هەواڵ

كچێكی كورد بۆ ماوەی سێ ساڵ لەلایەن 40 كەسەوە دەستدرێژی سێكسی كراوەتەسەر

لە ناوچەیەكی پارێزگای وان، كچە خوێندكارێكی 16 ساڵ، سكاڵای دژی 40 كەس تۆماركردووە و ڕایگەیاندووە ماوەی سێ ساڵە لەلایەن پۆلیس و بەرپرسانی ناوچەكە دەستدرێژی سێكسی كراوەتە سەر.
كچە خوێندكارەكە دانیشتووی شارەدێی مورادییەی سەر بەپارێزگای وانە دەڵێت: لە كۆتایی ساڵی 2019ەوە لەئەنجامی هاندانی چەند كەسێك ئالوودەی مادەی هۆشبەربووە، دواتر بەشێوەیەكی سیستماتیكی دەستدرێژی سێكسی كراوەتە سەر.
ئەو كچە خوێندكارە، بەهۆی ئالوودەبوونی بە مادە هۆشبەرەكان لە خوێندگە دوورخراوەتەوە، لەئیستادا سكاڵای لەسەر 40 پیاو تۆماركردووە، كە لەنێویاندا بەرپرسی باڵا و ئەندامانی پۆلیس هەن، چەند ساڵێكە لەژێر هەڕەشەی وێنە و ڤیدیۆیانەی لێیان گرتووە، بەبەردەوامی دەستدرێژی سێكسی دەكەنە سەر.
ڕووداوەكە بەمشێوەیە ئاشكرابووە، كاتێك 10 ڕۆژ لەمەوبەركەسێك گوێی لە هاوار و گریانی كچەكە دەبێت لە باڵەخانەیەكی چۆڵكراودا، ڕاستەوخۆ پەیوەندی دەكات بە  هێڵی پۆلیسی تاوان، كاتێك هێزەكان دەگەنە شوێنی تاوانەكە شەش كەس دەستگیر دەكەن، ئێستا دوو كەس بە كەفالەت ئازادكراون و چوارەكەی دیكە دەستبەسەرن.
كچە خوێندكارەكە، لە بنكەی پۆلیس تەواوی بەسەرهاتەكەی باس دەكات و ڕوونی دەكاتەوە، كە بە چ دۆخێكدا تێپەڕێوە، هەروەها لە سكاڵاكەیدا ناوی 40 كەس دەداتە داواكاری گشتی، كە لەنێویاندا حەوت ئەفسەری پۆلیس، ئەفسەرانی ناوچەكانی پارێگای وان و ژمارەیەك لە كەسانی سیاسی ناوخۆیی هەیە، ناوی هەموو ئەوانەشی داوە، كە ئالوودەیان كردووە بە مادە هۆشبەرەكان.
كچەكە ئەوەشی ئاشكرا كردووە، كاتێك خوێندكار بووە، مامۆستای وانەی وەرزشی، بە بەڵێنی بەشداری پێكردنی لە كێبڕكێیەكدا، فریویداوە و ناچاری كردووە پەیوەندی سێكسی لەگەڵ كاربەدەستێكی حكومەتدا ئەنجام بدات، لەئێستادا، كە دۆسیەكە براوەتە دادگا بەرپرسان و كەسانی كاربەدەستی ناوچەكە دەیانەوێت لەڕێگەی فشارخستنە سەر خێزانی كچە خوێندكارەكە، ڕووداوەكە كپ بكەن و دۆسیەكە دابخەن.

هەواڵ

ئەمریکا: دۆخی مافی مرۆڤ لە هەرێمی کوردستان خراپتر بووە

وەزارەتی دەرەوەی ئەمریکا رایگەیاند، دۆخی ئازادییە بنەڕەتی و مەدەنییەكان لە هەرێمی كوردستان خراپتر بوون. دەشڵێت، " زیندانەکان و ناوەندەکانی چاکسازی لە هەرێم لە دۆخێکی خراپدان".

ئەمڕۆ سێشەممە، وەزارەتی دەرەوەی ئەمریکا لە راپۆرتێکدا لەسەر رەوشی ئازادی رادەربڕین و مافی مرۆڤ راپۆرتێکی بڵاوکردوە و تێدا دەڵێت" کوشتن و بێسەروشوێنکردن و ئەشکەنجەدان و بارودۆخی سەختی ناو زیندانەکان و چەندین پێشێلكاری تر تۆماركراون، وتیشی، دەستگیرکردن و لێپێچینەوەی ناڕەوا دژی رۆژنامەوانان كراوە و كێشە بۆ ئازادیی گردبوونەوە دروستكراوە.
ئەوەشی خستەڕوو، زیندانەکان و ناوەندەکانی چاکسازیی لە هەرێم لە دۆخێکی خراپدان و رێژەی قەرەباڵغی نێو زیندانەکان گەیشتووتە ١٥٧٪.