هەواڵ

حكومەتی ماوەبەسەرچوو وەڵامی داواكاری خوێندكارانی زانكۆ و پەیمانگاكان ناداتەوە

Mic
2022-11-23

دوو هەفتەیە خۆپیشاندانی خوێندكاران بۆ داواكردنی دەرماڵەكانیان بەردەوامە و حكومەتیش هیچ وەڵامێكی نەداونەتەوە، لەكۆبوونەوەی ئەمڕۆی ئەنجومەنی وەزیرانی ماوەبەسەرچووی هەرێم هیچ تەوەرێك بۆ خوێندكاران تەرخان نەكرا.
ئەمڕۆ، لە زانكۆی گەرمیان، هەڵەبجە و ئیدارەی ڕاپەڕین خوێندكارانی زانكۆ و پەیمانگاكان، گردبونەوە و سوربوونی خۆیان لەسەر داواكارییەكانیان دووپاتكردەوە.
خەرجكردنی دەرماڵە و بە سیستەمكردنی دەرماڵە و زیادكردنی داشكاندنی خویندنی پارالێل و ئێواران، دان پێدانانی زانكۆی گەرمیان لە لایەن حكومەتی عێراقەوە، داواكاری خوێنداكارانی زانكۆ و پەیمانگاكانە.
دوای زیاتر لە دوو هەفتە، لە خۆپیشاندان و ناڕەزایەتییەكانی خوێنداكاران، تائێستا حكومەتی ماوەبەسەرچووی هەرێم وەڵامی داواكاری خوێندكارانی نەداوەتەوە و بەوتەی بەرپرسانی وەزارەتی خوێندنی باڵای هەرێم ئەوان نوسراویان ئاڕاستەی وەزارەتی دارایی كردووە وەزارەتی داراییش نوسراوی ئاڕاستەی ئەنجومەنی وەزیران كردووە بەڵام هیچ وەڵامێك نەهاتوەتەوە.
سەرەڕای ئەوەی خوێندكاران لەچاوەڕوانی دەرماڵەدان و پێیان نادرێت، لەدووشەممەی ئەم هەفتەیەوە 105 خوێندكار لەزانكۆی سلێمانی و زانكۆی پۆلەتەكنیكی سلێمانی لەلایەن هێزە ئەمنیەكانەوە دەستگیركراون و تائێستاش بەشێكی زۆریان ئازاد نەكراون، ئەو خوێندكارانەشی ئازادكراون بەڵێننامەیان پێ پڕكراوەتەوە كە بەشداری خۆپیشاندان نەكەن.
دەرماڵەی خوێندكارانی زانكۆ و پەیمانگەكان لەساڵی 2014 ەوە لەلایەن حكومەتی هەرێم بەپاساوی قەیرانی دارایی بڕدراوە، لەكاتێكدا بڕی ئەو دەرماڵەیە بۆ خوێندكاری ناوشار 40 هەزار و دەرەوەی شار 60 هەزارە، بۆ دابینكردنیشی حكومەتی هەرێم پێویستی بە كەمتر لە پێنج ملیار دیناری مانگانە هەیە بەڵام ئامادەنییە بۆیان خەرج بكات.
لەساڵی رابردوودا و لەكۆتایی مانگی 10 ەوە خوێندكاران خۆپیشاندانیان بۆ دەرماڵە دەستپێكرد، دوای فراوانبوونی حكومەتی هەرێم بڕیاریدا دەست بەدەرماڵە بكاتەوە، بەڵام پێدانی دەرماڵەكە شەش مانگ زیاتر بڕی نەكرد و لەسەرەتای وەرزی خوێندنی ئەمساڵەوە خوێندكاران هیچ دەرماڵەیەكیان وەرنەگرتووە.

More News

Most Popular

هەواڵ

لە2019 ەوە لەهەرێمی كوردستان 743 ژن بەڕووداوی جیاجیا گیانیان لەدەستداوە

Mic
2022-11-30

بە پێی ئامارەكانی بەڕێوەبەرایەتی بەرەنگاربوونەوەی توندووتیژی دژی ژنان و خێزان لەهەرێمی كوردستان لەساڵی 2019 ەوە تا شەش مانگی یەكەمی 2022 ، 117 ژن كوژراون و 193 ژنیش خۆیان كوشتووە و 155 ژنیش بەهۆكاری جیاجیا "سوتاون" و 278 ژنیش خۆیان سوتاندووە كە كۆی گشتی دەكاتە 743 ژن كە بەهەر هۆكارێك بێت لەهەرێمی كوردستان گیانیان لەدەستداوە.
بەپێی ئامارەی بەڕێوەبەرایەتی بەرەنگاربوونەوەی توندوتیژی دژ ژنان و خێزان لەهەرێمی كوردستان، لەساڵی 2019 45 ژن كوژراون و لەساڵی 2020 دابەزیوە بۆ 25 ژن و لە 2021 یشدا 25 ژن كوژراون، بەڵام لەشەش مانگی یەكەمی 2022 دا 22 ژن لەهەرێم كوژراون، جگە لەوەی لە2019 دا لەهەرێم 62 ژن خۆیان كوشتووە و 155 ژن سوتاون و 104 ژنیش خۆیان سوتاندووە، لەساڵی 2020 یش 25 ژن كوژراون و 38 ژن خۆیان كوشتووە و 68 ژنیش خۆیان سوتاندووە، هاوكات لەساڵی 2021 دا 25 ژن كوژراون و 62 ژن خۆیان كوشتووە و 78 ژنیش خۆیان سوتاندووە، بەڵام لەشەش مانگی یەكەمی 2022 دا لەهەرێمی كوردستان جگە لەوەی 22 ژن كوژراون 31 ژنیش خۆیان كوشتووە و 29 ژنیش خۆیان سوتاندووە.