تەندروستی

دواین زانیاری لەبارەی تەندروستی ئەو 100 خوێندكارەی لەسلێمانی تووشی سكچوون بوون

بەهۆی  نەخۆشكەوتن و ژەهراوی بوونی بەشێك لە خوێندكارەكانی،فرۆشگای قوتابخانەی نەهرۆ لە گەڕەكی هەواری شاری سلێمانی دادەخرێت، و قایمقامیەتی سلێمانیش لە رێگەی لیژنەی دایەنگەو باخچەو خوارنگەی قوتابخانەكانەوە چاودێری زیاتری فرۆشگای قوتابخانە حكومی و تایبەتەكان دەكات.

پاش ئەوەی ژمارەیەک خوێندکار بەهۆی خواردنی ناتەندروستی خواردنگەی قوتابخانەی نەهرۆ لە گەرەکی هەواری شاری سلێمانی دوچاری نەخۆشی و ژەهراویبوون بە خۆراک هاتبوون،  لیژنەی دایەنگەو باخچە و فرۆشگای قوتابخانەکانی سەر بە لیژنە هاوبەشەکانی قایمقامیەتی سلێمانی سەردانی قوتابخانەکەیان کرد و لە نزیکەوە بەدواداچونیان بۆ حاڵەتەکە کرد، و لە هۆکارەکانی ژەهراویبوونی خوێندکارەکانیان کۆڵیەوە و دەرکەوت بەهۆی کەمتەرخەمی و پابەند نەبوونی فرۆشگاکە بووە بە مەرج و رێنماییە تەندروستیەکانەوە.
لەبارەی چۆنیەتی چاودێریکردن و بەدواداچوونکردن بۆ حاڵەتەکەش، بەهار رەمەزان سەرۆکی لیژنەی چاودێریکردنی دایەنگەو باخچەو فرۆشگای قوتابخانەکان رایگەیاند: لە سەردانەکەی ئەمرۆدا بۆ قوتابخانەی نەهرۆ  لیژنەکە رێنمایی پێویستی داوە بە ستافی فرۆشگای  قوتابخانەکە و ئاگاداریان کردونەتەوە کە پابەندی رێنماییە تەندروستیەکان بن، وتیشی پێیان راگەیاندون  لە ئەگەری دووبارە کردنەوەیدا فرۆشگاکە رووبەرووی سزای دارایی و یاسایی دەبنەوە، ئەوەشی خستە روو کە فرۆشگای قوتابخانەکە لە لایەن لیژنەکانی بەرێوەبەرایەتی تەندروستی سلێمانیەوە داخراوە.

سامان شێخ لەتیف بەڕێوەبەری راگەیاندن و پەیوەندیەكانی بەڕێوەبەرایەتیی گشتیی تەندروستیی سلێمانی، پێشتر بە مایكی وت: لە 24 سەعاتی رابردوودا نزیكەی 100 خوێندكار لە یەك قوتابخانەی شاری سلێمانی، توشی سكچوون و رشانەوە بوون و رەوانەی نەخۆشخانەی د.جەمال ئەحمەد رەشیدی تایبەت بە منداڵان كراون.
وتیشی: بە مەبەستی بەدواداچوونی ئەو حاڵەتە، بەڕێوەبەری گشتیی تەندروستی لیژنەیەكی تایبەتی لە چاودێری تەندروستی و یەكەی ئاو و تەندروستیی خوێندنگاكان  راسپاردووە، بەدواداچوون بكەن بۆ دۆزینەوەی حاڵەتەكان و نمونەی خۆراك و ئاو بۆ پشكنینی تاقیگەیی وەربگرن. 
د.پشدەر عەبدوڵا بەڕێوەبەری نەخۆشخانەی منداڵانی سلێمانی بەمایكی وت: بەشێكی زۆری ئەو منداڵانە باری تەندروستییان باشە و ڕەوانەی ماڵەوە كراونەتەوە، قوتابخانەكانیشمان ئاگاداركردووەتەوە كە پاكوخاوێنی بپارێزن و كاری پێویست بكەن، لیژنەیەكی تەندروستیش ئەمڕۆ لە دۆخەكە دەكۆڵێتەوە.

هەواڵ

لە قەڵادزێ بەڕێکەوت و لە فەرەنسا خنکا

لە قەڵادزێ بەڕێکەوت و لە فەرەنسا خنکا
سلێمانی - MIC
ژیلان محەمەد ئەمین، کچە کوردێکی تەمەن 24 ساڵە و یەکێکە لە قوربانییەکانی رووداوەکەی دوێنێ سێشەممەی نێوان فەرەنسا و بەریتانیا.
ژیلان لەگەڵ چەند کەسێکی دیکەدا و یەکێک بووە لەو 100 سەرنشینەی کە لەناو بەلەمێکی پەڕینەوەدابوون لە فەرەنساوە بۆ بەریانیا.
بەڵام پێش گەیشتنیان چەند کەسێک دەکەونە ناو ئاوەکەوەو دەخنکێن کە یەکێکیان ژینایە.
زانیاری ئەوە هەیە، رووداوەکە بەهۆی زۆری ژمارەی سەرنشینانی سەر بەلەمەکەوە بوبێت، بەتایبەت کاتێک کە بەلەمەکە کەوتوەتە ڕێ، ژمارەیەک کۆچبەری ئەفریقیش لەڕێگەی بەکارهێنانی فشارەوە چونەتە ناو بەلەمەکەوە و هەندێکیش دەڵێن شەڕ و ئاڵۆزی روویداوە.
هێشتا بەتەواوی هۆکاری خنکانی ژیلان و ئەوانی دیکە نییە، روونیش نییە کە ئاخۆ جگە لە ژیلان لەناو خنکاوەکاندا کوردی دیکە هەیە یان نا، بەڵام ئەوەی دەزانرێت کە بەشێکی زۆری کۆچبەرەکانی سەر بەلەمەکە عێراقی بوون و لەناو عێراقیەکانیشدا ژمارەیەک کورد هەبوون.
تائێستا نازانرێت کە ئاخۆ ژیلان محەمەد بەتەنها کۆچیکردوە یان خزم و کەسوکاری لەگەڵدا بووە.
ساڵانە لەکاتی پەڕێنەوەی کۆچبەران لەنێوان فەرەنسا بۆ بەریتانیا دەیان کۆچبەر دەخنکێن، ئەوەش لەپێناو گەیشتنیان بۆ ئەو وڵاتە و مافی بەدەستهێنانی مانەوەیان.
هەرچەندە لەچەند رۆژی رابردوودا پەرلەمانی بەریتانیا یاسای ناردنی کۆچبەرانی نایاسایی وڵاتەکەی بۆ رواندا پەسەند کرد ئەوەش وەک هەولیک بۆ رێگریکردن لە چوونی کۆچبەران بۆ ئەو وڵاتە، بەڵام لەگەڵ ئەوەشدا هێشتا کۆچبەران بە یەکێک لە وڵاتە دڵخوازەکەی خۆیان دەزانن بۆ مانەوەیان و وەرگرتنی مافی پەنابەری.