هەواڵ

كارەبای ماڵان لەهەرێمی كوردستان كەمكرایەوە

Mic
2022-11-30

وەزارەتی كارەبای هەرێمی كوردستان رایگەیاند، بۆ كۆنترۆڵكردنی زیاتری كارەبا و كەمكردنەوەی بچڕانی كارەبا لە وەرزی زستاندا، بڕیاردراوە بڕی ئەمپێری كارەبای ماڵان لە 40 ئەمپێرەوە بۆ 30 ئەمپێر كەم بكرێتەوە، ئەمەش یەكەمجار نیە وەزارەتی كارەبا ئەو كارە دەكات و ساڵی رابردووش بەهەمانشێوە بڕیاری كەمكردنەوەی كارەبای ماڵانیدا.
وەزارەتی كارەبای هەرێمی كوردستان ئەمڕۆ چوارشەممە لە راگەیەنراوێكدا رایگەیاند: بۆ كۆنترۆڵكردنی زیاتری كارەبا و كەمكردنەوەی بچڕانی كارەبا لە وەرزی زستان، وەزارەتی كارەبا بڕیاریدا بڕی ئەمپێڕی كارەبای ماڵان لە 40 ئەمپێرەوە بۆ 30 ئەمپێر كەم بكرێتەوە.
بەوتەی بەرپرسانی وەزارەتی كارەبا كابینەی نۆیەم توانیویەتی 650 مێگاوات كارەبا بخاتە سەر تۆڕەكان، گەیشتوەتە ئەوەی بە گشتی سێ هەزار و 800 مێگاوات كارەبا بەرهەمبهێنن، بەڵام ئەو رێژەیە خواستی هاوڵاتییان نییە.
دەشڵێن: ئەگەر سوتەمەنی تەواویان لەبەردەستدا بێت، توانای بەرهەمهێنانی حەوت هەزار مێگاوات كارەبایان هەیە، خواستی هاوڵاتییانیش لە وەرزی زستان شەش هەزار مێگاواتە، لە وەرزی هاویندا چوار هەزار و 500 مێگاواتە.
ئومێد ئەحمەد، وتەبێژی وەزارەتی كارەبای حكومەتی ماوەبەسەرچووی هەرێمی كوردستان ڕایگەیاند: پلانێكی ستراتیژیمان داناوە بۆ زیادكردنی بڕی ئەو وزە كارەبایەی ئێستا هەیە كە 3 هەزار و 800 مێگاواتە بۆ 7 هەزار مێگاوات، بۆ ئەوەی تێكڕای پێدانی كاتژمێرەكانی كارەبا زیاتر بكەن.
كەمكردنەوەی ئەمپێری كارەبای ماڵان لەلایەن وەزارەتی كارەباوە لەكاتێكدایە، حكومەتی ماوەبەسەرچووی هەرێم لەچەند وێستگەیەكی كارەبا، كارەبا بە حكومەتی عێراق دەفرۆشێت و داهاتەكەشی دیار نییە، بەڵام كارەبای هاوڵاتیان لەهەرێمی كوردستان كەمدەكاتەوە.
دوای زیاتر لە 30 ساڵ لەحوكمڕانی، هێشتا حكومەتی هەرێم نەیتوانیوە كارەبای 24 كاتژمێری بۆ هاوڵاتیان دابین بكات و تائێستاش حكومەت كەمتر لە 12 كاتژمێر كارەبا دەداتە هاوڵاتیان و ئەوی دیكەش مۆلیدەی ئەهلی دابینی دەكات.

بابەتی لێکچو

More News

Most Popular

هەواڵ

دروزەکان نزیکن لەوەی کۆمەڵکوژ بکرێن

Mic
2025-07-15


دوو رۆژە هێرشی سوپای سوریا بۆسەر دروزەکان دەستیپێکردووە، ئەمڕۆ ڤیدیۆی بە کۆمەڵکوشتنیان و دەستبردنی بۆ پیرۆزییەکانیان"سمێڵ تاشین" تۆڕەکۆمەڵایەتییەکانی تەنی، بۆ پاراستنی خۆیان و شوناسیان بە هەموو توانایانەوە رووبەڕووی سوپای سوریا بوونەتەوە.

دروزەکان کۆمەڵگەیەکی رەسەن و خاوەن بیروباوەڕێکی تایبەت بە خۆیانن و مەڵبەندی نیشتەجێبونیان پارێزگای سوەیدای سوریا و دەوروبەریەتی، دابونەریت و کلتورەکەیان، هەروەها شێوازی جلوبەرگ و سمێڵ و ریشیان، لە خەڵکی سوریایان جیادەکاتەوە.

لەساڵانی رابردوودا لەگەڵ ئەوەی پێکهاەیەکی رەسەنی سوریان، کەچی کەمتر لە ئاستی ناوچەکە و نێودەوڵەتی ناسراوبوون، بەڵام لەگەڵ کەوتنی دەسەڵاتی بەشار ئەسەددا، پرسی دروزەکان بوو بە باسی میدیاکان، بەتایبەت کاتێک دەسەڵاتی ئەحمەد شەرعیان رەتکردەوە و رووبەڕوی چەکدارەکانی بوونەوە.

دروزەکان تائێستا توانیویانە پارێزگاری لە دەسەڵاتی خۆبەڕێوەبەری خۆیان بکەن لە سوریان دوای ئەسەد، ئەوان پێێان وایە ئەحمەد شەرع هیچ گۆڕانێک لە بیروبۆچونیدا رووینەداوە بەرامبەریان، بۆیە بە هەموو توانایانەوە پارێزگاری پێگە و دەسەڵاتی خۆیان دەکەن.

ئیسرائئیل لەدوای کەوتنی بەشار ئەسەد و هێرشەی گروپەکانی سەر بە ئەحمەد شەرع بۆسەر دروزەکان، پشتیواننی خۆی بۆ دروزەکان راگەیاند، ئەمڕۆیش، ئەمیچای چیکلی، وەزیری ڕاگەیاندن و کاروباری رەوەندی جوی ئیسرائیل رایگەیاند،  نابێت لە بەرانبەر تیرۆری ئیسلامی-نازیی ڕژێمی قاعیدەدا بێدەنگ بین یان بێ هەڵوێست بین و داوای لەناوبردنی ئەحمەد شەرعی کرد.

ئەم سوکایەتى و بێڕێزیانەى چەکدارانى شەرع دەیکەن، بەتاڵکردنەوەى هەموو ئەو بەڵێن و دروشمانەیە کە ئەحمەد شەرع بۆ سوریاى نوێى هۆنیوەتەوە، پێشمان دەڵێت کردەوەی چەکدارەکانی لەسەر زەوی، وێنەیەکی جیاواز نیشان دەدات و ئایندەیەکی نادیار بۆ پێکەوەژیانی ئایینی و نەتەوەیی لە سووریای نوێدا دەخاتەڕوو

لە ئێستادا دروزەکان شەڕی مان و نەمان دەکەن و بەتەواوی پڕچەکن و وەک هێزێک رووبەڕووی سوپاکەی ئەحمەد شەرع وەستاونەتەوە، سوپاکەی شەرعیش دەیەوێت بە هەر نرخێک بێت ناوچەکانی درۆزەکان کۆنترۆڵ بکات و بۆ گەیشتن بەو ئامانجە دەست ناپارێزێت.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved