هەواڵ

وەزارەتی نەوتی عێراق هۆکاری دەستپێنەکردنەوەی هەناردەی نەوتی هەرێمی ئاشکرا کرد

بەغدا _ MIC

وەزارەتی نەوتی عێراق رایگەیاند، کۆمپانیا نەوتییەکانی هەرێم تا ئێستا بەشێوەیەکی فەرمی گرێبەست و داتای بەرهەمی کێڵگە نەوتییەکانیان رادەستی حکومەتی عێراق نەکردووە و ئەوەش هۆکاری سەرەکی دەستپێنەکردنەوەی هەناردەی نەوتی هەرێمە لەرێگەی بەندەری جەیهانی تورکیاوە.

ئەمڕۆ دووشەممە، وەزارەتی نەوتی عێراق لە راگەیەندراوێکدا بڵاویکردەوە، هۆکاری دەستپێنەکردنەوەی هەناردەی نەوتی هەرێم لە تورکیاوە دەگەڕێتەوە بۆ ئەوەی تا ئێستا بەشێوەیەکی فەرمی گرێبەست و داتای بەرهەمی نەوتی کێڵەگەکانی هەرێمیان بەدەست نەگەیشتووە.

ئاماژە بەوەش کراوە، هەر کاتێک کۆمپانیا نەوتییەکانی هەرێم بەرهەمی کێڵگە نەوتییەکانیان بە فەرمی بەگوێرەی یاسا رادەست بکەن لە ماوەیەکی زۆر نزیکدا بەپێی دەستوور و یاسا هەناردەی نەوتی هەرێم دەست پێدەکاتەوە.

باس لەوەش کراوە، حکومەتی هەرێم ملیاران دۆلار قەرزاری کۆمپانیا نەوتییەکانە کە زیادەڕۆیی تێداکراوە و حکومەتی فیدڕاڵی هیچ زانیارییەکی لەبارەى ئەو قەرزانەوە نییە.

هەواڵ

بۆ دواخستنی هەڵبژاردن دەچێتە تاران

پرسی دواخستنی هەڵبژاردنی پەرلەمانی کوردستان، نێجیرڤان بارزانی سەرۆکی هەرێمی کوردستان و جێگری سەرۆکی پارتی دیموکراتی کوردستان، ناچار دەکات روو لەتاران بکات و لەوێیەوە پرسەکە یەکلایی بکاتەوە.

بەگوێرەی زانیارییەکان، تائێستا ئێرانییەکان، هاوشێوەی کۆمەڵگەی نێودەوڵەتی و لایەنە ئۆپۆزسیۆنە ناوخۆییەکانی هەرێم سورە لەسەر ئەنجامدانی هەڵبژاردن لە 10 ئ حوزەیرانی ئەمساڵدا، بەڵام پارتی دیموکراتی کوردستان دەیەوێت هەڵبژاردنەکە جارێکی دیکە دوابخات.

بەرپرسانی پارتی، کورسی کۆتاکان و هەندێک کێشەی نەخوێندنەوەی پەنجەمۆری دەنگدانیان کردۆتە بیانوو بۆ ئەوەی بەشداری هەڵبژاردنەکە نەکەن و داوای دواخستنی بکەن، بەڵام خوێندنەوەی ئەوەی دەکرێت پارتی بەتەواوی ترسی لە ئەنجامی هەڵبژاردنەکە هەیە و پێیوایە زۆرینەی کورسییەکانی پەرلەمانی کوردستان لەدەستدەدات و ئەگەری زۆرە نەتوانێت سەرۆکایەتی حکومەت بەدەستبهێنێتەوە.

هەر ئەوەشە وایکردوە کە زیاتر لە هەفتەیەکە نێچیرڤان بارزانی کەوتۆتە جوڵە بۆ دواخستنی هەڵبژاردن و هەفتەی رابردووش لە بەغدا بوو، بەڵام ئەنجامێکی لەسەدا سەدی دەستنەکەوت.

رووی ئەمجارەی نێچرڤان بارزانی لە تارانە و دەیەوێت لەڕێگەی ئێرانییەکانەوە هەڵبژاردن دوابخات و رەزامەندی ئەوان بەدەستبهێنێت.

بڕیارە ئەمڕۆ یەکشەممە نێچیرڤان بارزانی بۆ ئەو پرسە بگاتە تاران و لەگەڵ بەرپرسانی باڵای ئەو وڵاتە کۆبێتەوە.

داوای دواخستنی هەڵبژاردنی پەرلەمانی کوردستان لەکاتێکدایە کە زۆربەی رێکخرا و لایەنە نێودەولەتی و ناوخۆییەکان داوای ئەنجامدانی دەکەن و دواخستنی بە مەترسی بۆ سەر هەرێم دادەنێن.