هەواڵ

وردەکاری رووداوە خوێناوییەکەی گرێزە

سەرچین ساڵح رۆپیتەن
2025-03-20


درەنگانێکی شەوی رابردوو گەنجێک لە گوندی گرێزەی سەر بە قەزای سەیدسادق پێنج ئەندامی خێزانەکەی دەکوژێت و پاشان خۆیشی دەکوژێت.

بە وتەی دراوسێکانی و کەسوکاری ئەو خێزانە، چەند رۆژێکە باوکی بکوژ نەشتەرگەری دڵی بۆکراوە، شەوی رابردوو دوای رۆشتنەوەی میوانەکانیان یەکێک لە کوڕەکانی چووە بۆ کڕینی میوە لە گوندی کانی پانکە، کە دەکەوێتە تەنیشت گوندی گرێزەوە، هەروەها کوڕێکی تریان ئۆتۆمبێلی بارهەڵگری پێبوە و بۆ کارکردنی لەماڵ دەرچووە.

ڕووداوەکە بەمشێوەیە روویداوە، دوای ئەوەی دەمەقاڵێ لەنێوان بکوژ و خێزانەکەیدا روودەدات، بکوژ دەست دەداتە ئەو چەکی کڵاشینکۆفەی کە لەماڵەوە هەیانبووە و ئەوەی لە ماڵدا بوبێت کوشتویەتی، واتە باوک و دایکی و دوو خوشک و برایەکی کوشتووە.

لەکاتی تەقەکردندا خوشک و براکانی پەنایان بردووتە بەر باوکیان بەئەوەی نەکوژرێن، بەڵام باوکیان لەسەر قەرەوێڵە بووە و توانای هەستانی نەبووە، هەر لەسەر قەرەوێڵەکەی بە دەستی کوڕەکەی کوژرا.

کەسوکاری ئەو خێزانە باس لەوەدەکەن کە بکوژ لە ئەوروپا بووە و چەند رۆژێکە بۆ سەردان گەڕاوەتەوە بۆ ناو خێزان وکەسوکاری، دوای کوشتنی پێنج ئەندامی خێزانەکەی بە هەمان چەک خۆیشی کوشتووە.

هەرچەندە دەوترێت بکوژەکە نەخۆشی دەرونی هەبووە، بەڵام سەرکەوت ئەحمەد وتەبێژی پۆلیسی سلێمانی رەتیدەکاتەوە و دەڵێت: نەک بەڵگەیەک نییە بیسەلمێنێت نەخۆشی دەرونی هەبوبێت، بەڵکو هیچ شاهیدێکیش نییە، کە ئەم کەسە سەردانی پزیشکی دەروونی کردبێت.

بابەتی لێکچو

More News

Most Popular

هەواڵ

هەڵبژاردن شەڕی نەوەی نوێ و کۆمەڵ گەرم دەکات

Mic
2025-07-01

شەڕی میدیایی جوڵانەوەی نەوەی نوێ و کۆمەڵی دادگەریی لەگەڵ نزیکبوونەوە لە هەڵبژاردن گەرمتردەبێت، بەشێکیش وەک هۆکارێک بۆ پەرتبوونی دەنگی ناڕازی پێناسەی دەکەن.

نزیکبونەوەی لە هەڵبژاردنی پەرلەمانی کوردستان شەڕی میدیایی جوڵانەوەی نەوەی نوێ بە سەرۆکایەتی شاسوار عەبدولواحید و کۆمەڵی دادگەریی کوردستان بە سەرۆکایەتی عەلی باپیر گەرم دەکات.

دەستپێکردنی پشووی هاوینەی پەرلەمانی کوردستان کە سەرۆکە بەتەمەنەکەی لە لیستی نەوەی نوێیە، دیسانەوە بووەتە بابەتێکی دیکەی جەنگی میدیایی نێوان نەوەی نوێ و کۆمەڵی دادگەریی.

کۆمەڵی دادگەریی، تاکە هێزی سیاسی هەرێمی کوردستانە کە بەهۆی ناڕازیبوونی بە ئەنجامەکانی هەڵبژاردن بایکۆتی پەرلەمانی کوردستانی کردووە.

نەوەی نوێ ترسی هەیە هەڵوێستەکەی کۆمەڵ کاریگەری لەسەر شەقام هەبێت و بەشێکی دەنگی ناڕازی لە رێگەی ئەو هەڵوێستەوە بۆ خۆی ببات بە تایبەت کە تائێستا پەرلەمان کارا نەبووە. 

ئەوەی وایکردووە ئەو گریمانەیە بەهێزبێت، هێرشی توندی میدیایی نەوەی نوێیە بۆ سەر بڕیارەکەی کۆمەڵ بۆ بایکۆتکردنی پەرلەمانی کوردستان.

 نەوەی نوێ، کۆمەڵی دادگەری بەوە تۆمەتبارکردووە کە کۆتا هەڵبژاردن بەهۆی ساختەکاریی رۆژی هەڵبژاردن و جیاکردنەوەی دەنگەکانەوە بایکۆتی پەرلەمانی کردووە، کەچی دیسان بەشداریی هەڵبژاردن دەکاتەوە. 

کۆمەڵ لەسەرەتاوە بێدەنگیی هەڵبژارد، بەڵام دواتر وەڵامی هێرشەکەی نەوەی نوێی دایەوە و جوڵانەوەکەی بە "ئاڕاستەکراو" تۆمەتبار کرد.

کۆمەڵی دادگەری بە تایبەت رەخنەی لەو هەڵوێستەی نەوەی نوێ گرتووە کە لە پەرلەمانی عێراق دەنگی بە یاسای "بە تاوانکردنی هاوڕەگەزخوازیی و ڕەگەز گۆڕین" نەداوە. 

هاوڵاتییان رای جیاوازییان لەسەر شەڕی میدیایی نەوەی نوێ و کۆمەڵی دادگەری هەیە، بەشێکیان وەک بابەتێکی ئاسایی و هەڵمەتێکی پێشوەختەی هەڵبژاردن لێی دەڕوانن، بەڵام زۆرن ئەوانەشی پێیان وایە شەڕی میدیایی حزبە ئۆپۆزسیۆنەکان کاریگەری لەسەر پەرتکردنی دەنگە ناڕازییەکان دەبێت. 

نەوەی نوێ و کۆمەڵی دادگەری لە کاتێکدا شەڕی میدیایان دژ بە یەکتر گەرمکردووە کە دوو پارتەکە لەگەڵ لایەنە ئۆپۆزسیۆنەکانی دیکەدا لە هەوڵی دروستکردنی یەک لیست بوون بۆ هەڵبژاردنی پەرلەمانی عێراق، بەڵام هەوڵەکەیان شکستی هێنا. 

جوڵانەوەی نەوەی نوێ لە پەرلەمانی کوردستان خاوەنی 15 کورسییە و لە پەرلەمانی عێراقیش خاوەنی 9 کورسییە، کۆمەڵی دادگەری لە پەرلەمانی عێراق خاوەنی یەک کورسییە، ئەگەرچی لە پەرلەمانی کوردستان 3 کورسی بەدەستهێناوە، بەڵام وەک خۆیان رایانگەیاندووە، بەهۆی " ساختەکاری"یەوە بایکۆتی خولی شەشەمی پەرلەمانی کوردستانیان کردووە.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved