هەواڵ

پارتی و یەكێتی ئەمرۆ چەند پرسێك یەكلایی دەكەنەوە

Mic
2023-01-28

دوای چەند مانگێک کۆنەبوونەوە و گرژیی سیاسی، ئەمڕۆ پارتی و یەکێتی لە شاری سلێمانی لە ئاستی باڵا کۆدەبنەوە، وتەبێژی فراكسیۆنی پارتی لەپەرلەمانی كوردستان دەڵێت یەكێتی تائێستا بەئەنجامدانی هەڵبژاردن لەمساڵدا ڕازی نییە، دەشڵێت لەگەڵ درێژكردنەوەی تەمەنی پەرلەمان نەبوون بەڵام لەبەر دۆخی هەرێم پێی رازی بوون.
بەپێی زانیاریەكانی مایك خاڵی ناکۆکیی نێوان پارتی دیموکراتی کوردستان و یەکێتیی نیشتمانیی کوردستان زۆرن و ئەمرۆ لەكۆبوونەوەكەدا گفتوگۆی لەبارەوە دەكەن، گرنگترینیشیان هەڵبژاردنی پەرلەمانی کوردستان، پرسی داهات و خەرجییەکان، یەکخستنی هەڵوێستەکان بەرامبەر بە بەغدا و دەرەوە، پرسی حکومەت و گەڕانەوەی یەکێتی بۆ کۆبوونەوەکانی ئەنجوومەنی وەزیران.
 گرژییەکانی نێوان پارتی و یەکێتی کاتێک زیاتر بوو کە رۆژی 7-10-2022 لە شاری هەولێر، دوو بۆمب بە ئۆتۆمبێلی هاوکار جافدا تەقینەوە و گیانی لەدەستدا، ئەو پێشتر بەرپرسی دەزگای زانیاری و دژەتیرۆری یەکێتی بوو لە نەینەوا، بەڵام بەڵام دوای روداوەكانی هەشتی تەموزی 2021 وازی هێنابوو.
 پێشتر عەلی حوسێن، ئەندامی مەکتەبی سیاسی پارتی دیموکراتی کوردستان لە کۆنگرەیەکی رۆژنامەوانیدا رایگەیاندبوو: ئێمە دوو حیزبی بەرپرسیارین، ئەرکی ئەو قۆناغە و ئەزموونی هەرێمی کوردستانمان لە ئەستۆدایە، بە دڵنیاییەوە ئەگەر ناکۆکیشمان هەبێت خاڵی هاوبەشمان زۆرە، هەوڵدەدەین بە خاڵە هاوبەشەکانمان دەستپێبکەین و ئەو گرفتانە چارەسەر بکەین.
 سۆران جەمال تاهیر، وتەبێژی یەکێتیی نیشتمانیی کوردستان رایگەیاندبوو: لە نزیکەوە لەسەر مێزی گفتوگۆ هەر کێشە و گرفتێک هەیە دەتوانین چارەسەری بکەین، چۆنییەتی پتەوکردنی پەیوەندییەکانمان لەگەڵ حکومەتی فیدراڵیی عێراق، هەروەها چۆنییەتی چارەسەرکردنی ئەو کێشانەی لەنێوان هەردوو حکومەتدا هەن، بەتایبەت لەم دوایانەدا چەند بڕیارێک دراون بۆ ئەوەی گفتوگۆی لەسەر بکەین.
 ناكۆكیەكانی پارتی و یەكێتی وایكرد هەڵبژاردنی پەرلەمانی كوردستان لەكاتی خۆیدا بەڕێوەنەچێت، سەرەڕای فشارە ناوخۆیی و نێودەوڵەتیەكان،   سەرەڕای ئەوەش لە ئۆکتۆبەری ساڵی رابردوو و مانگێک پێش کۆتاییهاتنی ئەم خولەی پەرلەمان، بە زۆرینەی دەنگی پەرلەمانتاران کاتی ئەم خولە بۆ کۆتایی ئەمساڵ درێژکرایەوە.
پێشەوا هەورامی وتەبێژی فراكسیۆنی پارتی دیموكراتی كوردستان لەخولی پێنجەمی پەرلەمانی كوردستان بەمایكی وت:هەڵبژاردن موڵكی خەڵكە و موڵكی پارتی و یەكێتی نییە هەركەس بەرامبەر خەڵك راستگۆبێت نابێت لەگەڵ ئەنجام نەدانی هەڵبژاردن بێت، ئەوەی كە ساڵێك تەمەنی پەرلەمان درێژكرایەوە بەدڵی ئێمەش نەبوو بەڵام لەبەر بارودۆخی كوردستان قبوڵمان كرد.
وتیشی:هیچ هۆكارێك نییە باس لەدواخستنی هەڵبژاردنی پەرلەمان بكەین دەبێت پەرلەمانی كوردستان زوو كۆببێتەوە و هەلێك بداتە كۆمسیۆن تا بتوانن كارێكی باش بكەن بۆ ئەنجامدانی هەڵبژاردن لەمساڵدا، بۆیە چاوەڕێ دەكەین لەكۆبوونەوەی ئەمرۆی پەرلەمان یەكێتی رازی ببن بە ئەنجامدانی هەڵبژاردن.

