تەندروستی

لەهەولێر سەنتەرێكی تایبەت بە چاندنی ئەندامانی جەستەی مرۆڤ دەكرێتەوە

وەزارەتی تەندروستی حكومەتی هەرێمی كوردستان رایگەیاند سەنتەرێكی تایبەت بە نەشتەرگەری چاندنی ئەندامانی لەشی مرۆڤ لە هەولێر دەكاتەوە.
وەزارەتی تەندروستی لە راگەیەندراوێكدا رایگەیاند، لەسەر راسپاردەی د. سامان بەرزنجی، وەزیری تەندروستی حكومەتی هەرێمی كوردستان بە مەبەستی ئامادەكاری بۆ كردنەوەی سەنتەرێكی تایبەت بە نەشتەرگەری چاندنی ئەندامانی لەشی مروڤ لە شاری هەولێر تیمێكی تایبەت سەردانی نەخۆشخانەی رزگاری كرد.
لە راگەیەندراوەكەدا هاتووە: د. عەبدوڵڵا سەعید، راوێژكاری وەزارەتی تەندروستی، د. دلۆڤان محەمەد، بەرێوەبەری گشتی تەندروستی هەولێر و د. هونەر مستەفا، پزیشكی تایبەتمەندی بێ هۆشكاری سەردانی نەخوشخانەی رزگاریان كرد لە شاری هەولێر و لەگەڵ بەرێوەبەری نەخۆشخانە و كۆمەڵێك پزیشكی تایبەتمەند و ستافی كارگێری نەخوشخانە بۆ تاوتوێكردنی بابەتی پروژەی كردنەوەی سەنتەرێكی تایبەت بە نەشتەرگەری چاندنی ئەندامانی لەشی مرۆڤ كۆبوونەوە.
وەزارەتی تەندروستی دەشڵێت: د. عەبدوڵڵا سەعید، سەرپەرشتیاری پروگرامی بەخشین و چاندنی ئەندامانی لەشی مرۆڤ لە هەرێمی كوردستان دوای سەردانیكردنی مەیدانی بۆ ئەو باڵەخانەیەی بۆ پرۆژەكە پێشنیاركراوە. جەختیكردەوە، باڵەخانەكە بۆ ئەو پرۆژەیە گونجاوە و بڕیاردرا بە زووترین كات تیمێكی تایبەتی پزیشكی، ئەندازیاری و تەكنیكی لە بەرێوەبەرایەتی گشتی تەندروستی هەولێر سەردانی شوێنی پروژەكە بكەن و كاری پێویست بو نوژەنكردنەوە و دابینكردنی كەلوپەل و ئامێری پزیشكی لە لایەن وەزارەتی تەندروستی حكومەتی هەرێمی كوردستان ئەنجامبدرێت بۆ بە گەرخستنی سەنتەرەكە بۆ خزمەتكردنی زیاتری هاوڵاتییانی هەرێمی كوردستان.

هەواڵ

راپرسییەک بۆ پێوانەکردنی ئاستی دابڕانی کلتوریی لە هەرێمی کوردستان

دامەزراوەی ڤیژن فاوندەیشن، بۆ لێکۆڵینەوەی ستراتیژی، کار لەسەر پرۆژەیەک دەکات بۆ پێوانەکردنی ئاستی دابڕانی کلتوریی لە ناوچە جیاجیاکانی لە هەرێمی کوردستان، بۆ ئەومەبەستە فۆرمێکی ئەلیکترۆنی بڵاودەکاتەوە.

لە پێناسەی پرۆژەکەدا دامەزراوەی ڤیژن ئاماژە بەوەدەکەن، "کۆمەڵگای کوردستانی لە هەرێمی کوردستان سەرەڕای بوونی ژێرخانێکی دەوڵەمەندی کلتووری و تۆڕێک پەیوەندی هەمەجۆر لەناو کۆمەڵگاکەماندا، بەڵام هێشتا بەربەست و گرفتی گەورەی ناوخۆیی و بگرە جۆرێک لەدابڕانی کلتوریش هەیە، کە دەکرێ وەکو مەترسی سەیر بکرێ، بۆ هاوبەشی و یەکگرتویی کۆمەڵگا".

ئاماژە بەوەکراوە کە ئەو ناوچانەی هەرێمی کوردستان کە بە "شێوەزاری بادینی" دەدوێن و دەنوسن و دەخوێننەوە، لەگەڵ ئەو ناوچانەی کە بە "سۆرانی" دەدوێن و دەنوسن و دەخوێننەوە دابڕانە کلتورییەکە زیاتر بەدیدەکرێت.

ئامانجی پرۆژەکە دەرخستنی راستی و روونی و قەبارەی ئەو دابڕانە کلتووریەی لە نێوان ناوچە جیاوازەکانی هەرێمی کوردستاندا هەن، بۆ دەستنیشانکردنی بەربەست و رێگرییەکانی بەردەم ئاڵوگۆڕی کلتوورییە.

بەپێی پرۆژەکەی دامەزراوەی ڤیژن، لەکۆتاییدا پەڕاوێکی پێشنیاز بۆ حکومەتی هەرێمی کوردستان و پەرلەمان ئامادەدەکرێت و لەپێناوی "گەشەپێدانی کلتووری و چارەسەرکردنی گرفت و لابردنی بەربەستەکان". 

لێرە دەتوانیت فۆرمەکە پڕبکەیتەوە:

https://docs.google.com/forms/d/e/1FAIpQLSdJmmTCgpRhFI-5XhJlNMNmci6tLRQdgDAm7DtiRf_pbr5sHw/viewform?pli=1