هەواڵ

دواین زانیاری لەبارەی كاركردنی كامێرا نوێیەكانی تیژڕەوی لەهەولێر و سلێمانی

لەهەولێر و سلێمانی كامێرا نوێیەكانی تیژرەوی لەلایەن وەزارەتی ناوخۆوە دەخرێتەكار، لەهەولێر وەكو تاقیكردنەوە كامێراكان لەبەشێك لەشەقامەكان خراونەتەكار و لەسلێمانیش بەوتەی هاتوچۆ هێشتا كاركردن تێیاندا بەردەوامە.
دوێنێ بەڕێوەبەرایەتی ھاتوچۆی ھەولێر رایگەیاند: بۆ کەمکردنەوەی قوربانییەکانی ھاتوچۆ و کۆنترۆڵکردنی تیژڕەویی، وەکو قۆناغی یەکەم، کامێرای تۆمارکردنی تیژڕەویی خاڵ بۆ خاڵ یان کە تێکڕای خێرایی لە نێوان دوو کامێرا تۆمار دەکات، لە شەقامی 120 مەتری ھەولێر لە نێوان شەقامی کەرکوک بۆ شەقامی بنەسڵاوە لە ھەردوو ساید ئەو کامێراییە لە ھەفتەی داھاتوو دەکەوێتە کار.
ھاتوچۆی ھەولێر شۆفێران ئاگادار دەکاتەوە و دەڵێت: بۆ ئەوەی خۆیان لە سزای دارایی کامێراکانی تۆمارکردنی تیژڕۆیی بپارێزن، نابێت لە شەقامی 120 مەتری لەمەولا تیژڕەویی بکەن و نابێت ئۆتۆمبێلی بچووک  لە 110 کیلۆمەتر لە كاتژمێرێكدا و ئۆتۆمبێلی بارھەڵگر لە 80 کیلۆمەتر لە كاتژمێرێكدا خێراتر بڕون، ھەر خێراییەکی زیادە بۆیان تۆمار دەکرێت و سزای دارایی دەدرێن جا کامێراکە دیار بێت یان نا.
هاتوچۆی هەولێر ئەوەشی خستووەتەڕوو: شوفێرانی بارھەڵگر تەنھا ڕێگە پێدراون لە ھێلی دیاریکراو بۆیان شوفێری بکەن، بە پێچەوانەوە ڕوبەڕوی سزای دارایی دەبنەوە.
بەڵام بەوتەی سەرچاوەیەك لەهاتوچۆی هەولێر بۆ مایك، كامێرا نوێیەكانی تیژڕەوی خراونەتەكار، بەڵام وەك سەرچاوەكە وتی تا هەفتەی داهاتوو وەك "تێست" كاردەكەن و لەسەرەتای هەفتەی داهاتوەوە سەرپێچیەكان هەژمار دەكرێت.
هاوكات عەمید سەعدوڵا عەزیز سەرپەرشتیاری لیژنەی كامێراكانی هاتوچۆ لەهاتوچۆی سلێمانی بەمایكی وت: تائێستا كاركردن لەكامێراكانی تیژڕەویی لەسلێمانی بەردەوامە، وتیشی تائێستا لەلایەن هاتوچۆوە كامێرا نوێیەكانی تیژڕەوی وەرنەگیراوە.
لەهەرێمی كوردستان كامێرا نوێیەكانی تیژڕەوی لەلایەن دوو كۆمپانیای حزبییەوە كە سەر بە پارتی و یەكێتین دادەنرێت و زیاتر لە 400 كامێرا لەقۆناغی یەكەمدا دادەنرێت، بەپێی گرێبەستەكە تا پارەی كامێراكان دەردەهێنێتەوە كۆمپانیاكە %70 ی قازانجی كامێراكان دەبات و دوای پڕكردنەوەی قازانجەكەش پێچەوانە دەبێتەوە.
لەهەرێمی كوردستان بە زیاتر لە 400 جۆر باج لەهاوڵاتیان وەردەگيرێت، لەكاتێكدا خزمەتگوزاریەكان وەك پێویست نین و سەرەڕای ئەوەش كامێرا نوێیەكەی تیژڕەوی كە بە پۆینت توو پۆینت ناسراوە چاوەڕوان دەكرێت بارگرانییەكی دیكە بخاتە سەر شۆفێران و هاوڵاتیان.

