تەندروستی

كەمتر لە ٪1 ئاوی جیهان سازگارە و شیاوە بۆ خواردنەوە

جێگری سەرۆكی باڵای ئاوی شیرین و خۆراك لە سندوقی جیهانی گیانلەبەرە كێوییەكان لە  واشنتن ڕایگەیاند، بەهۆی گۆڕانكارییەكانی كەشوهەوا نەبوونی دەستڕاگەیشتن بە ئاوی پاكی خواردنەوە خراپتر دەبێت و لە ئێستادا تەنها كەمتر لە یەك لەسەدی ئاوی جیهان سازگارە و دەكرێت بخورێتەوە.

مێلیسا هۆ ئاماژەی بەوەداوە  تەنانەت ئەو ئاوەشی كە هەیە، بەتەواوی سەلامەت نیە بۆ خواردنەوە وچەندین ماددەی زیانبەخش و پێكهاتەی ناتەندروستی تێدایە، هەروەها وتیشی هەرچەندە ئێمە ئاو لە هەموو دەوروبەری هەسارەكەدا دەبینین، بەڵام  درك بەوە ناكەین  كە چ سەرچاوەیەكی بەنرخ و سنووردارە.

مێلیسا هۆ  ئامارێكی لە میانی  چالاكیەكدا بەناوی "ئەمە كەشوهەوایە " لەسەر ئاو  هێنایەوە و هۆشداری لەبارەوە دا ئەم قەیرانی ئاوەش لەكاتێكدایە كە نەبوونی دەستڕاگەیشتن بە ئاوی پاك بە تایبەتی لە وڵاتانی تازەپێگەیشتودا بووەتە شتێكی باو و  زیاتر لە دوو ملیۆن ئەمریكی بێ ئاوی خاوێنن لە ماڵەكانیاندا.

هەواڵ

دوو کۆبونەوەی باڵا نەیتوانی مووچە دابەشبکات و ئەنجامی دوو کۆبونەوەی دیکە ماوە

کۆبونەوەی دادگای باڵای فیدراڵی و کۆبونەوەی لوتکەی یەکێتی و پارتی هیچ هەواڵێکی خۆشیان بۆ مووچە خۆران پێنەبوو، بڕیارە لە 24 کاتژمێری داهاتوودا دوو کۆبونەوەی باڵا لە بەغدا بەڕێوەبچێت و تێدا پرسی موچەی هەرێم تەوەری سەرەکی دەبێت.

ئەمڕۆ 14ـى تەمموز، دادگای باڵای فیدراڵی عێراق تایبەت بە دوو سکاڵا لەبارەی نەناردنی مووچەی هەرێمی کوردستانەوە کۆبووەوە، هەرچەندە موچە خۆران چاوەڕێبوون دادگا بڕیاری ناردنی مووچە بدات، بەڵام دادگاکە بڕیاردانی لەسەر سکاڵاکان بۆ 28ـی تەمموز دواخست.

پرسی مووچەی مووچە خۆرانی هەرێم، ئەمڕۆ پارتی و یەکێتی لە ئاستی باڵادا کۆکردەوە، شاندی یەکێتی بە سەرۆکایەتی بافڵ تاڵەبانی، سەرۆکی یەکێتی لەگەڵ شاندی پارتی بە سەرۆکایەتی مەسعود بارزانی، سەرۆکی پارتی کۆبونەوە.

دوای کۆتاییهاتنی کۆبونەوەکە، راگەیەندراوێکیان بڵاوکردەوە کە بەشێکی تایبەتبوو بە پرسی مووچە و ئاماژە بەوەکراوە، هەموو هەوڵەکان چڕ بکرێنەوە بۆ چارەسەری کێشە و دابینکردنی مووچە شایستە داراییەکانی هەرێمی کوردستان
وابڕیارە ئەمشەو، کۆبونەوەی چوارچێوەی هەماهەنگیی بەڕێوەدەچێت، کە لە لایەنە سەرەکیە شیعەکانی ناو حکومەت پێکهاتووە، سەرۆک وەزیرانی عێراق ئامادەی کۆبونەوەکە دەبێت و پرسی ناردنی مووچەی هەرێم تەواوەرێکی کۆبونەوەکە دەبێت.

سبەینێ، ئەنجومەنی وەزیرانی عێراق کۆدەبێتەوە و تاوتوێی ئەو راپۆرتە دەکات، کە لیژنە وەزارییەکەی حکومەتی عێراق ئامادەی کردووە لەسەر پرسی مووچەی هەرێم.

شێروان دووبەردانی، پەرلەمانتاری فراکسیۆنی پارتی لە پەرلەمانی عێراق بە میدیای حزبەکەی راگەیاندووە، دواخستنی دانیشتنەکەی ئەمڕۆی دادگای فیدراڵی هیچ یاسایی نەبوو، تەنیا نەیانویست بڵێن لە تواناماندا نییە بڕیار بدەین، دواخستنی دادگای فیدراڵی بۆ 28 مانگ پەیامێکی ناراستەوخۆیە کە ناتوانن مووچە بنێرن.

لەبارەی هەڵوێستی فراکسیۆنی پارتی لە بەرامبەر دواخستنی مووچەی فەرمانبەرانی هەرێمی کوردستان وتی: کۆتا وادەی چاوەڕوانیمان یەک هەفتەی دیکەیە و ئەگەر تا ئەو کاتە پرسی مووچەی فەرمانبەرانی هەرێمی کوردستان چارەسەر نەکرێت، هەڵوێستمان دەبێت.