وردەكاری ڕووداوەكەی مێردین

لەڕووداوێكدا لەمێردینی باكوری كوردستان چوار كەس لەلایەن چەند چەكدارێكی نەناسراو كوژران، بەپێی زانیاریەكان ئەو كەسانە سەر بە یەك خانەوادە بوون و بەشێكیان ئەندامی یەكگرتووی ئیسلامی كوردستانن.
بەرەبەیانی ئەمڕۆ لە باكوری كوردستان و لە سنوری شار مێردین دەستڕێژی گولە لە ئۆتۆمبێلێك كرا كە لە هەرێمی كوردستان چوونەتە باكوری كوردستان و پێنج هاوڵاتی تێدا بووە،لەئەنجامی ئەو هێرشەدا چوار كەس كوژراون و یەكێكی دیكەیان بریندارە و دواتر بریندارەكە گەیەنراوەتە نەخۆشخانە بۆ چارەسەر.
دوای ڕووداوەكە دەركەوتووە ئەو هاوڵاتیانە خەڵكی شاری دهۆك بوون و بەمەبەستی چارەسەری پزیشكی چوونەتە باكوری كوردستان، بەڵام تائێستا نازانرێت هۆكاری ئەو هێرشە چی بووەو كێ هێرشەكەی ئەنجام داوە، لەئێستادا لێكۆڵینەوە لەلایەن لایەنە پەیوەندییدارەكان لە هەردوو حكومەتی توركیاو هەرێمی كوردستانەوە لەسەر ئەو ڕووداوە دەستی پێكردوە.
بەوتەی كەسوكاری ئەو هاوڵاتیانە، هیچ كێشەیەكی كۆمەڵایەتی یان سیاسیان لەگەڵ هیچ كەس و لایەنێك نییە، بۆیە بەلای ئەوانیشەوە ڕووداوەكە جێگای سەرسوڕمانەو نازانن هۆكار چیی بووە هێرشیان كراوەتە سەر.
خانەوادەی خێزانە كوژراوەكەی دهۆك لەتوركیا دەشڵێن تەواوی ئەندامانی خێزانەكە لەئۆتۆمبێل هێنراونەتە خوارەو گولەبارانكراون، بەڵام دەستكاریی پارەكانیان نەكراوە.
ئاماژەیان بەوەشكردووە لەئێستادا ئامادەكاری دەكرێت بۆ گەڕاندنەوەی تەرمی ئەو هاوڵاتیانەو ئەوانەشی بریندارن دوای چارەسەر دەگەڕێنەوە هەرێمی كوردستان.
هەروەها كەسوكاری قوربانییەكان دەشڵێن، چاوەڕێی لایەنە پەیوەندیدارەكان دەكەن لێكۆڵینەوە لەو ڕووداوە بكەن و هۆكارەكەی ئاشكرا بكەن و بكەرانی ئەو ڕووداوە سزا بدرێن.
بەپێی زانیاریەكان ئەو خانەوادەیە خەڵكی دهۆكن و لایەنگری یەكگرتووی ئیسلامی كوردستانن.
ناوی ئەو كەسانەی لەڕووداوەكەدا گیانیان لەدەستداوە
- حاجی عەبدوڵڵا ساڵح مستەفا: 69 ساڵ
- چیمەن شاهین خالید: 75 ساڵ، هاوژینی حاجی عەبدوڵڵایە
- هندرێن عەبدوڵڵا ساڵح: 39 ساڵ، کچی حاجی عەبدوڵڵایە
- واحیدە حەیدەر جاسم: 63 ساڵ
 مەلا ئەحمەد جەلالەدین ئیبراهیم: 45 ساڵ بریندارە

هەواڵ

وردەكاری دواخستنی دانیشتنێكی دادگای فیدراڵی عێراق لەبارەی درێژكردنەوەی تەمەنی پەرلەمانی كوردستان

