هەواڵ

بۆچی تەقینەوەی سیستمی غازی شل زۆربووە؟

Mic
2022-11-23

18 ساڵە سیستمی شۆڤاژ لەهەرێمی كوردستان هەیە، زیاتر لە 50 كۆمپانیا و دەیان وەستای كورد و ئێرانی كاری دانانی سیستمەكە دەكەن، بەڵام لەساڵی رابردوەوە پێنج تەقینەوەی غاز لەهەرێم ڕوویانداوە، كە دیارترینیان تەقینەوەكەی 17 ی ئەم مانگەی سلێمانی بوو كە بەهۆیەوە 15 كەس گیانیان لەدەستدا و 11 ی دیكەش برینداربوون، لەدهۆكیش تەقینەوە لەبەشەناوخۆییەك ڕوویدا و شەش كەس گیانیان لەدەستدا و 32 كەسیش برینداربوون.
زۆربوونی ڕووداوەكان پرسیاری زۆری دروستكردووە، بەپێی بەدواداچوونەكان هۆكاری سەرەكی ئەوەیە كاتێك وەزارەتی سامانە سروشتیەكان و بەڕێوەبەرایەتی نەوت و كانزاكان لەپارێزگاكان مۆڵەت دەدەنە ئەو كۆمپانیایانەی ئەو كارە دەكەن، هیچ كوالێتی كۆنترۆڵێك نییە كەرەستەكانیان چێك بكاتەوە، جگە لەوەی بەوتەی شارەزایانی ئەو سیستمە زۆربەی ئەو كەرەستانەی تانكی غازەكەی لێ دروست دەكرێت فێڵی تێدا دەكرێت و كوالێتییەكەی باش نییە.
هۆكارێكی دیكەی زۆربوونی تەقینەوەكان ئەوەیە جگە لەبەنزین ، غازیش لەهەرێمی كوردستان لەلایەن كۆمپانیا حزبیەكانەوە فێڵیان تێدا دەكرێت و بەشێكی غازەكە هەوای تێدەكرێت، كە هەر ئەمەش هۆكارێكی سەرەكییە بۆ خێرا بڵاوبوونەوەی و تەقینەوەی.
زۆربەی ئەو كەرەستانەی لەهەرێمی كوردستان بۆ سیستمی شۆڤاژ و غازی ماڵان بەكاردەهێنرێت ئێرانی و توركین، پرسیارەكە ئەوەیە ئەگەر ئەو كەرەستانە تەنها بۆ هەرێمی كوردستان دروستناكرێن؟ بۆچی لەئێران و توركیا كە دانیشتوانەكەیان چەندین هێندەی هەرێمی كوردستانە كەمترین ڕووداوی تەقینەوەی غاز ڕوودەدات؟
جگە لەو هۆكارانەی باس كران، هۆكارێكی دیكە بەوتەی ئەو كەسانەی شارەزان لەسیستمی شۆڤاژ نەبوونی كارەبایە كە بەهۆیەوە ئەلەرمەكانی غاز لەماڵاندا كارناكەن و هۆكارێكی دیكەش پەستان خستنە سەر تانكی غازەكەو تێكردنی بڕی زیاتری غازە لەلایەن بەشێك لەهاوڵاتیانەوە، هاوكات بەكارهێنانی سۆندەی ئاساییە بۆ ڕاكێشانی غازەكە بۆ ناوماڵ و دانانی سیستمەكەیە لەناو ماڵان لەبری ئەوەی لەسەربانی ماڵەكان و شوێنی كراوە دابنرێت. 

More News

Most Popular

هەواڵ

لە2019 ەوە لەهەرێمی كوردستان 743 ژن بەڕووداوی جیاجیا گیانیان لەدەستداوە

Mic
2022-11-30

بە پێی ئامارەكانی بەڕێوەبەرایەتی بەرەنگاربوونەوەی توندووتیژی دژی ژنان و خێزان لەهەرێمی كوردستان لەساڵی 2019 ەوە تا شەش مانگی یەكەمی 2022 ، 117 ژن كوژراون و 193 ژنیش خۆیان كوشتووە و 155 ژنیش بەهۆكاری جیاجیا "سوتاون" و 278 ژنیش خۆیان سوتاندووە كە كۆی گشتی دەكاتە 743 ژن كە بەهەر هۆكارێك بێت لەهەرێمی كوردستان گیانیان لەدەستداوە.
بەپێی ئامارەی بەڕێوەبەرایەتی بەرەنگاربوونەوەی توندوتیژی دژ ژنان و خێزان لەهەرێمی كوردستان، لەساڵی 2019 45 ژن كوژراون و لەساڵی 2020 دابەزیوە بۆ 25 ژن و لە 2021 یشدا 25 ژن كوژراون، بەڵام لەشەش مانگی یەكەمی 2022 دا 22 ژن لەهەرێم كوژراون، جگە لەوەی لە2019 دا لەهەرێم 62 ژن خۆیان كوشتووە و 155 ژن سوتاون و 104 ژنیش خۆیان سوتاندووە، لەساڵی 2020 یش 25 ژن كوژراون و 38 ژن خۆیان كوشتووە و 68 ژنیش خۆیان سوتاندووە، هاوكات لەساڵی 2021 دا 25 ژن كوژراون و 62 ژن خۆیان كوشتووە و 78 ژنیش خۆیان سوتاندووە، بەڵام لەشەش مانگی یەكەمی 2022 دا لەهەرێمی كوردستان جگە لەوەی 22 ژن كوژراون 31 ژنیش خۆیان كوشتووە و 29 ژنیش خۆیان سوتاندووە.