زانست

مێرسیدێس 500 هەزار یۆرۆ دەدات بەو کارمەندانەی دەستلەکار دەکێشنەوە

کۆمپانیای مێرسیدێس بێنز لەدرێژەی پلانەکانی بۆ کەمکردنەوەی خەرجییەکانی کۆمپانیاکە لە ماوەی درێژخایەن داوا لەو کارمەندانە دەکات کە بەشێوەی خۆبەخشانە دەستلەکار دەکێشنەوە تاوەکو 500 هەزار یۆرۆ (802 ملیۆن و 604 هەزار دیناری عێراقی) وەک قەرەبوو دەدات بەو کارمەندانە. بەگوێرەی ڕاگەیەندراوێکی کۆمپانیای مێرسیدێس بێنز، بڕیارە کۆمپانیاکە تاوەکو ساڵی 2027 بڕی 5 ملیار یۆرۆ لە خەرجییەکانی کەم بکاتەوە.

بەگوێرەی هەواڵێکی رۆژنامەی هاندێلسبالت، ئەگەر سەرپەرشتیاری بەشێک تەمەنی لە سەرووی 55 ساڵ بێت و ئەزموونی کاری 30 ساڵی هەبێت، وە مووچەی مانگانەی 9 هەزار یۆرۆ بێت ئەوا کۆمپانیاکە بڕی 500 هەزار یۆرۆ وەک قەرەبوو دەدات بەو کەسە.

هەروەها، ئەگەر بەڕێوەبەرێکی تەمەن 45 ساڵ کە ئەزموونی کاری 20 ساڵ و مووچەی مانگانەی 7500 یۆرۆی هەبێت، پێشبینی دەکرێت کۆمپانیاکە زیاتر لە 300 هەزار یۆرۆ وەک قەرەبوو بدات بەو کارمەندانە ئەگەر بەشێوەیەکی ئارەزوومەندانە دەستلەکار بکێشنەوە.

هەواڵ

مووچە زامنکرا.. بەستەڵەکی نێوان هەرێم و بەغدا توایەوە

دوای چەندین کۆبونەوە، لە کۆتایی کۆبونەوەی ئەمڕۆی ئەنجومەنی وەزیرانی عێراقدا، رێککەوتنی هەرێم و بەغدا لەسەر هەناردەکردنەوەی نەوتی هەرێم پەسەندکرا، بەمەش بەستەڵەکی کێشەکانی نێوان هەرێم و بەغدا توایەوە و هیچ بیانویەک بەدەست عێراقەوە نەما بۆ ناردنی مووچە.

لە کۆتایی کۆبوونەوەی ئەمڕۆیدا، ئەنجومەنی وەزیرانی عێراق دەنگی لەسەر دوو بڕیاردا سەبارەت بە میکانیزمی مامەڵەکردن لەگەڵ کۆمپانیا نەوتییە بیانییەکان و پرسی نەوتی هەرێمی کوردستان.


یەکەم: ئەنجومەنی وەزیران بڕیاریدا کە کرێی دەرهێنانی نەوت بۆ کۆمپانیا بیانییەکان، کە بۆ هەر بەرمیلێک بە 16 دۆلار دیاریکراوە، چیتر بە پارەی کاش نەدرێت.
بەپێی بڕیارەکە، لە بری پێدانی پارە، بڕی ئەو نەوتەیان پێدەدرێت کە هاوتای شایستە داراییەکانیانە و کۆمپانیاکان خۆیان بەرپرس دەبن لە فرۆشتنی ئەو نەوتە لە بازاڕەکاندا.

دووەم: ئەنجومەنی وەزیرانی عێراق رەزامەندیی سەرەتایی نیشاندا لەسەر ئەنجامدانی گرێبەستێکی سێقۆڵی لەنێوان (حکومەتی هەرێمی کوردستان - حکومەتی فیدراڵی عێراق - کۆمپانیا نەوتییە بیانییەکان).

مەرجی جێبەجێکردنی ئەم بڕیارە ئەوەیە کە حکومەتی عێراق گرێبەستەکە بەرز بکاتەوە بۆ لیژنەی راوێژکاریی وەزارەتی نەوتی عیراق.

چاوەڕوان دەکرێت لیژنەکە لە ماوەی 48 کاتژمێری داهاتوودا وەڵامی کۆتایی خۆی بداتەوە، تاوەکو گرێبەستە سێ لایەنییەکە بە فەرمی ئەنجام بدرێت و بچێتە بواری جێبەجێکردنەوە.

ئەم دوو بڕیارە بە هەنگاوی گرنگ دادەنرێن بۆ کردنەوەی گرێکوێرەی هەناردەکردنەوەی نەوتی هەرێمی کوردستان و چارەسەرکردنی کێشە هەڵپەسێردراوەکانی نێوان هەولێر و بەغدا.

بە جێبەجێکردنی بڕیارەکان، حکومەتی عێراق هیچ بیانویەکی بەدەستەوە نامێنێت بۆ نەناردنی مووچەی هەرێم و دەبێت قۆناغ بەقۆناغ موچەی مانگەکانی مووچە خۆرانی هەرێم بنێرێت، کە تا کۆتایی ئەمساڵ دەکاتە شەش مووچە.