هەواڵ

وەزارەتی كارەبا تێكڕای كاتەكانی پێدانی كارەبا لەهەرێم ئاشكرادەكات

Mic
2022-09-19

وتەبێژی وەزارەتی كارەبای حكومەتی هەرێم كاتەكانی پێدانی كارەبا بەهاوڵاتیان تا 17 ی ئەم مانگە ئاشكرا دەكات و دەڵێت بەتێكڕا زیاتر لە 15 كاتژمێر بووە، دەشڵێت هاوڵاتیان زیاتر لە ترلیۆنێك دینار قەرزاری وەزارەتی كارەبان، ئەوەش لەكاتێكدایە بەشێك لەهاوڵاتیان دەڵێن داوای قەرزی كارەبایان لێكراوەتەوە.
سیروان محەممەد، بەڕێوەبەری راگەیاندنی كارەبای سلێمانی بەمایكی وت: بڕیاردراوە لە رێگەی قیستەوە هاوكاری هاوبەشان و هاوڵاتیان بكرێت بۆ ئەوەی قەرزەكانیان بگەڕێننەوە، ئەوەش بۆ ئەوەیە بتوانین هاوكاریان بین، چونكە رەنگە پارەیەكی زۆر قەرزدار بن و نەتوانن بە یەكجار پارەكە بگەڕێننەوە.
 ئومێد ئەحمەد، وتەبێژی وەزارەتی كارەبای حكومەتی هەرێمی كوردستان بەمایكی وت:هیچ بڕیارێك نەدراوە كە ئەگەر هاوڵاتیان قەرزەكانیان نەگەڕێننەوە، كارەبایان ببڕدرێت، بەڵام سەبارەت بە قەرزی بازرگانی، كشتوكاڵ و پیشەسازی ئاسانكارییان بۆ كراوە بۆ ئەوەی بە قیست بیگەڕێننەوە، ئەگەر نەیگەڕێننەوە ئەوە كارەبایان دەبڕدرێت.
 ملیۆنێك و 770 هەزار هاوبەشی كارەبا لەهەرێمی كوردستان هەن، بەوتەی وتەبێژی وەزارەتی كارەبای هەرێم زیاتر لە ترلیۆنێك دینار قەرزداری وەزارەتی كارەبان.
رۆژی یەكشەممە 18-9-2022، عەلی حەمە ساڵح، ئەندامی پەرلەمانی كوردستان رایگەیاند: ژمارەیەكی زۆر هاوڵاتی سكاڵایان كردووە و دەڵێن فەرمانگەكانی كارەبا ئاگاداركردنەوەیان بۆ ناردوون، ئەگەر ئەو قەرزەی لە سەریانە نەیگەڕێننەوە كارەبایان دەبڕدڕێت. 
بەوتەی ئەو پەرلەمانتارە، لەو بارەیەوە لەگەڵ وەزارەتی كارەبا قسەیان كردووە و داوای ئاسانكارییان كردووە و دواجار بڕیاردراوە، بۆ قەرزی بازرگانی، كشتوكاڵ و پیشەسازی لە سنووری هەولێر و دهۆك بە شەش قیستی شەش مانگی و لە سلێمانی بە سێ قیستی سێ مانگی قەرزەكان وەربگیرێتەوە.
