ژیان

ئەمریکا دەستی بەسەر فڕۆکە تایبەتەکەی سەرۆکی ڤەنزوێلادا گرت

وەزارەتی دادی ئەمریکا ڕایگەیاند، دەستیان بەسەر فڕۆکە تایبەتەکەی نیکۆلاس مادۆرۆ، سەرۆکی ڤەنزوێلادا گرت کە لە کۆماری دۆمێنیکان بووە و پاشان گواستوویانەتەوە بۆ ویلایەتی فلۆریدا.
میریک گارلان، وەزیری دادی ئەمریکا ڕایگەیاند، فڕۆکەکە بە شێوەیەکی نایاسایی لە ڕێی کۆمپانیایەکی ساختەوە کڕدراوە و پاشان براوەتە دەروەی ئەمریکا بۆ ئەوەی مادۆرۆ و دەستوپێوەندەکەی بەکاری بهێنن.
ئەوەشی خستەڕوو کە فڕۆکەکە لە جۆری داسۆ فالکۆن ئی ئێکس 900ەیە و بە بڕی 13 ملیۆن دۆلار کڕدراوە.
وەزارەتی دادی ئەمریکا جەختیکردەوە کە لێپێچینەوە لەگەڵ هەموو ئەوانەدا دەکەن کە سزاکانی ئەمریکا و ئەو ڕێسایانە پێشێل دەکەن کە ڕێگری دەکەن لەوەی بەرهەمی ئەمریکا بەجۆرێک بەکاربهێنرێت کە هەڕەشە لەسەر ئاسایشی نەتەوەیی ویلایەتە یەکگرتووەکان دروست دەکات.
جۆ بایدن، سەرۆکی ئەمریکا ساڵی 2019 فەرمانێکی دەرکرد بۆ قەدەغەکردنی مامەڵەکردنی ڕاستەوخۆ یان ناڕاستەوخۆ لەگەڵ حکومەتی ڤەنزوێلا.

هەواڵ

سێشەممەی مووچە؛ حکومەتی عێراق بڕیار لەبارەی مووچەی هەرێمەوە دەدات؟

تا ئێستا حکومەتی عێراق و حکومەتی هەرێمی کوردستان لەبارەی ناردنی پارەی مووچە بۆ هەرێمی کوردستان رێکنەکەوتوون، زانیارییەکان سێشەممە بە یەکلاییکەرەوە ناو دەبن. 

 سێشەممەی مووچە؛ ناوەڕاستی ئەم هەفتەیە دەبێت و بەپێی زانیارییەکان بڕیارە لە کۆبوونەوەی ئەنجومەنی وەزیرانی عێراق بڕیار لەسەر رێککەوتنی هەولێر و بەغدا بدرێت. 

بەپێی زانیارییەکانی دیجیتاڵ میدیای Mic، هەردوو حکومەتی عێراق و حکومەتی هەرێمی کوردستان رەشنووسی رێککەوتنێکیان ئامادە کردووە کە پرسی داهاتەکان، بەجێکردنی مووچە و دووبارە هەناردەکردنەوەی نەوتی هەرێمی کوردستان لە خۆ دەگرێت. 

تا ئێستا هیچ کام لە هەولێر و بەغدا زانیاریی فەرمییان لەبارەی ئەو رەشنووسەوە بڵاونەکردوەتەوە، بەڵام بەپێی سەرچاوەکان لە هەردوو حکومەت چاوەڕوان دەکرێت، ناوەڕاستی ئەم هەفتەیە سێشەممەی مووچە بێت و حکومەتی عێراق لەبارەی ناردنییەوە بڕیار بدات. 

کێشەی نەناردنی پارەی مووچە لەلایەن بەغداوە بۆ هەرێمی کوردستان  ئەو کاتە سەری هەڵدا کە وەزارەتی دارایی عێراق بە نوسراوێک هەرێمی کوردستانی ئاگادار کردەوە کە هیچ بڕە پارەیەکیان لە یاسایی بوودجەدا نەماوە تا بۆیانی بنێرن. 

بەپێی زانیارییەکان، حکومەتی عێراق بەڵێنی داوە بۆ چارەسەرکردنی ئەو کێشەیە پارەی مووچەی مانگی ئایار بەشێوەی سولفە رەوانەی هەرێمی کوردستان بکات، بەڵام ئەگەر هەیە شێوازی ناردنەکەی لە سولفەشەوە بگۆڕێت بۆ شێوازی دیکە. 

بەپێی ئەو زانیارییانەی لەبارەی رەشنووسەکەوە دەستی  دیجیتاڵ میدیای Mic کەوتووە، هەرێمی کوردستان بە رادەستکردنی نەوت و داهاتی نانەوتی هەرێمی کوردستان پابەند دەکرێت. 

هەرێمی کوردستان لە سەرەتادا دەبێت مانگانە نزیکەی 300 هەزار بەرمیل نەوتی رۆژانە رادەستی کۆمپانیای سۆمۆ بکات، تا لە رێگەی ئەو کۆمپانیا عێراقییەوە هەناردەی دەرەوە بکرێتەوە. 

پرسی بەجێکردن یان بە بانکیکردنی مووچەش یەکێکی دیکەیە لە تەوەرەکانی ئەو رەشنووسە سەرەتاییەی کە لە نێوان هەردوو حکومەت ئامادەکراوە. 

هەرێمی کوردستان پێویستە مووچەی سەرجەم مووچەخۆران بە بانکی بکات و هەژماری بانکیان لە بانکە رێگە پێدراوەکانی هەرێمی کوردستان بۆ بکاتەوە. 

چاوەڕوان دەکرێت، کردنەوەی هەژمارە بانکییەکان  لە چوارچێوەی پڕۆژەی "هەژماری من"دابن، وەک ئەوەی کاروان یاروەیس لە زاری پارێزگاری بانکی ناوەندییەوە رایگەیاندووە،" هەژماری من هەر تەوتینە و جیاوازیی نییە". 

مووچەخۆرانی هەرێمی کوردستان زیاتر لە 60 رۆژە چاوەڕانی دابەشکردنی مووچەن، دوایین مووچە کە لە هەرێمی کوردستان دابەشکراوە مووچەی مانگی نیسان بووە کە 18ـی ئایاری 2025 کۆتا رۆژی دابەشکردنیی بووە و لەوکاتەوە هیچ مووچەیەک دابەش نەکراوە.