هۆكاری گرانبوونی نرخی هێلكە لەهەرێم ئاشكرادەكرێت

هێلكە لەپێداویستی ناوخۆیی زیاترە، بەڵام بەهۆی ئەوەی حكومەت عەلەف بۆ كێڵگە پەلەوەریەكان بەنرخێكی هەرزان دابین ناكات بووەتە هۆی بەرزبوونەوەی نرخەكەی، بەڕێوەبەری چاودێری بازرگانی سلێمانیش دەڵێت گرانبوونی هێلكە بەردەوام نابێت و نرخەكەی دادەبەزێت.
سۆران عەبدولغەفوور، بەڕێوەبەری چاودێری بازرگانی سلێمانی بەمایكی وت: بەرزبوونەوەی نرخی هێلكە سێ هۆكاری هەیە، كە بریتین لەوەی ئێستا وەرزی زستانە و خواست لەسەر هێلكە هەیە، هەروەها بەرزبوونەوەی نرخی دۆلار و گرانبوونی عەلەف و پێویستییەكانی دەواجنەكان، قەدەغەكردنی هاوردەكردنی هێلكەی توركی و ئێرانی بۆ هەرێمی كوردستان.
وتیشی: لە سلێمانی 11 كێڵگەی بەرهەمهێنانی هێلكە هەیە، هەریەك بە بڕی جیاواز هێلكە دەخەنە بازاڕەوە.
وەك بەڕێوەبەری چاودێری بازرگانی سلێمانی دەڵێت: گرانبوونی هێلكە بەردەوام نابێت و نرخەكەی دادەبەزێت، هەموو رۆژێك سلێمانی پێویستی بە دوو هەزار كارتۆن هێلكە هەیه،‌ كە دەكاتە 720هەزار هێلكە.
لە رۆژی 29 ی مانگی 12 ی ساڵی ڕابردوو وەزارەتی كشتوكاڵی حكومەتی هەرێم بڵاویكردەوە: لە بەرهەمی هێلكە قۆناغی خۆبژێویمان تێ پەڕاندووە و ساڵانە 919 ملیۆن و 800 هەزار هێلكە هەناردەی دەرەوە دەكەین، بەرهەمی ڕۆژانەی هێلكە 50٪ زیاترە لە پێویستی ناوخۆیی.
ماوەی چەند ڕۆژێكە نرخی هێلكە لە بازاڕەكانی هەرێمی كوردستان بەشێوەیەكی بەرچاو بەرزبوەتەوە، ئەوەش نیگەرانی هاوڵاتیان و كاسبكارانی بەدوای خۆیدا هێناوە.
پێشتر لیژنەی نرخ لە بەڕێوەبەرایەتی چاودێری بازرگانی سلێمانی بڵاویكردەوە: یەك كارتۆن هێلكەی ناوخۆ (12) تەبەقی بە كێشی (20 - 25) كگم بە 74هەزار دینار فرۆشراوە.
ساڵانی رابردوو هەشت هێلكە لەفرۆشگاكانی هەرێم بەهەزار دیناربوو، بەهۆی ئەوەی نرخی عەلەف گران بوو دواتر نرخەكەی بەرزبوەوە و شەش هێلكە بوو بە هەزار دینار، ئەمساڵیش جیا لەهۆكاری گرانبوونی عەلەف و پێداویستیەكانی كێڵگە پەلەوەریەكان لەهەندێك شوێن پێنج هێلكە بەهەزاردینار و لەهەندێك شوێنی دیكەش چوار هێلكە بە هەزار دینار دەفرۆشرێت.

