هەواڵ

وردەكاری سزادانی براكەی ماریا بە 15 ساڵ و ئازادكردنی مامی

Mic
2022-09-20

پارێزەری ئیمان سامی ناسراو بە ماریا سامی رایگەیاند لەسەر دۆسیەی كوشتنی خوشكەكەی، براكەی ئیمان بە 15 ساڵ زیندانیكردن حكومدراوە و مامی ئازادكراوە.
هەرێم رەفعەت پارێزەری ئیمان سامی رایگەیاند: مامی ماریا ئازادكراوە و براكەشی سزای 15 ساڵ زیندانیكردنی بەسەردا سەپێندراوە.
پێشتر پارێزەری ماریا سامی رایگەیاند: دانیشتنی دادگایی تۆمەتبارانی كوشتنی ئەو كچە لە هەشتی مانگی پێنجی ئەمساڵ كۆتایی پێهێندراوە كە ئەوەش گومانی تێدایە.
لەلایەن خۆشیەوە دایكی ماریا  وتی: هەندێك بەڵگەی هەیە و دەیەوێت دادگا بەڵگەكان ببینێت، وتیشی كاتێك چوومەتە دادگا سوكایەتیم پێكرا و دڵنیام كوڕەكەم كەسی دیكە هاندەر بووە تا كچەكەم بكوژێت.
رۆژی چوارشەممە 14ـی ئەیلوولی 2022، پرۆسەی دادگایی كردنی كەیسی كوشتنی ئیمان سامی ناسراو بە ماریا بەڕێوەچوو، بەڵام دانیشتنەكە دواخرا بۆ 20-9-2022.
پێشتر پارێزەری كەیسەكە بە میدیاكانی راگەیاند: ئیمان سامی لە رۆژی 6ـی 3ـی 2022 لە لایەن برایەك و مامییەوە كوژرا، دواتر زانیمان كەم و كوری لە پەراوی لێكۆڵینەوەدا هەبووە چونكە رۆژی 8ـی 5ـی 2022 كۆتایی بە پەراوی لێكۆڵینەوە هاتووە كە نەدەبوو بابەتێكی وا هەستیار بەو ماوە كەمە تەواو ببێت.
هەرێم رەفعەت وتیشی: ئاگاداری بریاری دادگا نەبووین كە ئەمرۆ بێ ئاگاداری ئێمە كاتی دادگاییكردنەكە گۆرابوو كە بریاربوو 25ـی مانگ بەرێوەبچێت، گومانەكەمان لەوەدایە كە ئەم كەیسە دەستێوەردانی تێداكراوە و بابەتەكانی بە كەم و كوری ئەنجامدراون.
وەك پارێزەرەكەی وتی: دەبوو نوێنەری رێكخراوی ئافرەتان لە دادگایی كردنەكە ئامادەبێت، بەڵام هیچ رێكخراوێكی ژنان و مافی مرۆڤ لە دادگایی كردنەكە ئامادە نەبوون.
ئیمان سامی مەغدید، كە بە ماریا ناسرابوو، ڤیدیۆكانی لە تیكتۆك بە سەدان هەزار بینەریان هەبوو، بۆیە زۆرجار بەهۆی قسەكان و ئەو رەخنانەی لە كولتووری كۆمەڵایەتی دەیگرت، تووشی رەخنە و هەڕەشە دەبووەوە.
 دواجار لە بەرواری 6ـی 3ـی 2022، كاتژمێر 11:00ی شەوی یەكشەممە لە شەقامی 100 مەتری لە نزیك چوارڕییانی فڕۆكەخانەی نێودەوڵەتیی هەولێر تەرمەكەی دۆزرایەوە.
دواتر مامی و برایەكی بە كوشتنی تۆمەتباركران و كەیسەكەشی دەنگدانەوەی بەدوای خۆیدا هێنا.

More News

Most Popular

هەواڵ

ئێران و توركیا بە درۆن و تۆپخانەكانیان بەردەوامن لە بۆردوومانكردنی چەند ناوچەیەكی هەرێم

