هەواڵ

لەسەرەتای خۆپیشاندانەكانەوە زیاتر لە 100 هاوڵاتی رۆژهەڵاتی كوردستان كوژراون

Mic
2022-11-23

شەوی رابردوو لە هەندێ لە شارەكانی رۆژهەڵاتی كوردستان و ئێران خۆپێشاندان بەڕێوەچوو، لەرۆژهەڵاتی كوردستان خۆپێشاندانی بەرفراوان لە شارەكانی مەریوان و دێولان لە پارێزگای سنە و سەلاسی باوەجانی لە پارێزگای كرماشان بەڕێوەچوو. 
 هەر شەوی رابردوو لە چەند شارێكی ئێران خەڵكی رژانە سەر شەقامەكان، لەوانەش لە شاری ئەندیمشك لە پارێزگای خوزستان، مەشهەد لە پارێزگای خوراسان، زاهیدان لە پارێزگای سیستان و بەلوجستان، تاران و كەرەج. 
بە گوێرەی سەرچاوە خۆجێییەكان، خۆپێشاندانەكەی ئەندیمشك گرژی لێكەوتووەتەوە و هێزە ئەمنییەكانی ئێران رووبەڕووی خۆپێشاندەران بوونەتەوە و هەوڵیانداوە بە هەر شێوەیەك بووە كۆتایی پێبهێنن. 
هەوڵەكانی حكومەتی ئێران بۆ كۆتاییهێنان بە خۆپێشاندانەكان لە رۆژهەڵاتی كوردستانیش چڕبوونەتەوە و هێزە ئەمنییەكان دەیانەوێت ئەو كەسانە دەستگیربكەن كە لە خۆپێشاندانەكانی ئەم چەند رۆژەی رابردوودا زۆر چالاك بوون و خەڵكیان رێكخستووەتەوە بۆ بەشداریی لەخۆپیشاندانەكان.
رێكخراوی مافی مرۆڤی ئێران كە بارەگاكەی لە نەرویجە رایگەیاند: لە ماوەی ئەم چەند رۆژەی رابردوودا 72 كەس لە ئێران و رۆژهەڵاتی كوردستان بە تەقەی هێزە ئەمنییەكانی ئێران گیانیان لەدەستداوە كە 56 كەسیان لە رۆژهەڵاتی كوردستان بوون.
رێكخراوەكانی مافی مرۆڤی رۆژهەڵاتی كوردستان بڵاویان كردوە: لە 66 رۆژی ناڕەزایەتییەكاندا 102 كەس لەو بەشەی كوردستان كوژروان، بە گشتی تا ئێستا 434 كەس لە ناڕەزایەتییە سەرتاسەرییەكانی ئێران كوژراون كە یەك لەسەر چواری ژمارەی كوژراوان خەڵكی رۆژهەڵاتی كوردستان بوون.
بە پێی ئامارەكان تا ئێستا لە سەرتاسەری ئێران نزیكەی 17 هەزار و 500 كەس دەستگیركراون، رێكخراوەكانی مافی مرۆڤ هۆشدارییان داوە بەهۆی هێزە ئەمنییەكانەوە ژمارەیەكی زۆری برینداران رو لە نەخۆشخانەكان ناكەن و ئەوەش مەترسیی بۆ ژیانیان دروست دەكات.
خۆپیشاندانەكانی ئێران كاتێك سەریانهەڵدا كە ژینا ئەمینی كچە كوردی خەڵكی سەقز لە 16 ی ئەیلولی رابردوو لەتاران گیانیلەدەستدا، دواتریش ئاشكرابوو پاش سێ رۆژ لەدەستگیركردنی بووەو رێكخراوەكانی مافی مرۆڤیش هێزە ئەمنیەكانیان بەكوشتنی تۆمەتباركرد.

More News

Most Popular

هەواڵ

لە2019 ەوە لەهەرێمی كوردستان 743 ژن بەڕووداوی جیاجیا گیانیان لەدەستداوە

Mic
2022-11-30

بە پێی ئامارەكانی بەڕێوەبەرایەتی بەرەنگاربوونەوەی توندووتیژی دژی ژنان و خێزان لەهەرێمی كوردستان لەساڵی 2019 ەوە تا شەش مانگی یەكەمی 2022 ، 117 ژن كوژراون و 193 ژنیش خۆیان كوشتووە و 155 ژنیش بەهۆكاری جیاجیا "سوتاون" و 278 ژنیش خۆیان سوتاندووە كە كۆی گشتی دەكاتە 743 ژن كە بەهەر هۆكارێك بێت لەهەرێمی كوردستان گیانیان لەدەستداوە.
بەپێی ئامارەی بەڕێوەبەرایەتی بەرەنگاربوونەوەی توندوتیژی دژ ژنان و خێزان لەهەرێمی كوردستان، لەساڵی 2019 45 ژن كوژراون و لەساڵی 2020 دابەزیوە بۆ 25 ژن و لە 2021 یشدا 25 ژن كوژراون، بەڵام لەشەش مانگی یەكەمی 2022 دا 22 ژن لەهەرێم كوژراون، جگە لەوەی لە2019 دا لەهەرێم 62 ژن خۆیان كوشتووە و 155 ژن سوتاون و 104 ژنیش خۆیان سوتاندووە، لەساڵی 2020 یش 25 ژن كوژراون و 38 ژن خۆیان كوشتووە و 68 ژنیش خۆیان سوتاندووە، هاوكات لەساڵی 2021 دا 25 ژن كوژراون و 62 ژن خۆیان كوشتووە و 78 ژنیش خۆیان سوتاندووە، بەڵام لەشەش مانگی یەكەمی 2022 دا لەهەرێمی كوردستان جگە لەوەی 22 ژن كوژراون 31 ژنیش خۆیان كوشتووە و 29 ژنیش خۆیان سوتاندووە.