لەبارەی بەشە خۆراكی هاوڵاتیان دابەشكردنی خۆراك و چاودێری بازرگانی سلێمانی ڕوونكردنەوە دەدەن

بەڕێوەبەرایەتی دابەشكردنی خۆراك لەسلێمانی و چاودێری بازرگانی ڕوونكردنەوە لەبارەی ئەو بەشە خۆراكە دەدەن كە وەزارەتی بازرگانی عێراق دەینێرێت و دەڵێن جۆرەكەی باشە و هیچ گرفتێكی نییە.
شەوكەوت محەمەد بەڕێوەبەری خۆراكی سلێمانی لەلێدوانێكی رۆژنامەوانیدا رایگەیاند: لەسنوری پارێزگای سلێمانی دوو ملیۆن و 50 هەزار كەس خۆراك وەردەگرێت، سێ هەزار و 450 بریكاری خۆراكمان هەیە، مانگانە كە خۆراك دێت 14 هەزار و 500 تا 15 هەزار تۆن خۆراكە، ماددەكانیش شەش تا حەوت ماددەیە.
وتیشی: ماددەكان بریتین لە سێ كیلۆگرام برنج و یەك كیلۆ گرام شەكر و لیترێك زەیت لەگەڵ 500 گرام فاسۆلیا، لەگەڵ 500 گرام لەتكە نۆك و 500 گرام نیسك لەگەڵ 400 گرام دۆشاوی تەماتە، هەموو هاوڵاتییەك مانگانە وەریدەگرێت، سنووری بەرێوەبەرایەتی خۆراكی سلێمانی فراوانە و لە دوو پارێزگاو دوو ئیدارە پێكدێت، ئەو پشكەی كە لەلایەن وەزارەتی بازرگانی عێراقەوە بۆمان دابین دەكرێت و وەكو پارێزگاكانی دیكەی عێراقە.
بەوتەی بەڕێوەبەری خۆراكی سلێمانی لەعێراق چی ماددەیەكی خۆراكی بدرێتە هاوڵاتیان لەهەرێمی كوردستانیش هەمان ماددەیە و ئێستا خۆراكی شەش مانگ دابەشكراوە و لەمانگی حەوتەمی ئەمساڵداین و تائێستا زیاتر لە 75 هەزارتۆن خۆراكمان دابەشكردووە.
هاوكات سۆران عەبدولغەفور بەڕێوەبەری چاودێری بازرگانی سلێمانی ڕایگەیاند: داوا لەپەرلەمانتاران و چالاكوانان دەكەین كە ڕەخنەكانمان پێبڵێن نەك خۆیان بڵاویبكەنەوە، ئەو برنجەشی دابەشكراوە تائێستا هیچ كێشەیەكی نەبووە.
وتیشی: ئەو پشكنینەی حكومەت دەیكات و پشكنینی ئێمەش دەكرێت واتە دووجۆرە پشكنین بۆ خۆراك دەكرێت، بۆیە بەهیچ شێوەیەك ئەو دەنگۆیانە ڕاست نییە كە دەڵێت ماددە خۆراكیەكان باش نییە، بۆ نمونە ئەو ئاردەی گوایە بەكەڵك نایەت هەر بەشێك لە بازرگانەكان ئەو دەنگۆیە بڵاودەكەنەوە و دواتر خۆیان دەیكڕنەوە و دەشخورێت هیچ كێشەی نییە.

هەواڵ

ئێران و توركیا بە درۆن و تۆپخانەكانیان بەردەوامن لە بۆردوومانكردنی چەند ناوچەیەكی هەرێم

