هەواڵ

ئەو وڵاتانەی لەڕووی دیپلۆماسییەوە زیاتر گرنگییان بە هەرێم داوە

Mic Mdeia
2021-07-16

لە هەرێمی كوردستان كونسوڵخانە و نوێنەرایەتی 38 وڵات بوونی هەیە كە ئەندامی نەتەوەیەكگرتووەكانن، بەشێك لەو وڵاتانەش بەپێی جۆری كونسوڵخانە و ستافەكەی بەتەواوەتی گرنگییان بە هەرێمی كوردستان داوە و ئێران و ڕووسیاش لەو وڵاتانەن، ئەمریكاش كونسوڵخانەی گشتی لە هەولێر هەیە لەحاڵەتی بوونی مەترسی لەسەر باڵیۆزخانەكەی لەبەغدا بەشێكی زۆری ستافەكەی دەگوازێتەوە بۆ هەولێر.

38 وڵات كە ئەندامی نەتەوەیەكگرتووەكانن كونسوڵخانە و نوێنەرایەتییان لە هەرێمی كوردستان هەیە بەوپێیەی هەرێم بەشێكە لە عێراق هیچ وڵاتێك ناتوانێت باڵیۆزخانەی تێدا بكاتەوە.

ئێران و ڕووسیا ئەو دوو وڵاتەن كە بەتەواوی كونسوڵخانەكانیان لە هەرێم جێگیرە و سەرجەم كاروبارەكانیان هاوشێوەی كونسوڵخانەكانی دیكەیان لە وڵاتان لە هەرێمیش كردووەتەوە.

چەند وڵاتێكی دیكەش لە ئامادەكاریدان بۆ ئەوەی نوێنەرایەتی و كونسوڵخانەكانیان لە هەرێم بكەنەوە و سەرجەم ئەو نوێنەرایەتی و كونسوڵخانانەی لە هەرێم هەن لە هەولێرن، تەنها ئێران نەبێت كە كونسوڵخانەی لە سلێمانیش هەیە.

نوێنەرایەتی وڵاتان لەهەرێمەكان چوار جۆری هەیە كە كونسوڵی گشتی و كونسوڵ و نوسینگەی نوێنەرایەتی و نوێنەر و نوسینگەی سەردانكردن دەگرێتەوە.

ئەو وڵاتانەی كونسوڵخانەی گشتییان لە هەرێم هەیە (چین، كۆماری چیك، فەڕەنسا، ئەڵمانیا، یۆنان، هەنگاریا، هیند، ئێران، ژاپۆن، ئوردن، كوەیت، هۆڵەندا، فەلەستین، ڕووسیا، سعودیە، كۆریای باشوور، سۆدان، توركیا وئیمارات و بەریتانیا و ئەمریكا) ن.

ئەو وڵاتانەی كە كونسوڵخانەكانیان بچوكترە، هەریەك لە ئەرمینیا و نەمسا، بەنگلادش، بەرازیل،كرواتیا، میسر، ئیتاڵیا، لوبنان، پۆڵەندا و قەتەر و ڕۆمانیا و سڕبیان.

چەند وڵاتێكی دیكە هەن كە تەنها نوێنەرایەتییان هەیە لەوانەش بولگاریا و كەنەدا و قوبرس و نەرویج و سوید و تونس.

لە هەرێم نوێنەرایەتی یەكێتی ئەوروپا و هەریەك لە ڕێكخراوە جیهانییەكانی لیژنەی نێودەوڵەتی مانگی سور و ئاژانسی هاریكاری ژاپۆن و ئاژانسی كۆریا بۆ هاریكاری نێودەوڵەتی و نوێنەرایەتی نەتەوەیەكگرتووەكان هەن. 

