Tech

ئایا ماسک هێشتا بەدوای خەونەکەیدا دەگەڕێت کە تاکسی "ڕۆبۆت" دروست بکات؟

ماوەی دە ساڵە ئیلۆن ماسک پشتگیری لەو بیرۆکەیە دەکات کە ئۆتۆمبێلەکانی تێسلا ڕۆژێک بە شێوەیەکی ئۆتۆماتیکی خۆیان لێدەخوڕن و وەک ڕۆبۆتاکس کاردەکەن. لەم چوارچێوەیەدا کۆمپانیاکە ڕایگەیاندووە کە هەفتەی داهاتوو دیزاینی تاکسی خۆ لێخوڕین ئاشکرا دەکات، بەپێی ماڵپەڕی CEBC.

سەرەڕای چەندین ساڵ چاوەڕوانی و پێشبینی بوێرانە و بەڵێنە جێبەجێنەکراوەکان، هەوادارانی تێسلا هێشتا هیوادارن کە ماسک ئەو شتە بەدەستبهێنێت کە بەڵێنی پێدابوو لەو چالاکییەی کە بڕیارە لە ١٠ی تشرینی یەکەم ئەنجام بدرێت.

بەبێ گوێدانە ئەوەی کۆمپانیاکە لە ڕۆژی ڕۆبۆتاکسیدا چی پێشکەش دەکات، شارەزایان گومانیان هەیە لە ستراتیژی کۆمپانیاکە و تەکنەلۆژیای ئۆتۆپایڵۆت و FSD وەک نیشاندەرێک بۆ ئەوەی تێسلا بەرەوپێش دەچێت یان نا.

لە کاتێکدا ماسک بەڵێنی ئۆتۆمبێلی بێ شۆفێری دابوو، ڕکابەرەکانی توانیویانە ئۆتۆمبێلەکانیان پێشکەش بکەن. کۆمپانیای وایمۆ کە خاوەنەکەی کۆمپانیای ئەلفابێتە، لە ئێستاوە خزمەتگوزاری ڕۆبۆتاکسی لە چەند شارێکی ئەمریکا بەڕێوەدەبات، لە مانگی ئابی ئەمساڵەوە هەفتانە ١٠٠ هەزار گەشتی پارەیی تێپەڕاندووە.

هەروەها کۆمپانیای زۆکس کە خاوەنەکەی کۆمپانیای ئەمازۆنە، لە مانگی شوباتی ٢٠٢٣ دەستی بە تاقیکردنەوەی گەشتەکانی بۆ کارمەندەکانی کردووە، بە ئامانجی دەستپێکردنی خزمەتگوزاری تایبەتی خۆی بەناوی “رۆبۆتاکسی”. هەروەها لە چین، کۆمپانیای Pony.ai و Baidu خزمەتگوزاری ڕۆبۆتەکسی بازرگانی بەڕێوەدەبەن.

ئەمە دەتوانێت بازاڕێکی قازانج بەخش بێت، چونکە ڕیمۆند جەیمس پێشبینی دەکات تا ساڵی ٢٠٣٠ حجزکردنی ساڵانەی ڕۆبۆتێکسی بگاتە ٥٠ ملیار دۆلار.

لەگەڵ خاوبوونەوەی گەشەی فرۆشی ئۆتۆمبێلی کارەبایی لە ئەمریکا، گرەوێکی زۆر لەسەر گۆڕانکارییە ئەگەرییەکانی تێسلا بەرەو لێخوڕینی ئۆتۆنۆم دەکرێت.

هەواڵ

وردەکاریی هێرشە موشەکییەکەی شاری کەرکوک

بەرەبەیانی ئەمڕۆ بە موشەک و درۆن هێرشکرایە سەر فڕۆکەخانەی کەرکوک و پاڵاوگەی بێجی، یەک کەس بریندار بووە و هێزە ئەمنییەکان لێکۆڵینەوەیان دەستپێکردووە و هێشتا ئەنجامدەری هێرشەکان نەناسراون.

بەپێی زانیارییەکان، "رێنمایی لەلایەن دەسەڵاتە باڵاکانەوە دەرچووە بۆ لێکۆڵینەوەیەکی ئاست بەرز بۆ دیاریکردنی ئاستی بەرپرسیارێتی لە رووداوەکە".

پەیامنێری مایک نیوز لە کەرکوک، لە زاری سەرچاوەیەکی ئەمنییەوە ئەوەی پشتڕاستکردەوە کە سێ موشەک ئاڕاستەی فڕۆکەخانەی سەربازیی و پاڵاوگەی بێجی کراوە، یەکێک لە موشەکەکان ئاڕاستەی گۆڕیوە و لە ماڵیک کەوتووەتە خوارەوە، جگە لەوەی فڕۆکەیەکی بێفڕۆکەوانیش خراوەتە خوارەوە.

بەپێی بەدواداچوونەکانی مایک نیوز، "هاتوچۆی ئاسمانی لە فڕۆکەخانەی کەرکوک بەردەوامە و هیچ مەترسییەک لە ئارادا نییە".

ئیدارەی فڕۆکەخانەی نێودەوڵەتی کەرکوک لە راگەیاندراوێکدا رایگەیاند، دوای کەوتنەخوارەوەی موشەکەکە هیچ زیانێک تۆمار نەکراوە.

لە راگەیەندراوەکەدا ئاماژە بەوە کراوە، "فڕۆکەخانەی نێودەوڵەتی کەرکوک، وەک یەکێک لە دەروازە گرنگەکانی بەستنەوەی عێراق بە جیهان، بەردەوامە لە ئەنجامدانی ئەرکەکانی بە شێوەیەکی کارا و بە تەواوی ئامادەیە بۆ پێشوازیی لە فڕۆکە گەشتیاریی و بەڕێکردنی گەشتە ئاسمانییەکان بەپێی خشتەی داڕێژراوی خۆی و بەبێ هیچ دواکەوتن و پچڕانێک".

عادل ئەلدەج، سەرۆکی شارەوانی قەزای بێجی، ئەوەی پشتڕاستکردووەتەوە کە لەڕێی زیاتر لە 10  فڕۆکەی بێفڕۆکەوان، هێرشکراوەتە سەر پاڵاوگەکەی سوتەمەنی بێجی.

عادل وتی: هێرشە درۆنییەکە لەلایەن تیمی بەرگرتیی پاڵاوگەکەوە بەرپەرچدراوەتەوە و هیچ زیانێکی مرۆیی بەدواوە نەبووە.

سەرۆکی شارەوانی بێجی ئەوەی پشتڕاستکردەوە کە دوو فڕۆکەی بێفڕۆکەوان خراونەتەخوارەوە و ئەنجامدەرەکانی بەرەو شوێنێکی نادیار هەڵاتون.