 دوێنێ وەزارەتی كارەبای حكومەتی هەرێمی كوردستان لە راگەیەندراوێكدا بڵاویكردەوە: لەكاتژمێر شەشی بەیانی تا كاتژمێر شەشی ئێوارەی ئەمڕۆ بەهۆی لیكی غازەوە، پرۆسەی چاكسازی لەكێڵگەی خۆرمەڵە بەڕێوە دەچێت و  بەهۆیەوە گواستنەوەی غاز بۆ وێستگەكانی بەرهەمهێنانی كارەبا بە بڕی 90 ملیۆن پێ سێجا كەم دەكات و بڕی بەرهەمهێنانی كارەباش بۆ 250 مێگاوات كەمدەبێتەوە.
لە بەشێكی دیكەی ڕاگەیەندراوەكەدا هاتووە: وەزارەتەكەمان لەگەڵ وەزارەتی سامانە سرووشتییەكان پرۆسەی چاكسازییەكە جێبەجێ دەكەن و هەردولا هەوڵدەدەین لە كەمترین ماوەدا، دۆخەكە ئاسایی ببێتەوە.
بەڵام ئومێد ئەحمەد وتەبێژی وەزارەتی كارەبا بۆ مایك ئەوەی ئاشكراكرد: بەتێكڕا ئەمڕۆ كەمتر لەكاتژمێرێك كارەبا كەمبووەتەوە، ئەویش تا ئێوارەی 19-9-2022 ئاسایی دەبێتەوە.
"هەموو رۆژێك بە ئاڕاستەی زیادكردنی بەرهەمی كارەبا كاردەكەین، تا 17 ی ئەم مانگە كە پلەكانی گەرما وەكو مانگی هەشت بووە، تێكڕای پێدانی كارەبا بە هاوڵاتیان لەهەرێمی كوردستان 15 كاتژمێر و 13 خولەك بووە، بەڵام ئەوە لەناوچەیەكەوە بۆ ناوچەیەكی دیكە گۆڕاوە، بۆ نمونە لەگەرمیان 15 كاتژمێر و 15 خولەك بووە، لە هەولێر 13 كاتژمێر و نیو بووە، بەڵام لەسلێمانی و دهۆك 16 كاتژمێر بووە". وتەبێژی وەزارەتی كارەبا وای وت.
بەوتەی ئومێد ئەحمەد بەرهەمهێنانی كارەبا لەهاوینی ئەمساڵدا 5000 مێگاواتی تێپەڕاندووە، بەڵام ئێستا كەمبووەتەوە بۆ 4500 مێگاوات.
وتەكانی وتەبێژی وەزارەتی كارەبا لەكاتێكدایە، مایك پەیوەندیكرد بە چەند خاوەن مۆلیدەیەك ئەوان دەڵێن تا 17 ی ئەم مانگە بەتێكڕا 9 كاتژمێر و نیو بۆ 10 كاتژمێر كارەبایان داوە بە هاوڵاتیان.

