هەواڵ

هێرشی توركیا بۆسەر هەرێم و رۆژئاوای كوردستان دەستيپێكرد

درەنگانی شەوی ڕابردوو فڕۆكە جەنگییەكانی توركیا چەندین ناوچەی جیاوازی باشور و ڕۆژئاوای كوردستانیان بۆردومان كرد و بەپێی زانیارییە سەرەتاییەكان ژمارەیەك شەهید و بریندار هەن، وەزارەتی بەرگری توركیاش دەڵێت "ئۆپراسیۆنی سەربازیی توركیا لە باكووری سووریا بە پێی جاڕنامەی نەتەوەیەكگرتووەكانە".
ئاژانسی فوڕات نیوز بڵاویكردەوە: لە كاتژمێر 12ی شەوی ڕابردوەوە فڕۆكە جەنگییەكانی توركیا چەندین ناوچەی جیاوازی باشور و ڕۆژئاوای كوردستانیان بۆردومان كردووە،لە بەشێكی دیكەی هەواڵەكەدا ئەوەخراوەتەڕوو: لە ئەنجامی ئەو بۆردومانانەی فڕۆكە جەنگیەكانی توركیا بۆسەر ناوچەكانی باشور و ڕۆژئاوای كوردستان دوو شەڕڤانی هەسەدە لە دێرك شەهیدبوون و چوار سەربازی سوریاش لە شەهبا كوژراون.
بەپێی زانیارییەكان فرۆكە جەنگیەكانی توركیا، لە ڕۆژئاوای كوردستان بۆردومانی هەریەكە لە ناوچەكانی كۆبانێ، شەهبا، گرێ سپی، درباسیەی، دێرك كردووە و لە هەمانكاتدا وێستگەی كارەبای دێرك كراوەتە ئامانج و زیانی زۆری بەركەوتووە و لە ئێستاشدا وێستگەكە لە كاركەوتووە.

ئەمرۆ میدیاكانی رۆژئاوای كوردستان بڵاویانكردەوە: لە ئەنجامی هێرشەكانی فڕۆكە جەنگییەكانی توركیا بۆ سەر ناوچەكانی باكوور و ڕۆژهەڵاتی سووریا ١١ هاوڵاتی و پەیامنێرێكی ئاژانسی هاوار نیوز شەهید بوون و ١٤ سەربازی حكومەتی سووریاش گیانیان لەدەستداوە.
بەپێی ئامارەكە، لە ئەنجامی بۆردوومانەكانی فڕۆكە جەنگییەكانی توركیا، كە ناوچەكانی دێرك، زرگان، گرێسپی، كۆبانێ و شەهبای كردە ئامانج، ١١ هاوڵاتی و پەیامنێرێكی ئاژانسی هاوار نیوز بە ناوی ” عیسام عەبدوڵا “شەهید بوون، هەروەها شەش هاوڵاتی و پەیامنێرێكی ستێرك تیڤی-یش بەناوی “محەمەد جەراد” برینداربوون.
هەروەها، لە باشوری كوردستان هەریەكە لە ناوچەكانی چیای قەرەچووخ، زركان، بناری قەندیل، چیای ئاسۆس و چەند ناوچەیەكی ژێردەسەڵاتی پەكەكە لەلایەن فڕۆكە جەنگیەكانی توركیاوە كراونەتە ئامانج .
لەبارەی هێرشەكانەوە  وەزارەتی بەرگری توركیا ئاشكرایكرد "ئۆپراسیۆنی ئاسمانی توركیا لە دژی هەڵوێستی هێزەكانی یەكنیەكانی پاراستنی گەل یەپەگە، لە باكووری سووریا بە پێی بنەمای مافی بەرگری لە خۆكردن و مادەی 51 ی جاڕنامەی نەتەوەیەكگرتووەكان ئەنجام دەدرێت".
پێشتر توركیا چەندین جار هەڕەشەی ئەنجامدانی هێرشی سەربازی بۆ سەر رۆژئاوا و باشووری كوردستان كردووە، تائێستا بەشێك لەرۆژئاوای كوردستان لەژێر دەسەڵاتی سوپا و گروپە لایەنگرەكانی توركیان لەسوریا، لەهەرێمی كوردستانیش توركیا تائێستا چەندین ئۆپەراسیۆنی سەربازی بۆ سەر پەكەكە ئەنجامداوە و لەقوڵایی هەرێمی كوردستان چەندین بارەگای سەربازی دروستكردووە.