هەواڵ

درۆنەکانی ئیسرائیل ئەحمەد حاجی رەشید راپێچی بەردەم دادگای هەولێر دەکەن

دادگای لێکۆڵینەوەی هەولێر بە تۆمەتی هەڵبەستن و مامەڵەکردن دژی ئاسایشی نیشتمانی فەرمانی دەستگیرکردنی بۆ ئەحمەدی حاجی ڕەشید، ئەندامی پێشووی فراکسیۆنی کۆمەڵی دادگەریی کوردستان لە پەرمانی عێراق دەرکرد.

 دادگای لێكۆڵینه‌وه‌ی هه‌ولێر لە نوسراوێکدا سه‌رجه‌م هێزه‌ ئه‌منییه‌كان و لایه‌نی په‌یوه‌ندیدار ئاگادار کردوەتەوە، "له‌هه‌ر شوێنێك ئه‌حمه‌د حاجی ڕه‌شید، ئه‌ندامی مه‌كته‌بی سیاسی كۆمه‌ڵی دادگه‌ریتان بینی ده‌ستگیری بكه‌ن، چونكه‌ له‌ دادگا سكاڵای له‌سه‌ر تۆمار كراوه‌ و فه‌رمانی ده‌ستگیركردنی بۆ ده‌رچووه‌".

فەرمانگەی لێکۆڵەرەوەی دادوەری لە دادگای لێکۆڵینەوەی هەولێر، بە نووسراوی 1980، داوای لە دادگای لێکۆڵینەوەی سلێمانی کردووە تۆمەتبارەکەیان بە دەستگیرکراوی ڕادەست بکات.

فەرمانی دەستگیرکردنەکە بە پێی ماددەی 226ـی یاسای سزادانی عێراقی دەرچووە، ئەوەیش دوای ئەوەی کەناڵی "عەهد " لە زاری ئەحمەد حاجی رەشیدەوە بڵایکردەوە،" هەندێک لایەنی کوردی خزمەتێکی گەورەیان پێشکەشی ئیسرایل کردووە و ئاسانکارییان بۆ ناردنی 10 هەزار درۆن بۆ خاکی ئێران کردووە". 

لە ماددەی 226 لەیاسای سزادانی عێراقیدا هاتوە"هەر كەسێك بەشێوەیەكی ئاشكرا سوكایەتی بە ئەنجومەنی گەل، حكومەت، دادگاكان، هێزە چەكدارەكان یان هەر دەستەیەكی نیزامی‌و دەسەڵاتێكی گشتی، بەرژەوەندی یان فەرمانگەیەكی فەرمی‌ و نیمچە فەرمی بكات، سزا دەدرێت بە زیندانیكردن بۆ ماوەیەك كە لە حەوت ساڵ زیاتر نەبێت یان حەبسكردنی یاخود غەرامەكردنی". 

دوای ده‌رچوونی فەرمانی دەستگیرکردنەکە، ئه‌حمه‌دی حاجی ره‌شید لە رونکردنەوەیەکدا بڵاویکردەوە"کەناڵی عەهد لێدوانیکی منیان بەشێواوی بڵاوکردووەتەوە، دوای قسەکردن لەگەڵ کەناڵی ناوبراو و ئاگادارکردنەوەیان، سکاڵای یاساییان لەسەر تۆمار دەکەم"، هەر بۆیە داوای لێبووردنیان کردووه‌، دوو سەرنووسەری کەناڵەکەیان لەکار دورخستووەتەوە و سەرجەم هەواڵەکەشیان لەته‌واوی گرووپی تیلیگرام و سۆشیال میدیاكانیان سڕییەوە.