Tech

! ئەپڵ هۆشداری دەدات لە فێڵێکی باو.. هەرگیز مۆبایلی تەڕ مەخە ناو برنجەوە

لە ساڵانی ڕابردوودا پێیان وابوو دانانی مۆبایلێکی تەڕ لەناو برنجدا دەبێتە هۆی هەڵمژینی ئاوەکە و یارمەتی گەڕانەوەی ئامێرەکە دەدات بۆ دۆخی سروشتی خۆی.

بەڵام ئەپڵ هۆشداری داوە لە وشککردنەوەی ئەو ئایفۆنانەی کە تەڕن یان ژێرئاوکەوتوون لە ئاو و شلەمەنیەکان بە بەکارهێنانی دانەوێڵەی برنج، بەپێی پۆرتاڵی هەواڵی تەکنیکی عەرەبی.

📌هەروەها پێشنیاری ئەوە دەکات کە پێویستە سەبر بگرێت کاتێک ئایفۆن بەر ئاو کەوتووە، ئامۆژگاری دەکات کە مۆبایلەکە بکوژێنیتەوە و بیگریت و بۆ ماوەیەک بیهەژێنیت لەکاتێکدا دەرچەی شەحنکردنەوەکە بە دابەزین دەهێڵیتەوە بۆ ئەوەی هەوڵبدەیت ڕزگارت بێت لەو ئاوەی کە پێیەوە لکاوە ، پاشان لە شوێنێکدا بەجێی بهێڵە کە هەواگۆڕکێی باشی هەبێت تا خۆی وشک بێتەوە.

📌لەوانەیە ڕۆژێکی تەواو بخایەنێت تا بە تەواوی وشک دەبێتەوە، پاشان دەتوانیت هەوڵبدەیت مۆبایلەکە بارگاوی بکەیتەوە، پاشان دوای پشکنینی وەڵامەکەی بۆ شەحنکردنەوە بیکەیتەوە.

📌هەروەها ڕەنگە هەندێک جار ئاگادارکردنەوەیەک سەبارەت بە بوونی شلە لە دەرچەی شەحنکردنەوە دەربکەوێت کاتێک هەوڵدەدەیت مۆبایلەکە شەحن بکەیتەوە و بەکاریبهێنیت پێش ئەوەی بە تەواوی وشک بێتەوە، بۆیە باشترە بۆ ماوەیەکی زیاتر بەجێی بهێڵیت تاوەکو بە تەواوی وشک دەبێتەوە.

📌بەڵام ئەگەر هەنگاوەکانی پێشووت دووبارە کردەوە و بۆ ماوەی ٢٤ کاتژمێر چاوەڕێ بکەیت و مۆبایلەکە کار نەکات، دەبێت بچیتە یەکێک لە ناوەندەکانی چاککردنەوەی کۆمپانیاکە بۆ مامەڵەکردن لەگەڵ مۆبایلەکەدا.

📌زۆربەی ماڵپەڕەکان پێشنیاری ئەوە دەکەن کە مۆبایلەکە بخرێتە ناو قاپێکی پڕ لە برنج و بەجێی بهێڵرێت بۆ ماوەی ڕۆژێک یان زیاتر، یان بەکارهێنانی ووشککەرەوەی قژ یان شتێکی هاوشێوە بۆ وشککردنەوەی. لەوانەیە ئەم ڕێگایانە سەرکەوتوو بن لە هەڵمژینی شێی مۆبایلەکە، بەڵام ئەپڵ بە ڕوونی هۆشداری دەدات لەم ڕێگایانە، چونکە بەکارهێنانی برنج بۆ نموونە ئەگەری هەیە زیان بە ئامێرەکە بگەیەنێت ئەگەر یەکێک لە دانەوێڵە بچووکەکان بچێتە ناو مۆبایلەکەوە.

📌هەروەها کۆمپانیاکە هۆشداری داوە لە بەکارهێنانی وشککەرەوەی هەوا، یان سەرچاوەی گەرمی دەرەکی بۆ وشککردنەوەی مۆبایلەکە.

📌شایەنی باسە کە ئایفۆنەکانی ئێستا بە پێچەوانەی مۆدێلەکانی کۆنتر پلەیەکی بەرزی بەرگری ئاویان هەیە، لە ئێستادا پشتگیری لە بەرگری ئاو و تۆز دەکات بە ستانداردی IP68، بەڵام ڕەنگە هەندێک کێشە ڕووبدات کاتێک مۆبایلەکان بۆ ماوەیەکی زۆر بە تەواوی لە ئاودا نوقم دەکرێن.