بەپێی ئامارێك لە هەرێم ڕۆژانە 150 كەس هەوڵی ئەوە دەدەن ڤیزای وڵاتان ساختە بكەن، چەندین نوسینگەش بەناوی وەرگرتنی ڤیزای وڵاتان كراونەتەوە كە پارەیەكی زۆر لە وڵاتان وەردەگرن.
نوسینگەیەكی گەشتیاری كە MIC وەكو نمونە وەریگرت، بۆ هەر فیزایەك داوای 18 هەزار دۆلاری كرد.
لەهەرێمی كوردستان كار بە ماددەكانی 289 و 298 ی یاسای سزادانی عێراقی دەكرێت بۆ سزادانی ئەو كەسانەی كە بەڵگەنامەكان ساختە دەكەن.

بەپێی زانیاریەكان زۆرترین هەوڵەكان لەهەرێمی كوردستان بۆساختەكردنی ڤیزای ئەڵمانیا، فەرەنسا و ئیتاڵیان.

دیاردەی ساختەكردنی بەڵگەنامە، دراو، پاسپۆرت و ڤیزا دیاردەیەكی جیهانییە و زۆربەی وڵاتانی جیهان بە دەستییەوە دەناڵێنن، توندترین سزاشی لە وڵاتان بۆ دانراوە، بەڵام تائێستا نەتوانراوە كۆنترۆڵ بكرێت.

More News

Most Popular

هەواڵ

هێزێکی کۆماندۆ کارمەندانی کارگەی چیمەنتۆی گاسنیان لەسلێمانی بە بارمتەگرت

Mic
2021-09-09

 کارمەندانی کارگەی چیمەنتۆی گاسن دەڵێن، هێزێکی کۆماندۆی چەکدار، بە چەکی قورس و سوکەوە کە دەیان چەکداربوون، هەڵیانکوتاوەتە سەریان و بۆ ماوەی 45 خولەک لەگۆڕەپانێکی کارگەکەدا بە بارمتە گیراون. 

کارمەندێکی کارگەی چیمەنتۆی گاسن لە تاسڵوجە، بە MIC وت کە کاتژمێر 11:45 خولەکی ئەمرۆ پێنجشەممە، هێزێکی چەکداری پڕچەکی راهێنراو، کە جلوبەرگەکانیان لۆگۆی هێزەکانی کۆماندۆی هەرێمی کوردستانیان لەسەر بووە، بەبێ هیچ ئاگادارکردنەوەیەک و بەشێوەیەکی زۆر توندوتیژ هەڵیانکوتاوەتە سەر کارگەکە و سەرجەم کارمەند و بەڕیوەبەرانی کارگەکەیان دەستبەسەرکردوە و بۆ ماوەیە 45 خولەکیش لەگۆڕەپانی کارگەکە لەبەر هەتاو، بەبارمتەیانگرتوون.

سەرچاوەکە وتیشی کە هێزەکە پەلاماری چەند کارمەندێکیان داوە، بە زەبری هێز سەرجەم کارمەندانی کارگەیەیان لەشوێنی خۆیان دەرهێنا و لە گۆڕەپانی کارگەکە کۆیانکردنەوە و چەند کۆمپیوتەر و کەلوپەلێکیشیان شکاندوە.

بەگوێرەی زانیارییەکان، هێزەکە بە نزیکەی 20 ئۆتۆمبیلی جۆری گوللە نەبڕ و بە چەکی سوک و قورسی وەک دۆشکە و بیکەسی هەڵیانکوتاوەتە سەر کارگەکە و دواتر بێ هیچ روونکرندنەوەیەک جێیانهێشتوە.

کارگەری چیمەنتۆی گاسن دەکەوێتە ناوچەی تاسڵوجەی شاری سلێمانی و خاوەندارێتییەکەی بۆ فاروقی مەلا مستەفا، گەورە بازرگان و سەرمایەداری کوردستان دەگەڕێتەوە، هەروەها چەند پشکێکیشی بەناوی چیاو نما کوڕەکانی نەوشیروان مستەفا ئەمینەوەیە.

تائێستا لایەنە ئەمنییەکان و بەڕێوەبەرانی کارگەکەش، هیچ روونکردنەوەیەکیان لەبارەی رووداوەکەوە بڵاونەکردۆتەوە.