو سکاڵایە یەکلا دەبێتەوە کە لە دادگەی باڵای فیدراڵی تۆمار کراوە."

وتەبێژی کۆمیسیۆن جەختی لەوە کردەوە، بڕیاری ئەنجوومەنی کۆمیسیاران بە راگرتنی رێکارەکانی هەڵبژاردنی پەرلەمانی کوردستان، دەکرێت لە دەستەی دادوەری تانەی لێبدرێت."

سەبارەت بە وادەی یەکلاکردنەوەی سکاڵاکە و دەستپێکردنەوەی رێکارەکانی کۆمیسیۆن، جومانە غەلای گوتی، "تائێستا دیار نییە."

راگرتنی کارەکانی کۆمسیۆن بەبڕیاری دادگای فیدراڵییە لەسەر سکاڵایەکی مەسرور بارزانی سەرۆکی حکومەتی هەرێمی کوردستانە،