دانیشتنی دادگای باڵای فیدراڵیی عێراق لەبارەی درێژکردنەوەی تەمەنی پەرلەمانی کوردستان بۆ حەوتی شوبات دواخرا، نوێنەرانی هەرێم پاساوی ئامادەنەبوونیان  خراپیی کەشوهەواوە بووە.
 بڕیار بوو ئەمڕۆ سێشەممە، 31-01-2023، دادگای باڵای فیدراڵیی عێراق لەبارەی سکاڵایەک کۆببێتەوە کە لە دژی درێژکردنەوەی تەمەنی ئەم خولەی پەرلەمانی کوردستان تۆمارکراوە، بەڵام رێبوار ئەوڕەحمان وتەبێژی فراكسیۆنی نەوەی نوێ لەپەرلەمانی عێراق رایگەیاند: ئەمڕۆ لە دانیشتنی دادگای فیدراڵی تایبەت بە درێژكردنەوەی نایاسایی پەرلەمان و سەرۆكایەتییەكان كە لەلایەن سەرۆكی جوڵانەوەی نەوەی نوێ و سروە عەبدولواحید سەرۆكی فراكسیۆنی نەوەی نوێ تۆماركرابوو دواخرا بۆ حەوتی مانگی دوو كرایە دانیشتنێكی كراوە.
 بڕیاربوو ئەمڕۆ دادگای باڵای فیدراڵیی عێراق لەبارەی دوو سکاڵا کۆببێتەوە کە ئەوانیش یەكەمیان ئەو سكاڵایەی لەسەر درێژکردنەوەی تەمەنی پەرلەمانی کوردستان تۆمارکرابوو، دووەمیش سکاڵا لەسەر هەرسێ سەرۆکایەتییەکەی عێراق تۆمارکرابوو و سکاڵاکار داوا دەکات راسپاردنی محەممەد شیاع سوودانی بۆ پێکهێنانی حکومەت هەڵبوەشێندرێتەوە.
 سکاڵای یەكەم بە ناوی سروە عەبدولواحید، سەرۆکی فراکسیۆنی نەوەی نوێ لە پەرلەمانی عێراق پێشکەشکراوە، لە پاش ئەوەی لەگەڵ سێ سکاڵای دیکەدا یەکخران، کە لەلایەن یوسف محەممەد، سەرۆکی پێشووی پەرلەمانی کوردستان؛ شاسوار عەبدولواحید، سەرۆکی جووڵانەوەی نەوەی نوێ و کاوە عەبدولقادر، سەرۆکی فراکسیۆنی نەوەی نوێ لە پەرلەمانی کوردستان پێشکەش کرابوون و 18ـی کانوونی یەکەمی 2022، یەکەم دانیشتن لەبارەی سکاڵاکان کرا.
 سکاڵاکار لەو سکاڵایەدا داوای پووچەڵکردنەوەی یاسای ژمارە 12ـی رۆژی 9-10-2022ـی تایبەت بە درێژکردنەوەی خولی پێنجەمی پەرلەمانی کوردستان دەکات بەهۆی دژایەتیی لەگەڵ هەردوو ماددەی 5 و 20ـی دەستووری عێراق، جگە لەوەش لە داواکەدا هاتووە: مافی دەستووریی دیاریکراو لە ماددەی 51ـی یاسای هەڵبژاردنی پەرلەمانی کوردستان ژمارە 1ـی ساڵی 1992 پێشێل دەکات.
رۆژی 9ـی تشرینی یەکەمی 2022، پەرلەمانتارانی پارتی و یەكێتی و بەشێك لەفراكسیۆنی گۆڕان و پێكهاتەكان تەمەنی ئەم خولەی پەرلەمانیان تاوەکو کۆتایی ساڵی 2023 درێژکردەوە، خولی پێنجەم رۆژی 06-11-2022 کۆتایی هات، درێژکردنەوەی تەمەنی پەرلەمان  هێزەکانی ئۆپۆزیسیۆنی تووڕەکرد و لەنێوان بەشدارینەکردن لە کۆبوونەوەکانی پەرلەمان و بایکۆتکردنی و هەڵپەساردنی ئەندامێتی خۆیانهێشتەوە.