هەواڵ

وردەكاری دواخستنی دانیشتنێكی دادگای فیدراڵی عێراق لەبارەی درێژكردنەوەی تەمەنی پەرلەمانی كوردستان

دانیشتنی دادگای باڵای فیدراڵیی عێراق لەبارەی درێژکردنەوەی تەمەنی پەرلەمانی کوردستان بۆ حەوتی شوبات دواخرا، نوێنەرانی هەرێم پاساوی ئامادەنەبوونیان  خراپیی کەشوهەواوە بووە.
 بڕیار بوو ئەمڕۆ سێشەممە، 31-01-2023، دادگای باڵای فیدراڵیی عێراق لەبارەی سکاڵایەک کۆببێتەوە کە لە دژی درێژکردنەوەی تەمەنی ئەم خولەی پەرلەمانی کوردستان تۆمارکراوە، بەڵام رێبوار ئەوڕەحمان وتەبێژی فراكسیۆنی نەوەی نوێ لەپەرلەمانی عێراق رایگەیاند: ئەمڕۆ لە دانیشتنی دادگای فیدراڵی تایبەت بە درێژكردنەوەی نایاسایی پەرلەمان و سەرۆكایەتییەكان كە لەلایەن سەرۆكی جوڵانەوەی نەوەی نوێ و سروە عەبدولواحید سەرۆكی فراكسیۆنی نەوەی نوێ تۆماركرابوو دواخرا بۆ حەوتی مانگی دوو كرایە دانیشتنێكی كراوە.
 بڕیاربوو ئەمڕۆ دادگای باڵای فیدراڵیی عێراق لەبارەی دوو سکاڵا کۆببێتەوە کە ئەوانیش یەكەمیان ئەو سكاڵایەی لەسەر درێژکردنەوەی تەمەنی پەرلەمانی کوردستان تۆمارکرابوو، دووەمیش سکاڵا لەسەر هەرسێ سەرۆکایەتییەکەی عێراق تۆمارکرابوو و سکاڵاکار داوا دەکات راسپاردنی محەممەد شیاع سوودانی بۆ پێکهێنانی حکومەت هەڵبوەشێندرێتەوە.
 سکاڵای یەكەم بە ناوی سروە عەبدولواحید، سەرۆکی فراکسیۆنی نەوەی نوێ لە پەرلەمانی عێراق پێشکەشکراوە، لە پاش ئەوەی لەگەڵ سێ سکاڵای دیکەدا یەکخران، کە لەلایەن یوسف محەممەد، سەرۆکی پێشووی پەرلەمانی کوردستان؛ شاسوار عەبدولواحید، سەرۆکی جووڵانەوەی نەوەی نوێ و کاوە عەبدولقادر، سەرۆکی فراکسیۆنی نەوەی نوێ لە پەرلەمانی کوردستان پێشکەش کرابوون و 18ـی کانوونی یەکەمی 2022، یەکەم دانیشتن لەبارەی سکاڵاکان کرا.
 سکاڵاکار لەو سکاڵایەدا داوای پووچەڵکردنەوەی یاسای ژمارە 12ـی رۆژی 9-10-2022ـی تایبەت بە درێژکردنەوەی خولی پێنجەمی پەرلەمانی کوردستان دەکات بەهۆی دژایەتیی لەگەڵ هەردوو ماددەی 5 و 20ـی دەستووری عێراق، جگە لەوەش لە داواکەدا هاتووە: مافی دەستووریی دیاریکراو لە ماددەی 51ـی یاسای هەڵبژاردنی پەرلەمانی کوردستان ژمارە 1ـی ساڵی 1992 پێشێل دەکات.
رۆژی 9ـی تشرینی یەکەمی 2022، پەرلەمانتارانی پارتی و یەكێتی و بەشێك لەفراكسیۆنی گۆڕان و پێكهاتەكان تەمەنی ئەم خولەی پەرلەمانیان تاوەکو کۆتایی ساڵی 2023 درێژکردەوە، خولی پێنجەم رۆژی 06-11-2022 کۆتایی هات، درێژکردنەوەی تەمەنی پەرلەمان  هێزەکانی ئۆپۆزیسیۆنی تووڕەکرد و لەنێوان بەشدارینەکردن لە کۆبوونەوەکانی پەرلەمان و بایکۆتکردنی و هەڵپەساردنی ئەندامێتی خۆیانهێشتەوە.