هەواڵ

Mic Exclusive : دەسەڵاتی تەمویلی مووچە لە بانکی ناوەندی هەرێم/ سلێمانی سەندرایەوە

وەزارەتی دارایی و ئابوری دەسەڵاتی تەمویلی مووچە لە بانکی ناوەندی هەرێم/ سلێمانی سەندەوە و وەزیری دارایی دەڵێت، "نابێت لە ژێر هیچ بیانوویەکدا پارەی تەرخانکراو بۆ مووچە بۆ هیچ بوارێکی تر بەکاربهێنرێت"

 بەپێی ئەو زانیارییانەی دەست دیجیتاڵ میدیای Mic کەوتوون، بە بڕیاری ئاوات شێخ جەناب وەزیری دارایی و ئابوری هەرێمی کوردستان دەسەڵاتی تەمویلی مووچە لە بانکی ناوەندی هەرێم/ سلێمانی وەرگیراوەتەوە.

هەر بەپێی زانیارییەکان، تەمویلی مووچە لە بانکی ناوەندی هەرێم/ سلێمانی-ـەوە گواستراوەتەوە بۆ بانکی ئاشتی لە سلێمانی لەمەودوا لەو بانکەوە تەمویلی پارەی مووچەخۆرانی سلێمانی دەکرێت.
دیجیتاڵ میدیای Mic، قسەی لەگەڵ بەرپرسانی بانکی ناوەندی هەرێم/ سلێمانی کردووە، لەگەڵ پشتراستکردنەوەی هەواڵەکەدا پابەندی خۆشیان بە بڕیارەکانی وەزارەتیی دارایی و ئابورییەوە راگەیاند.

بەپێی بڕیارەکەی وەزارەتی دارایی و ئابوری، تەمویلی موچەی موچەخۆران و فەرمانبەران راستەوخۆ لە بانكی منارەوە دەنێردرێت بۆ بانكی ئاشتی لەوێشەوە بۆ بانكەكانی سنوری پارێزگای سلێمانی و هەڵەبجە و ئیدارەكانی راپەڕین و گەرمیان.

بەپێی بەدواداچوونەکان، هۆکاری بڕیارەکەی وەزارەتی دارایی و ئابوری هەرێمی کوردستان بۆ ئەو کێشانەی رابردووی دەگەڕێتەوە کە لە بانکی ناوەندی هەرێم/ سلێمانی بۆ دابەشکردنی مووچە دروست بووە، لەناویاندا دەستکاریکردنی پارەی نەختینەیی مووچە. 

رۆژی 18ـی ئازاری 2025، ئاوات شێخ جەناب وەزیری دارایی و ئابوری لە کۆبونەوەی لەگەڵ بەڕێوەبەری بانکەکان و گەنجینەکانی سنوری پارێزگای سلێمانی و هەڵەبجەو ئیدارەی گەرمیان و ڕاپەڕین رایگەیاند، نابێت لە هیچ بانکێک کێشە و گرفت بۆ هاووڵاتیان و فەرمانگەکان و بەڵێندەران دروست بکرێت، بەپێچەوانەوە هەر کێشەیەکی نەخوازراو بەدەر لە یاسا و ڕێنماییەکان دروست بکرێت ئیجرائاتی پێویست لەگەڵ بەڕێوەبەری بانکەکان دەکرێت.                

هەر لەو کۆبونەوەیەدا بڕیاردرا نابێت لە هیچ بانکێک دەستکاری پارەی هاووڵاتیان ( ئەمانات، وەدائیع، توفیر، هتد) بکرێت بەپێچەوانەوە ڕووبەڕووی لێپرسینەوەی یاسایی دەبنەوە.      
بڕیاردریش درا، بەهیچ جۆرێک نابێت لە ژێر هیچ بیانوویەکدا پارەی تەرخانکراو بۆ مووچە بۆ هیچ بوارێکی تر بەکاربهێنرێت، لە حاڵەتی دووبارە بوونەوەی سەرپێچیەکان و هەرکەس و لایەنێک پێچەوانەی ئەم ڕێنماییانە جوڵایەوە،ڕێکاری پێویستی لە دژ دەگیرێتبەر بگرینەبەر.   

پێشتر، بانکەکان دەسەڵاتیان هەبووە بڕی دیاریکراو خەرج بکەن، بەڵام ئێستا ئەو دەسەڵاتە لێیان سەندراوەتەوە و دەبێت راپۆرتی هەفتانە رادەستی وەزارەتی دارایی بکەن.