هەواڵ

لەسەر رێوڕەسمی نەورۆز دەستگیر کران

دەسەڵاتدارانی کۆماری ئیسلامی ئێران سێ گەنجی کوردیان لەسەر ئەوە دەستگیرکرد کە رێورەسم و ئاهەنگی نەورۆزیان ئەنجامداوە

رێکخراوی هەنگاو بۆ مافەی مرۆڤ، رایگەیاند کە سێ گەنجی کوردی خەڵکی شنۆی ڕۆژهەڵاتی کوردستان بەهۆی بەشداری لە ڕێوڕەسمەکانی نەورۆز لەلایەن سوپای پاسدارانی ئێرانەوە دەستگیرکران.
هاوڵاتییە دەستگیرکراوەکان ناویان، کورد بەناوەکانی محەممەد سوڵتانپوور خەڵکی گوندی "دێ شەمس"، غەفوور شێخ ئەحمەدی تەمەن 50 ساڵانە و خەڵکی گوندی "عالیاوێ" و جەعفەر ڕەسووڵی 36 ساڵ لە گوندی "بێمزورتێ" سەر بە شاری شنۆ لەلایەن سوپای پاسدارانەوە دەستگیرکراون
ئەم سێ هاووڵاتییە لە ماڵەکانی خۆیان بە بەکارهێنانیی تووندوتیژی و بەبێ نیشاندانی هیچ جۆرە بەڵگەیەکی دادوەری، لێیاندراوە و دەستگیر کراون؛ تاوەکو ئیستاش هیچ زانیارییەک لەبارەی چارەنووسیانە نییە.

ساڵانە لە ئێران چالاکانی سیاسی و مەدەنی و تەنانەت مامۆستایانی زمانی کوردی و رێکخەرانی بۆنە نەتەوایەتییەکانیش لەلایەن دەسەڵاتدارانی ئێرانەوە دەستگیر دەکرێن و ئاستەنگی کارکردنیان بۆ درووستدەکرێت.

هەواڵ

ئەمریکا دەستوەردان لە نەوت و غازی هەرێم دەکات

چاوەڕواندەکرێت وەفدێکی باڵای وزەی ئەمریکا بگاتە هەرێمی و کوردستان و لەسەر پرسی هەناردەکردنەوەی نەوت و راکێشانی بۆری غاز گفتوگۆ لەگەڵ بەرپرسانی عێراق و هەرێم بکات .

جگە لە دەستپێکردنەوەی هەناردەی نەوت، پرسی هەناردەی غازی کۆرمۆریش پرسێکی دیکەیە کە وەفدەکەی ئەمریکا گفتوگۆی لەبارەوە دەکەن، بەتایبەت بۆ ناردنی غاز لەکۆرمۆرەوە و بۆ دهۆک و هەندێک ناوچەی دیکەی عێراق.

وەفدەکەیا به‌ سه‌رۆكایه‌تیی جیۆفری پایات، یاریدەدەری وەزیری دەرەوەی ئەمریکا بۆ سیاسەتی وزەی جیهانی  سەردانی عێراق و هەرێمی کوردستان دەکەن.

لەگەڵ بەرپرسانی عێراق و هەرێمی کوردستان، په‌ره‌پێدانى غازى سروشتى، ڕاكێشانى بۆریى غازی چه‌مچه‌ماڵ بۆ دهۆک و هه‌نارده‌كردنى غازى سروشتى و فرۆشتنى بە به‌غدا، هەناردەکردنەوەی نەوت و زیانەکانی ڕاگرتنی نەوت، وزەی خاوێن تاوتوێ دەکات.

چاوەڕوان دەکرێت دوای سەردانی وەفەکەی ئەمریکا ڕێککارەکانی دەستپێکردنەوەی هەناردەی نەوت خێرا بکرێت، هەروەها لە هەرێمی کوردستانەوە غاز بۆ عێراق دابین بکرێت.