هەواڵ

نەوەی نوێ: پارتی و یەکێتی و هەندێک لایەن دەیانەوێت هەڵبژاردن دوابخەن

فراکسیۆنی نەوەی نوێ لە پەرلەمانی عێراق راگەیەنراوێکی لەسەر هەوڵی دواخستنی هەڵبژاردنی پەرلەمانی هەرێم بڵاو کردەوە و رایگەیاند، یەکێتی و پارتی و هەندێک لایەن لە هەوڵدان بۆ دواخستنی هەڵبژاردنی هەرێم.

فراکسیۆنی نەوەی نوێ لە پەرلەمانی عێراق رایگەیاند، پارتی و یەکێتی لەگەڵ هەندێک لایەنی دیکەی هەرێم لە گفتوگۆدان بۆ دواخستنی هەڵبژاردنەکان، ئەم کارە ئەوپەڕی ترسنۆکی ئەو دوو لایەنەی دەسەڵات دەردەخات و ترسێکی روون و ئاشکرایە لە هەڵبژاردن.

فراکسیۆنی نەوەی نوێ ئاماژەی بەوەشکردووە، "لێرەوە بە هەموو لایەکی رادەگەێنین کە نەوەی نوێ دژی هەر هەوڵێکە تایبەت بە دواخستنی هەڵبژاردن و پێمان وایە هەر لایەنێک بە داواکاری پارتی رازی بێت ئەوا پاشکۆیی و بێ دەسەڵاتی خۆی دەسەلمێنێت و ئەوپەڕی ترسە لە ئەنجامدانی هەڵبژاردن".
بڕیارە لە مانگی حوزەیرانی ئەمساڵدا هەڵبژاردن لە هەرێم بەڕێوەبچێت و فشارە ناوخۆیی و نێودەوڵەتییەکانیش بەردەوامن بۆ ئەنجامدانی هەڵبژاردن.

هەواڵ

بۆ دواخستنی هەڵبژاردن دەچێتە تاران

پرسی دواخستنی هەڵبژاردنی پەرلەمانی کوردستان، نێجیرڤان بارزانی سەرۆکی هەرێمی کوردستان و جێگری سەرۆکی پارتی دیموکراتی کوردستان، ناچار دەکات روو لەتاران بکات و لەوێیەوە پرسەکە یەکلایی بکاتەوە.

بەگوێرەی زانیارییەکان، تائێستا ئێرانییەکان، هاوشێوەی کۆمەڵگەی نێودەوڵەتی و لایەنە ئۆپۆزسیۆنە ناوخۆییەکانی هەرێم سورە لەسەر ئەنجامدانی هەڵبژاردن لە 10 ئ حوزەیرانی ئەمساڵدا، بەڵام پارتی دیموکراتی کوردستان دەیەوێت هەڵبژاردنەکە جارێکی دیکە دوابخات.

بەرپرسانی پارتی، کورسی کۆتاکان و هەندێک کێشەی نەخوێندنەوەی پەنجەمۆری دەنگدانیان کردۆتە بیانوو بۆ ئەوەی بەشداری هەڵبژاردنەکە نەکەن و داوای دواخستنی بکەن، بەڵام خوێندنەوەی ئەوەی دەکرێت پارتی بەتەواوی ترسی لە ئەنجامی هەڵبژاردنەکە هەیە و پێیوایە زۆرینەی کورسییەکانی پەرلەمانی کوردستان لەدەستدەدات و ئەگەری زۆرە نەتوانێت سەرۆکایەتی حکومەت بەدەستبهێنێتەوە.

هەر ئەوەشە وایکردوە کە زیاتر لە هەفتەیەکە نێچیرڤان بارزانی کەوتۆتە جوڵە بۆ دواخستنی هەڵبژاردن و هەفتەی رابردووش لە بەغدا بوو، بەڵام ئەنجامێکی لەسەدا سەدی دەستنەکەوت.

رووی ئەمجارەی نێچرڤان بارزانی لە تارانە و دەیەوێت لەڕێگەی ئێرانییەکانەوە هەڵبژاردن دوابخات و رەزامەندی ئەوان بەدەستبهێنێت.

بڕیارە ئەمڕۆ یەکشەممە نێچیرڤان بارزانی بۆ ئەو پرسە بگاتە تاران و لەگەڵ بەرپرسانی باڵای ئەو وڵاتە کۆبێتەوە.

داوای دواخستنی هەڵبژاردنی پەرلەمانی کوردستان لەکاتێکدایە کە زۆربەی رێکخرا و لایەنە نێودەولەتی و ناوخۆییەکان داوای ئەنجامدانی دەکەن و دواخستنی بە مەترسی بۆ سەر هەرێم دادەنێن.