هەواڵ

یەکێتی داوای چۆڵکردنی بارەگاکانی زڕگوێز لە حزبەکانی رۆژهەڵاتی دەکەن و حزبەکانی رۆژهەڵات بە داواکارییەکە رازی نین و رەتیانکردۆتەوە

یەکێتی نیشتیمانی کوردستان داوای چۆڵکردنی بارەگاکانی زڕگوێز لە حزبەکانی رۆژهەڵاتی کوردستان دەکەن،
 بەڵام حزبەکانی رۆژهەڵات بە داواکارییەکە رازی نین و رەتیانکردۆتەوە
هەفتەی پێشوو پێش سەردانەکەی عەلی باقری، سەرپەرشتیاری وەزارەتی دەرەوەی ئێران بۆ سلێمانی، یەکێتی لەڕێگەی دەزگای ئاسایشی هەرێمەوە پەیامێکی گەیاندۆتە بەرپرسانی هەریەک لە سێ کۆمەڵەکەی رۆژهەڵاتی کوردستان و داوای لێکردوون بارەگاکانیان لەناوچەی زڕگوێز بەتەواوی چۆڵبکەن و شوێنەکە جێبهێڵن پەیامەکە لە کۆبوونەوەیەکی دەزگای ئاسایشی هەرێمدا لەگەڵ نوێنەری هەرسێ کۆمەڵەی زەحمەتکێشانی ئێران کە سێ حزبی کوردی رۆژهەڵاتی کوردستانن، باسکراوە،
 بەڵام نوێنەری هەرسێ حزبەکە رەتیانکردۆتەوە بچنە ژێر داواکاری چۆڵکردنی ناوچەکە. یەکێتی هەولێداوە کە پێش سەردانەکەی عەلی باقری، هەواڵی چۆڵکردنی زڕگوێز بدات بە وەفدە ئێرانییەکە،
 کە ئەوەش خاڵێکە لە ڕێککەوتننامەکەی نێوان عێراق و ئێران و حکومەتی هەرێمی کوردستان. حزبەکانی رۆژهەڵات دەڵێن “لەژێر هیچ فشارێکدا ناوچەکە چۆڵ ناکەن.” لەناوچەی زڕگوێز لە سنوری سلێمانی، هەرسێ حزبی کۆمۆنیستی ئێران، کۆمەڵەی شۆڕشگێڕی زەحمەتکیشانی کوردستانی ئێران و کۆمەڵەی زەحمەتکێشانی کوردستان هەن.

هەواڵ

راپرسییەک بۆ پێوانەکردنی ئاستی دابڕانی کلتوریی لە هەرێمی کوردستان

دامەزراوەی ڤیژن فاوندەیشن، بۆ لێکۆڵینەوەی ستراتیژی، کار لەسەر پرۆژەیەک دەکات بۆ پێوانەکردنی ئاستی دابڕانی کلتوریی لە ناوچە جیاجیاکانی لە هەرێمی کوردستان، بۆ ئەومەبەستە فۆرمێکی ئەلیکترۆنی بڵاودەکاتەوە.

لە پێناسەی پرۆژەکەدا دامەزراوەی ڤیژن ئاماژە بەوەدەکەن، "کۆمەڵگای کوردستانی لە هەرێمی کوردستان سەرەڕای بوونی ژێرخانێکی دەوڵەمەندی کلتووری و تۆڕێک پەیوەندی هەمەجۆر لەناو کۆمەڵگاکەماندا، بەڵام هێشتا بەربەست و گرفتی گەورەی ناوخۆیی و بگرە جۆرێک لەدابڕانی کلتوریش هەیە، کە دەکرێ وەکو مەترسی سەیر بکرێ، بۆ هاوبەشی و یەکگرتویی کۆمەڵگا".

ئاماژە بەوەکراوە کە ئەو ناوچانەی هەرێمی کوردستان کە بە "شێوەزاری بادینی" دەدوێن و دەنوسن و دەخوێننەوە، لەگەڵ ئەو ناوچانەی کە بە "سۆرانی" دەدوێن و دەنوسن و دەخوێننەوە دابڕانە کلتورییەکە زیاتر بەدیدەکرێت.

ئامانجی پرۆژەکە دەرخستنی راستی و روونی و قەبارەی ئەو دابڕانە کلتووریەی لە نێوان ناوچە جیاوازەکانی هەرێمی کوردستاندا هەن، بۆ دەستنیشانکردنی بەربەست و رێگرییەکانی بەردەم ئاڵوگۆڕی کلتوورییە.

بەپێی پرۆژەکەی دامەزراوەی ڤیژن، لەکۆتاییدا پەڕاوێکی پێشنیاز بۆ حکومەتی هەرێمی کوردستان و پەرلەمان ئامادەدەکرێت و لەپێناوی "گەشەپێدانی کلتووری و چارەسەرکردنی گرفت و لابردنی بەربەستەکان". 

لێرە دەتوانیت فۆرمەکە پڕبکەیتەوە:

https://docs.google.com/forms/d/e/1FAIpQLSdJmmTCgpRhFI-5XhJlNMNmci6tLRQdgDAm7DtiRf_pbr5sHw/viewform?pli=1