بابەتی لێکچو

More News

Most Popular

هەواڵ

ئاسمانی عێراق جمەی دێت و ئاستی پێوانەیی تۆمارکرد

Mic
2025-07-06

بەپێی راگەیاندراوێکی وەزارەتی گواستنەوەی عێراق، ئاسمانی عێراق بەشێوەیەکی کارا لەلایەن کۆمپانیاکانی بواری گەشتی ئاسمانیی مەدەنییەوە بەکاردەهێنرێت و ژمارەی پێوانەیی تۆمارکردووە، پاشئەوەی بەهۆی جەنگی ئیسرائیل و ئێرانەوە کەرتی گەشتی ئاسمانی عێراق بەتەواوی داخرابوو.

بەپێی زانیارییەکانی وەزارەتی گواستنەوەی عێراق، رۆژانە بەگشتی 300 بۆ زیاتر لە 700 فڕۆکەی مەدەنی بە ئاسمانی عێراقدا تێدەپەڕن، ئەوەش پێوانەیەکی نوێیە.

بەگشتی ئاسمانی عێراق بە سێ چین لە بەرزترینەوە بۆ کەمتر بەرز، رێچکەی تێپەڕینی فڕۆکەی دیارییکردووە، ترافیکێکی زۆر بەهێز لە ئاسمانی عێراق هەیە و حەوت رۆژی هەفتە و رۆژانە 24 کاتژمێر فشارێکی زۆر لەسەر ئاسمانی عێراق هەیە و کۆمپانیاکانی گواستەوە خۆیان تۆماردەکەن.

 فاریس ئەلجیواری، توێژەر و راوێژکاری فڕۆکەوانی رایگەیاند؛ داهاتی دارایی لە فڕینی ئاسمانی فڕۆکەکان 450 دۆلارە بۆ هەر فڕۆکەیە، هەروەها هەر فڕۆکەیەک کە لە هەر فڕۆکەخانەیەکی عێراق بنیشێتەوە دەبێت 4 هەزار دۆلار بدات بۆ ئەو خزمەتگوزارییانەی پێشکەشی دەکریت، بە مەرجێک کە کاتیكی زۆر لەناو فڕۆکەخانەکەدا نەمێنێتەوە.

ئەلجیواری ئاماژە بەوەدەکات لە 12 رۆژی جەنگی ئێران و ئیسرائلدا، زیانی رۆژانەی عێراق بەهۆی داخستنی فڕۆکەخانەکانەوە گەیشتبوە ملیۆنێک و 500 هەزار دۆلار.

عەباس بەیزانى، بەڕێوەبەری کۆمپانیای گشتی بۆ خزمەتگوزاریی گەشتى ئاسمانى عێراق، "سەرەڕاى ئاڵنگارییە ئەمنییەکانى ناوچەکە، بەڵام ئاسمانی عێراق متمانەی کۆمپانیاکانى فڕۆکەوانیى بەدەستهێناوەتەوە و ژمارەیەک زۆر لە کۆمپانیا ناوچەیى و نێودەوڵەتییەکان گەڕاونەتەوە بۆ بەکارهێنانى ئاسمانى عێراق وەک رێڕەوێکى سەرەکى بۆ گەشتەکانیان".

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved