هەواڵ

پێویستە لیستی موچەی مانگی ٨ بە سیدی و کاغەزیش بنێرن

سەرچاوەیەك لە وەزارەتی دارایی هەرێمی كوردستان رایگەیاند، لەلایەن وەزارەتی داراییەوە، سەرجەم وەزارەت و فەرمانگەكان ئاگادار كراونەتەوە و پێیان ڕاگەیەندراوە،"تكایە بۆ مانگی هەشت لیستی مووچە بە سیدی و كاغەز بۆ وەزارەتی دارایی بنێرن و جەختیش دەكەینەوە، كە گشت فەرمانبەران بایۆمەترییان هەبێت و لە لیستی مووچە UPN بنووسرێت." كۆدی UPN، كۆدی هاوتای پێ دەگوترێت، كە بە كۆدی بایۆمەترییەوە بەستراوەتەوە، ئەو كۆدە بۆ مووچە و هەموو زانیارییەكانی فەرمانبەران و مووچەخۆران بووەتە بنەمایەكی سەرەكی. ئەو سەرچاوەیە ئاماژەی بەوەشکرد کە فەرمانگەکان ئاگادارکراونەتەوە کە كۆدی دووبارە لە لیستی مووچەدا بەكار مەهێنن، چونكە ئەو دووبارەكردنەوەیە لای وەزارەتی دارایی عێراق بەدیار دەكەوێت و ئەوان، واتا دارایی عێراق ئاگاداریان كردووینەوە، هەر كەسێك بایۆمەتری نەبێت، یان كۆدی بایۆمەترییەكەی دووبارە بێت، یاخود ناوی دووبارە بێـت و هەر هەڵەیەك هەبێت، ئەوا مووچەی خەرج ناكرێت." وتیشی، تاوەكوو هەفتەی داهاتوو دەرفەت لەبەردەم وەزارەت و فەرمانگەكاندا هەیە، لیستی مووچەی مانگی هەشت تەواو بكەن و ئەو داواكارییانەی نێردراوە جێبەجێیی بكەن.

هەواڵ

راپرسییەک بۆ پێوانەکردنی ئاستی دابڕانی کلتوریی لە هەرێمی کوردستان

دامەزراوەی ڤیژن فاوندەیشن، بۆ لێکۆڵینەوەی ستراتیژی، کار لەسەر پرۆژەیەک دەکات بۆ پێوانەکردنی ئاستی دابڕانی کلتوریی لە ناوچە جیاجیاکانی لە هەرێمی کوردستان، بۆ ئەومەبەستە فۆرمێکی ئەلیکترۆنی بڵاودەکاتەوە.

لە پێناسەی پرۆژەکەدا دامەزراوەی ڤیژن ئاماژە بەوەدەکەن، "کۆمەڵگای کوردستانی لە هەرێمی کوردستان سەرەڕای بوونی ژێرخانێکی دەوڵەمەندی کلتووری و تۆڕێک پەیوەندی هەمەجۆر لەناو کۆمەڵگاکەماندا، بەڵام هێشتا بەربەست و گرفتی گەورەی ناوخۆیی و بگرە جۆرێک لەدابڕانی کلتوریش هەیە، کە دەکرێ وەکو مەترسی سەیر بکرێ، بۆ هاوبەشی و یەکگرتویی کۆمەڵگا".

ئاماژە بەوەکراوە کە ئەو ناوچانەی هەرێمی کوردستان کە بە "شێوەزاری بادینی" دەدوێن و دەنوسن و دەخوێننەوە، لەگەڵ ئەو ناوچانەی کە بە "سۆرانی" دەدوێن و دەنوسن و دەخوێننەوە دابڕانە کلتورییەکە زیاتر بەدیدەکرێت.

ئامانجی پرۆژەکە دەرخستنی راستی و روونی و قەبارەی ئەو دابڕانە کلتووریەی لە نێوان ناوچە جیاوازەکانی هەرێمی کوردستاندا هەن، بۆ دەستنیشانکردنی بەربەست و رێگرییەکانی بەردەم ئاڵوگۆڕی کلتوورییە.

بەپێی پرۆژەکەی دامەزراوەی ڤیژن، لەکۆتاییدا پەڕاوێکی پێشنیاز بۆ حکومەتی هەرێمی کوردستان و پەرلەمان ئامادەدەکرێت و لەپێناوی "گەشەپێدانی کلتووری و چارەسەرکردنی گرفت و لابردنی بەربەستەکان". 

لێرە دەتوانیت فۆرمەکە پڕبکەیتەوە:

https://docs.google.com/forms/d/e/1FAIpQLSdJmmTCgpRhFI-5XhJlNMNmci6tLRQdgDAm7DtiRf_pbr5sHw/viewform?pli=1