هەواڵ

كەوتنەخوارەوەی هێلیكۆپتەرەكان دەرگای گومانی كردەوە

هێزەكانی سوریای دیموكرات (هەسەدە) ڕۆژی هەینی گیانلەدەستدانی نۆ لە ئەندامانی لەكەوتنە خوارەوەی دوو هێلیكۆپتەر لە ناوچەیەكی پارێزگای دهۆك لەهەرێمی كوردستان ڕاگەیاند، یەكێك لەو كەسانە بەرپرسی دژەتیرۆری ڕۆژئاوا بووە و خوشكەزای مەزڵوم عەبدی فەرماندەی هێزەكانی سوریای دیموكراتە.

هەسەدە لەڕاگەیەندراوەكەیدا ڕایگەیاند: دوو هێلیكۆپتەرمان ڕۆژی چوارشەممەی ڕابردوو لە ئەنجامی خراپی كەشوهەوا لەدهۆك كەوتوونەتە خوارەوە كە لەڕێگەدا بوون بەرەو سلێمانی، یەكێك لەو كەسانەش كە گیانیان لەدەستداوە شەڕڤان كۆبانی بووە كە فەرماندەی هێزەكانی دژەتیرۆری ڕۆژئاوای كوردستانە.

بەوتەی هەسەدە دوو هێلیكۆپتەرەكە كۆمەڵێك لەشەڕڤانانی دژەتیرۆری ڕۆژئاوای كوردستانیان بەرەو هەرێمی كوردستان و بەدیاریكراوی بۆ سلێمانی بردووە، ئەویش لەچوارچێوەی چالاكیەكانمی بەرەنگاربوونەوەی داعش و ئاڵوگۆڕی پسپۆڕی ئەمنیی و سەربازی.

سەرەتای ڕووداوەكە میدیا ناوخۆییەكانی هەرێمی كوردستان بەتایبەتیش میدیای پارتی وایان بڵاوكردەوە كە یەك هێلیكۆپتەر كەوتووەتەخوارەوە و سەرجەم سەرنشینەكانی گیانیان لەدەستداوە.

دواتریش دەزگای دژەتیرۆری پارتی بڵاویكردەوە: هێلیكۆپتەرەكە لەجۆری یۆرۆكۆپتەر AS350 و شەوی چوارشەممە لەسەر پێنج شەممە لەنزیك چیای بێخێر لەناوچەی دهۆك كەوتووەتە خوارەوە.

هەرچەندە تائێستا حكومەتی ماوەبەسەرچووی هەرێم لەبارەی ڕووداوەكەوە بەفەرمی هیچ لێدوانێكی نەداوە، بەڵام بەرپرسێكی هەرێم بۆ پەیوەندیكردن بەمیدیا جیهانیەكان ئەوەی ئاشكراكردووە لێكۆڵینەوە بۆ هۆكاری كەوتنە خوارەوەی هێلیكۆپتەرەكان دەستیپێكردووە و بەپێی لێكۆڵینەوە سەرەتاییەكان بەشێكیان ئەندامی پەكەكە بوون.

بەڵام بەوتەی سەرچاوەیەك لەپارتی كرێكارانی كوردستان بۆ ماڵپەڕی فرانس پرێس، پەكەكە لێكۆڵینەوە لە كەوتنەخوارەوەی دوو هێلیكۆپتەرەكە دەكات، بەڵام سەرچاوەكە نە پشتڕاستیكردووەتەوە نە ڕەتیشیكردووەتەوە هیچ یەكێك لەسەرنشینانی دوو هێلیكۆپتەرەكە ئەندامی پەكەكە بووبن.

هەر بەپێی زانیاریەكان بەهۆی ئەوەی سەرنشینانی دوو هێلیكۆپتەرەكە بەرەو سلێمانی هاتوون، یەكێتی داوای لەهاوپەیمانان كردووە لێكۆڵینەوە لەكەوتنەخوارەوەیان بكەن.

هەواڵ

پەرلەمان سێ مانگی ماوە و 130 پرۆژە یاسای پەسەند نەکردووە

لەناو رەفەکانی پەرلەمانی عێراق 130 پرۆژە یاسا هەڵگیراون، چاوەڕێی پەسەندکردنن، تەمەنی درێژی پەرلەمان سێ مانگی ترە و فریای پەسەندکردنی چوار پرۆژە یاسا ناکەوێت

پەرلەمانی عێراق 9ـى ئایار چووە پشووی یاسادانانەوە تا مانگێکی تر کۆنابێتەوە، ئەوەش لەکاتێکداتە 130 پرۆژە یاسای پێشکەش بە سەرۆکایەتی پەرلەمان کراوە و تائێستا نەخراوەتە بەرنامەی کارەوە.

پەرلەمانی عێراق لەکاتێکدا دەکەوێتە پشووی یاسادانانەوە، کە هەڵبژاردنی پەرلەمانی عێرق شەش مانگی ماوە و پەرلەمان تەنها سێ مانگی لە بەردەستدا دەبێت بۆ کۆبونەوە و دانیشتنەکانی.

ئەمیر مەعموری، ئەندامی پەرلەمانی عێراق رایگەیاندووە، پەرلەمانی عێراق بەدەست تێکچوونێکی فراوانی یاسادانان و چاودێرییەوە دەناڵێنێت و 40 پڕۆژە یاسا سەرەڕای ئامادەیی تەواویان، بەهۆی ناڕێکی دانیشتنەکانەوە پەسەند نەکراوە.

بەوتەی ئەو پەرلەمانتارە، مانگانە پەرلەمان نەیتوانیوە هەشت دانیشتن ببەستێت و دەڵێت: بەشێک لە پەرلەمانتاران ئامادەی هیچ دانیشتنێک و چالاکییەکی پەرلەمان نەبوون و بە زەحمەت دەناسرێنەوە کە پەرلەمانتارن.
مانگی 11ـی ئەمساڵ هەڵبژاردنی پەرلەمانی عێراق ئەنجام دەدرێت و بەشێک لە پەرلەمانتاران دووبارە خۆیان کاندید دەکەنەوە،زیاتر لە 100 پەرلەمانتاریش پابەندی دەوام نابن، بۆیە دانیشتنەکانی پەرلەمان تا مانگی ئەیلول بەردەوام دەبێت.