هەواڵ

"حزبی دیموکرات دەڵێت "ئاسایش بێهزاد خوسرەوی رادەستی ئیتڵاعات کردۆتەوە

حزبی دیموکراتی کوردستانی ئێران دەڵێت" ئاسایشی سلێمانی بێهزاد خوسرەوی ئەندامی ئەو حزبەیان دەستگیرکردوە و رادەستی ئیڵاعاتی ئێرانیان کردۆتەوە، بەڵام ئاسایش دەڵێت لەسەر داوای خۆی گەڕێندراوەتەوە.

دەنگۆی رادەستکردنەوەی ئەندامێکی حزبی دیموکراتی کوردستانی ئێران، کە پارتێکی ئۆپۆزسیۆن، کاردانەوەی لێکەوتۆتەوە، ئاسایشی سلێمانی رۆژی هەینی رایگەیاند کە "بێهزاد خوسرەوی ماوەی مۆڵەتی مانەوەی لە هەرێم تەواو بووە بۆیە لەسەر داوای خۆی گەڕندراوەتەوە بۆ رۆژهەڵاتی کوردستان."

بەڵام ئەمڕۆ شەممە، حزبی دیموکراتی ئێران ئەو لێدوانە ڕەتدەکاتەوە و دەڵیت" بێهزاد خوسرەوی لەلایەن ئاسایشیەوە دەستگیرکراوە و رادەستی ئیتڵاعاتی سنە کراوەتەوە.

ڕۆژی 6-9-2024، ڕێکخراوی مافی مرۆڤی هەنگاو بڵاوی کردەوە، هەفتەی ڕابردوو چالاکوانێکی خەڵکی سەقز بەناوی بێهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوەیەکگرتووەکان بووە، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

ناوەندی تەشکیلاتی حیزبی دیموکراتی کوردستانی ئێران ڕایگەیاندووە، لە ماوەی دوو هەفتەی ڕابردوودا بەهزاد خوسرەوی لە شاری سلێمانی دووجار لەلایەن ئاسایشەوە بانگ کراوە و جاری دووەم و دوای چەند ڕۆژێک لە بەندکردن و ڕاگرتن، ڕادەستی ئیدارەی ئیتلاعاتی شاری سنە کراوەتەوە.

حیزبی دیموکرات وەڵامی ئاسایشی سلێمانی داوەتەوە و ئاماژەی بەوە کردووە، کە بەهزاد خوسرەوی ماوەی زیاتر لە 10 ساڵە لەگەڵ دایک و خوشکی لە هەرێمی کوردستان لە شاری سلێمانی دەژین و بەپێ هەموو بەڵگە بەردەستەکان، لە نیشینگەی شاری سلێمانی مۆڵەتی مانەوە و نیشتەجێبوونیان وەرگرتووە، مانەوەیان لەو شارە یاسایی و بەپێی ڕێوشوێنەکانی حکومەتی هەرێمی کوردستان بووە.

ماوەی حەوت ساڵ بەهزاد و بنەماڵەکەی ئەندامی حیزبی دیموکرات بوون، لە هەموو ئەو ماوەیەشدا لە چوارچێوەی یاسا و ڕێوشوێنەکانی حکومەتی هەرێمی کوردستان لە سلێمانی ژیاون،  هیچ لادان و سەرپێچییەک لە ناوبراو ڕووی نەداوە کە لە دادگایەکدا لەسەری سەلمێندراوبێت، تەنانەت وەک پەناخوازی سیاسی لە کۆمیساریای بەرزی پەنابەران، نوێنەرایەتیی UN لە هەرێمی کوردستان ناوی تۆمار کردوە. 

حیزبی دیموکرات ڕادەستکردنی بەهزاد خوسرەوی بە کۆماری ئیسلامیی ئێران سەرکۆنە دەکات و دەڵێت، دەبوایە دۆسیەی گرتنی بەپێی یاسا لە دەزگای دادی هەرێمی کوردستاندا بڕیاری لەسەر درابا، نەک ناوبراو کە ئەندامی حیزبێکی سیاسیی دژبەری ئێران و پەناخوازی سیاسی نیشتەجێی هەرێمی کوردستانە، لەلایەن دەزگای ئاسایشی سلێمانییەوە ڕادەست بکرێتەوە.