-18

چۆن وابكەیت پەیوەندیت لەگەڵ هاوڕێكەت كورتخایەن نەبێت

لەگەڵ سەختییەكانی ژیان و ئەو گۆڕانكارییانەی بەسەر شێوازی ژیانتان رودەدات، دەكرێت بە چەند هەنگاوێك پارێزگاریی لە پەیوەندییەكەت بكەیت.

1. راستگۆیی
نهێنی پەیوەندییەكی بەهێز، راستگۆییە، پەیوەندییەك لەسەر بنەمای درۆ دروستبێت، بە زویی كۆتایی دێت، هەربۆیە گرنگە هەردوكتان راستگۆبن لەگەڵ یەكتردا.

2. كات بۆ گفتوگۆ تەرخان بكەن
لەگەڵ هەمو سەرقاڵییەكانیشدا، كات تەرخان بكە بۆئەوەی لەگەڵ هاوڕێكەت گفتوگۆ بكەیت، چونكە پێویستە هاوڕێكەت لە پێشینەی ژیانتدا بێت، بە گفتوگۆكردن زیاتر لەیەكتر تێدەگەن و نزیك دەبنەوە.

3. سەرنج خستەسەر چاككردنەوەی كێشەكان
لەبیرتبێت كە ئێوە یەكتری باش دەناسن، خاڵە بەهێز و لاوازەكان دەزانن، كاتێك بە كێشەیەك یان كاتێكی سەختدا تێدەپەڕن، رێگە مەدە پەیوەندییەكەتان لەدەست دەربچێت و كاتە خۆشەكانتان لەبیربكەن.

4. نیشانی بدە كە گرنگە لە ژیانتدا
گرنگە نیشانی هاوڕێكەتی بكەیت كە ئەو چ بایەخێكی هەیە لە ژیانتدا و لە خێزانەكەتی جیاناكەیتەوە، كاتێك ئەم هەستە بە بەرامبەرەكەت دەبەخشیت، ئەویش هەمان هەستت نیشان دەداتەوە.

5. گرنگیی بە وردەكارییەكانی ژیانی بدە
گرنگە حەزەكانی خۆت بۆ وردەكارییەكانی ژیانی رۆژانەی نیشان بدەیت، وە بایەخ بەوە بدەیت كە ئارەزوی چی دەكات، چونكە ئەم كارە یارمەتی بەهێزبونی پەیوەندییەكەتان دەدات.

6. پێشبینی ئەوە مەكە هیچ هەڵەیەك نەكات
هاوڕێكەت مرۆڤە و هەڵەش دەكات، هەربۆیە پێشبینی ئەوەی لێمەكە كە هیچ كاتێك هەڵە نەكات، چونكە ئەم رەفتارە لە دواییدا بێ هیوات دەكات و دەكرێت لە پەیوەندییەكە ساردت بكاتەوە.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.