More News

Most Popular

هەواڵ

ئێران و توركیا بە درۆن و تۆپخانەكانیان بەردەوامن لە بۆردوومانكردنی چەند ناوچەیەكی هەرێم

Mic
2022-10-06

كاتژمێر 11:00ی پێشنیوەڕۆی ئەمڕۆ فڕۆكەی بێفڕۆكەوانی سوپای توركیا گوندی بادانەیان لە سنووری ناحیەی ناڵپارێز لە قەزای پێنجوێنی هەرێمی كوردستان بۆردوومان كردەوە و ترس و دڵەڕاوكێی زۆری لەناو گوندنشینان بڵاوكردووەتەوە، ئەمەش سێیەم جارە لەدوو رۆژی ڕابردوودا توركیا ئەو سنوورە بۆردوومان دەكات و دوێنێش گوندی شێخەلمارێنیان لە قەزای شارباژێر بۆردوومانكرد و ئۆتۆمبێلێكیان كردە ئامانج كە بەهۆیەوە كەسێك برینداربوو.
لەلایەن خۆشیانەوە فەرماندەیی یەكینەكانی ڕۆژهەڵاتی كوردستان – یەرەكە كە باڵی سەربازی پارتی ژیانی ئازادی كوردستانە ڕایگەیاند: لە ناوچەی پێنجوێن و شارباژێڕ كە لەلایەن دەوڵەتی توركیاوە بۆردومان كراوە، هیچ هێزێكی ئێمە لەو ناوچانەدا نییە.
لە ڕاگەیەندراوەكەی یەرەكەدا هاتووە: لە ڕۆژانی سێ تا شەشی ئەیلول، فڕۆكەی چاودێری بەسەر ئاسمانی چوارتا و ئاسۆس و پێنجوێندا سوڕاوەتەوە، لە كاتژمێر دووی پاش نیوەڕۆ، فڕۆكەیەكی بێفڕۆكەوان هێرشی كردە سەر ئۆتۆمبێلێكی مەدەنی لە گوندی شێخەڵمارێن.
یەرەكە دەشڵێت: لەو ناوچانەی دەوڵەتی توركیا هێرشی تێدا ئەنجامداوە هێزی ئێمەی تێدانییە و هیچ بنەكەیەكمان لەو ناوچانەدا نییە، بەهۆی ئەو هێرشانەوە هاوڵاتیان زیانیان پێگەیشتووه.
یەرەكە لەڕاگەیەندراوەكەدا دەشڵێت: هەندێك دەزگای ڕاگەیاندن بۆ ئەوەی ڕەوایەتی بە هێرشەكانی دەوڵەتی توركیا بدەن، پەكەكە و ئێمە دەكەنە ئامانج، ئێمە داوا لە دەزگاكانی ڕاگەیاندن دەكەین، لەسەر ئەو هێرشانە ڕاستییەكان بگەیەنن.
هاوكات دوێنێ ناوەندی ڕاگەیاندن و چاپەمەنیی هێزەكانی پاراستنی گەل-هەپەگە كە باڵی سەربازی پەكەكەیە ڕوونكردنەوەیەكی لەسەر بۆردوومانكردنی ئۆتۆمبێلێك لە سنووری شارباژێڕی سەر بە پارێزگای سلێمانی بڵاوكردەوە و رایگەیاند:لە هەندێك دەزگای ڕاگەیاندنی باشووری كوردستان بڵاوكرایەوە، كە لە چواری تشرینی یەكەمدا لە ناوچەی شارباژێڕی سلێمانی دەوڵەتی توركیا هێرشێكی ئاسمانی ئەنجامداوە و بانگەشەی ئەوە كرا، كە لە ئۆتۆمبێلێكدا كە هێرشی كراوەتە، سەر دوو كەسی سەر بە پەكەكە تێدابوون.
هەپەگە دەشڵێت: لەو شوێنەی هێرشەكەی تێدا ئەنجامدراوە هێزەكانی ئێمەی لێنییە و دەبێت بزانرێت، كە ئەوە هیچ پەیوەندییەكی بە ئێمەوە نییە.
پێشتریش هێمن ئیبراهیم بەڕێوەبەری ناحیەی ناڵپارێز رایگەیاند: بەهۆی مەترسی بۆردوومانەكەوە كە لەلایەن فڕۆكەوە ئەنجامدراوە، چەندین خێزان گوندەكەیان بەجێهێشتووە و روویان لە سەنتەری شاری سلێمانی كردووە.
خەڵكی ناوچەكە داوا دەكەن لایەنە پەیوەندیدارەكان بێنە سەر خەت بەهۆی مەترسیداری بۆردوومانی ناوچەكە و بەهۆی دژواری دۆخەكەوە خوێندن لە بەشێك لە ناوچەكانی سنوری پەروەردەی شارباژێڕ تا رۆژی یەكشەممە راگیراوە.
ئەمەش لەكاتێكدایە، ماوەی چەندین رۆژە بەشێوەیەكی بەردەوام فڕۆكە و درۆن بە ئاسمانی سنوری شارباژێرو پێنجوێن و چەندین ناوچەی دیكەی هەرێمدا دەسوڕێتەوە و بۆردوومانی چەندین ناوچەیان كردووە، تۆپبارانكردنی برادۆست و باڵەكایەتی لە سنووری ئیدارەی سۆرانیش لەلایەن ئێرانەوە پێینایە 13یەمین ڕۆژەوە.
بەیانی ئەمڕۆش تۆپخانەكانی ئێران لە سنووری برادۆست، كوێستانی ناوڕوبار و گوندی گۆڕێ سایە و گوندی كەتینەی تۆپباران كرد، هاوكات لە سنوری باڵەكایەتی، تۆپخانەكانی ئیران، گوندی بەردەخڕ و هاوینەهەواری بێرمەسارد و كوێستانەكانی سەرچاڵ و بناری هەڵگۆردی تۆپباران دەكەن.