زانست

لە داهێنانێکی نوێدا..درۆنێک شوێنت دەکەوێت و وێنەت دەگرێت

بەپێی زانیارییەکان کە لە ڕۆژنامەی “دەیلی مەیل”ی بەریتانیدا بڵاوکراوەتەوە، بەکارهێنانی ئەم فڕۆکە بێفرۆکەوانە زۆر ئاسانە، تەنها پێویستە ئامێری “HOVERAir X1” هەڵبفڕێنیت بۆ ئەوەی کارەکەت بۆ ئەنجام بدات و وێنەت بگرێت، دەتوانێت گرتە ڤیدیۆییەکانت لە بەرزی ٥٠ پێ لە هەواوە تۆمار بکات هەروەها بە خێرایی ١٥ میل لە کاتژمێرێکدا دواتبکەوێت.
ئەم درۆنە وەزنێکی سوکی هەیە و بە بەکارهێنانی زیرەکی دەستکرد کاردەکات، بە جوڵەی سادەی دەست و قۆڵ ئاڕاستەی ئەو شوێنە دەکرێت کە بۆی دەڕۆیت.
سەرەڕای توانا سەرسوڕهێنەرەکانی ئەم درۆنە، ئەم ئامێرە بۆ کەسانە نەگونجاوە کە داهاتێکی سنوورداریان هەیە، چونکە نرخی پاکێجی بنەڕەتی ٤١٩ پاوەندە یانی زیاتر لە ٥٠٠ دۆلار،  بەراورد بە داری سێڵفی کە نرخەکەی نزیکەی ١٠ پاوەندە کە دەکاتە ١٢ دۆلار.
ئامێرەکە ئەمساڵ لە پێشانگای ئەلیکترۆنی بەکاربەران لە لاس ڤێگاس نمایشکرا، لە ئایندەیەکی نزیکدا لە سەرانسەری جیهان بڵاودەبێتەوە.
جیاواز لە داری سێڵفی، مۆبایلی HoverAir X1 کە کێشی ١٢٥ گرامە، دەتوانرێت لە ژوورەوە یان دەرەوە بەکاربهێنرێت، پێویستی بە هیچ کۆنتڕۆڵکەر و بەرنامەیەک نییە، لەبری ئەوە پشت بە تایبەتمەندییەکی “کۆنتڕۆڵی ئاماژە” دەبەستێت کە بە جووڵاندنی قۆڵەکانت بەدواتدا دەگەڕێت.
بەکارهێنانی ئاسانە، تەنها پێویستە فڕۆکە بێفڕۆکەوانەکە کارپێبکەیت و بیخەیتە سەر لەپی دەستت لەکاتێکدا ئاماژە بە کامێرا دەکەیت، دوای دەستداگرتن لەسەر دوگمەی “لانچ”، سێ چرکە دەخایەنێت تا ئامێرەکە ئەو کەسانە تۆمار دەکات کە پێویستە سەرنجی لەسەریان بێت، پاشان دەچێتە هەوا.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.