كاتژمێر 11:00ی پێشنیوەڕۆی ئەمڕۆ فڕۆكەی بێفڕۆكەوانی سوپای توركیا گوندی بادانەیان لە سنووری ناحیەی ناڵپارێز لە قەزای پێنجوێنی هەرێمی كوردستان بۆردوومان كردەوە و ترس و دڵەڕاوكێی زۆری لەناو گوندنشینان بڵاوكردووەتەوە، ئەمەش سێیەم جارە لەدوو رۆژی ڕابردوودا توركیا ئەو سنوورە بۆردوومان دەكات و دوێنێش گوندی شێخەلمارێنیان لە قەزای شارباژێر بۆردوومانكرد و ئۆتۆمبێلێكیان كردە ئامانج كە بەهۆیەوە كەسێك برینداربوو.
لەلایەن خۆشیانەوە فەرماندەیی یەكینەكانی ڕۆژهەڵاتی كوردستان – یەرەكە كە باڵی سەربازی پارتی ژیانی ئازادی كوردستانە ڕایگەیاند: لە ناوچەی پێنجوێن و شارباژێڕ كە لەلایەن دەوڵەتی توركیاوە بۆردومان كراوە، هیچ هێزێكی ئێمە لەو ناوچانەدا نییە.
لە ڕاگەیەندراوەكەی یەرەكەدا هاتووە: لە ڕۆژانی سێ تا شەشی ئەیلول، فڕۆكەی چاودێری بەسەر ئاسمانی چوارتا و ئاسۆس و پێنجوێندا سوڕاوەتەوە، لە كاتژمێر دووی پاش نیوەڕۆ، فڕۆكەیەكی بێفڕۆكەوان هێرشی كردە سەر ئۆتۆمبێلێكی مەدەنی لە گوندی شێخەڵمارێن.
یەرەكە دەشڵێت: لەو ناوچانەی دەوڵەتی توركیا هێرشی تێدا ئەنجامداوە هێزی ئێمەی تێدانییە و هیچ بنەكەیەكمان لەو ناوچانەدا نییە، بەهۆی ئەو هێرشانەوە هاوڵاتیان زیانیان پێگەیشتووه.
یەرەكە لەڕاگەیەندراوەكەدا دەشڵێت: هەندێك دەزگای ڕاگەیاندن بۆ ئەوەی ڕەوایەتی بە هێرشەكانی دەوڵەتی توركیا بدەن، پەكەكە و ئێمە دەكەنە ئامانج، ئێمە داوا لە دەزگاكانی ڕاگەیاندن دەكەین، لەسەر ئەو هێرشانە ڕاستییەكان بگەیەنن.
هاوكات دوێنێ ناوەندی ڕاگەیاندن و چاپەمەنیی هێزەكانی پاراستنی گەل-هەپەگە كە باڵی سەربازی پەكەكەیە ڕوونكردنەوەیەكی لەسەر بۆردوومانكردنی ئۆتۆمبێلێك لە سنووری شارباژێڕی سەر بە پارێزگای سلێمانی بڵاوكردەوە و رایگەیاند:لە هەندێك دەزگای ڕاگەیاندنی باشووری كوردستان بڵاوكرایەوە، كە لە چواری تشرینی یەكەمدا لە ناوچەی شارباژێڕی سلێمانی دەوڵەتی توركیا هێرشێكی ئاسمانی ئەنجامداوە و بانگەشەی ئەوە كرا، كە لە ئۆتۆمبێلێكدا كە هێرشی كراوەتە، سەر دوو كەسی سەر بە پەكەكە تێدابوون.
هەپەگە دەشڵێت: لەو شوێنەی هێرشەكەی تێدا ئەنجامدراوە هێزەكانی ئێمەی لێنییە و دەبێت بزانرێت، كە ئەوە هیچ پەیوەندییەكی بە ئێمەوە نییە.
پێشتریش هێمن ئیبراهیم بەڕێوەبەری ناحیەی ناڵپارێز رایگەیاند: بەهۆی مەترسی بۆردوومانەكەوە كە لەلایەن فڕۆكەوە ئەنجامدراوە، چەندین خێزان گوندەكەیان بەجێهێشتووە و روویان لە سەنتەری شاری سلێمانی كردووە.
خەڵكی ناوچەكە داوا دەكەن لایەنە پەیوەندیدارەكان بێنە سەر خەت بەهۆی مەترسیداری بۆردوومانی ناوچەكە و بەهۆی دژواری دۆخەكەوە خوێندن لە بەشێك لە ناوچەكانی سنوری پەروەردەی شارباژێڕ تا رۆژی یەكشەممە راگیراوە.
ئەمەش لەكاتێكدایە، ماوەی چەندین رۆژە بەشێوەیەكی بەردەوام فڕۆكە و درۆن بە ئاسمانی سنوری شارباژێرو پێنجوێن و چەندین ناوچەی دیكەی هەرێمدا دەسوڕێتەوە و بۆردوومانی چەندین ناوچەیان كردووە، تۆپبارانكردنی برادۆست و باڵەكایەتی لە سنووری ئیدارەی سۆرانیش لەلایەن ئێرانەوە پێینایە 13یەمین ڕۆژەوە.
بەیانی ئەمڕۆش تۆپخانەكانی ئێران لە سنووری برادۆست، كوێستانی ناوڕوبار و گوندی گۆڕێ سایە و گوندی كەتینەی تۆپباران كرد، هاوكات لە سنوری باڵەكایەتی، تۆپخانەكانی ئیران، گوندی بەردەخڕ و هاوینەهەواری بێرمەسارد و كوێستانەكانی سەرچاڵ و بناری هەڵگۆردی تۆپباران دەكەن.