Mic
2022-10-06

كاتژمێر 11:00ی پێشنیوەڕۆی ئەمڕۆ فڕۆكەی بێفڕۆكەوانی سوپای توركیا گوندی بادانەیان لە سنووری ناحیەی ناڵپارێز لە قەزای پێنجوێنی هەرێمی كوردستان بۆردوومان كردەوە و ترس و دڵەڕاوكێی زۆری لەناو گوندنشینان بڵاوكردووەتەوە، ئەمەش سێیەم جارە لەدوو رۆژی ڕابردوودا توركیا ئەو سنوورە بۆردوومان دەكات و دوێنێش گوندی شێخەلمارێنیان لە قەزای شارباژێر بۆردوومانكرد و ئۆتۆمبێلێكیان كردە ئامانج كە بەهۆیەوە كەسێك برینداربوو.
لەلایەن خۆشیانەوە فەرماندەیی یەكینەكانی ڕۆژهەڵاتی كوردستان – یەرەكە كە باڵی سەربازی پارتی ژیانی ئازادی كوردستانە ڕایگەیاند: لە ناوچەی پێنجوێن و شارباژێڕ كە لەلایەن دەوڵەتی توركیاوە بۆردومان كراوە، هیچ هێزێكی ئێمە لەو ناوچانەدا نییە.
لە ڕاگەیەندراوەكەی یەرەكەدا هاتووە: لە ڕۆژانی سێ تا شەشی ئەیلول، فڕۆكەی چاودێری بەسەر ئاسمانی چوارتا و ئاسۆس و پێنجوێندا سوڕاوەتەوە، لە كاتژمێر دووی پاش نیوەڕۆ، فڕۆكەیەكی بێفڕۆكەوان هێرشی كردە سەر ئۆتۆمبێلێكی مەدەنی لە گوندی شێخەڵمارێن.
یەرەكە دەشڵێت: لەو ناوچانەی دەوڵەتی توركیا هێرشی تێدا ئەنجامداوە هێزی ئێمەی تێدانییە و هیچ بنەكەیەكمان لەو ناوچانەدا نییە، بەهۆی ئەو هێرشانەوە هاوڵاتیان زیانیان پێگەیشتووه.
یەرەكە لەڕاگەیەندراوەكەدا دەشڵێت: هەندێك دەزگای ڕاگەیاندن بۆ ئەوەی ڕەوایەتی بە هێرشەكانی دەوڵەتی توركیا بدەن، پەكەكە و ئێمە دەكەنە ئامانج، ئێمە داوا لە دەزگاكانی ڕاگەیاندن دەكەین، لەسەر ئەو هێرشانە ڕاستییەكان بگەیەنن.
هاوكات دوێنێ ناوەندی ڕاگەیاندن و چاپەمەنیی هێزەكانی پاراستنی گەل-هەپەگە كە باڵی سەربازی پەكەكەیە ڕوونكردنەوەیەكی لەسەر بۆردوومانكردنی ئۆتۆمبێلێك لە سنووری شارباژێڕی سەر بە پارێزگای سلێمانی بڵاوكردەوە و رایگەیاند:لە هەندێك دەزگای ڕاگەیاندنی باشووری كوردستان بڵاوكرایەوە، كە لە چواری تشرینی یەكەمدا لە ناوچەی شارباژێڕی سلێمانی دەوڵەتی توركیا هێرشێكی ئاسمانی ئەنجامداوە و بانگەشەی ئەوە كرا، كە لە ئۆتۆمبێلێكدا كە هێرشی كراوەتە، سەر دوو كەسی سەر بە پەكەكە تێدابوون.
هەپەگە دەشڵێت: لەو شوێنەی هێرشەكەی تێدا ئەنجامدراوە هێزەكانی ئێمەی لێنییە و دەبێت بزانرێت، كە ئەوە هیچ پەیوەندییەكی بە ئێمەوە نییە.
پێشتریش هێمن ئیبراهیم بەڕێوەبەری ناحیەی ناڵپارێز رایگەیاند: بەهۆی مەترسی بۆردوومانەكەوە كە لەلایەن فڕۆكەوە ئەنجامدراوە، چەندین خێزان گوندەكەیان بەجێهێشتووە و روویان لە سەنتەری شاری سلێمانی كردووە.
خەڵكی ناوچەكە داوا دەكەن لایەنە پەیوەندیدارەكان بێنە سەر خەت بەهۆی مەترسیداری بۆردوومانی ناوچەكە و بەهۆی دژواری دۆخەكەوە خوێندن لە بەشێك لە ناوچەكانی سنوری پەروەردەی شارباژێڕ تا رۆژی یەكشەممە راگیراوە.
ئەمەش لەكاتێكدایە، ماوەی چەندین رۆژە بەشێوەیەكی بەردەوام فڕۆكە و درۆن بە ئاسمانی سنوری شارباژێرو پێنجوێن و چەندین ناوچەی دیكەی هەرێمدا دەسوڕێتەوە و بۆردوومانی چەندین ناوچەیان كردووە، تۆپبارانكردنی برادۆست و باڵەكایەتی لە سنووری ئیدارەی سۆرانیش لەلایەن ئێرانەوە پێینایە 13یەمین ڕۆژەوە.
بەیانی ئەمڕۆش تۆپخانەكانی ئێران لە سنووری برادۆست، كوێستانی ناوڕوبار و گوندی گۆڕێ سایە و گوندی كەتینەی تۆپباران كرد، هاوكات لە سنوری باڵەكایەتی، تۆپخانەكانی ئیران، گوندی بەردەخڕ و هاوینەهەواری بێرمەسارد و كوێستانەكانی سەرچاڵ و بناری هەڵگۆردی تۆپباران دەكەن.