ژیان

خۆشەویستی لەنێوان دوو کەسی خاوەن بیروباوەڕی ئایینی جیاواز

لە ڕۆژهەڵاتی ناوەڕاستدا، پەیوەندەییە سۆزدارییەکان لەگەڵ کەسێک کە بیڕوباوەڕی ئایینی یان مەزهەبی جیاوازی هەیە، پڕە لە ئاڵۆزی و نشێوی. خۆشەویستی هەمیشە دەیەوێت خۆی ئاشکرا بکات و قسەبکات، وا لە کەسێک دەکات بیەوێت ئازا بێت و دان بەهەستەکانیدا بنێت، بەڵام لەگەڵ ئەوەشدا دەکرێت شاردنەوەی ئەم پەیوەندییە بەتایبەت لای خێزانەکەی کە نزیکترینن لێی و نایەوێت متمانەیان لەدەستبدات زۆر ماندووکەر بێت.
بۆیە ئەگەر بتەوێت بزانیت هەستی خێزانەکەت چۆنە دەکرێت بە شێوەیەکی ناراستەوخۆ و بەشێوەیەکی گشتی لەم بارەیەوە پرسیاریان لێبکەیت، بۆ نمونە: "ڕاتان چۆنە ئەگەر یەکێک لە کچەکانی خێزانەکەمان هاوسەرگیری لەگەڵ کوڕی خێزانێکی مەزهەب جیاواز بکات؟"، هەرچەندە دەکرێت ڕاوبۆچونیان بۆ کەسێکی تر جیاواز بێت بەبەراورد بە تۆ و رەنگە بۆ ئەو کێشەیان نەبێت.

بەڵام ئەگەر دەتەوێت وەک جۆرە پێشەکییەک بە دایک و باوکت بڵێیت کە لە داهاتوودا ئەو پەیوەندییە پەرەدەستێنێت ئەوا باشترە هێواش و دوای بیركردنه‌وه‌یه‌كی زۆر پێیان بڵێیت، چونکە دەکرێت دووچاری کێشە و ناکۆکی بیت بۆ پەیوەندیەک کە هێشتا بەتەواوی داهاتوویەکی دیاری نییە.
خۆشەویستی تەنها لەبارەی خۆتەوە نییە و لایەنی دیکە هەیە دەبێت ڕەچاوی بکەیت کە ئەویش خۆشەویستەکەتە.
ئایا دڵنیایت لێی؟ ئایا هەردووکتان ئامادەن بەیەکسانی لە پێناو یەکتری بجەنگن؟ ئایا پەیوەندیەکەتان بەشی ئەوە بەهێزە کە ڕووبەڕووی ته‌واوی  کۆمەڵگه‌ ببنەوە؟
هه‌روه‌ها دەبێت ئاگاداری ئەوە بیت هەموو قەدەغەراوێک ویستراوە، واتا پەیوەندیەک داهاتوویەکی دیاری نەبێت دەکرێت جوانی و باقوبریقی خۆی هەبێت، بەڵام لەبەرامبەریشدا ناکۆکی مەزهەبیی و ڕەتکردنەوەی کۆمەڵگه‌ پەیوەندییەکی زۆری کۆتایی پێ هێناوە.
خۆشەویستی زۆربەی کات ناتوانێت تاکە هۆکاری بەردەوامیی بێت، خۆشەویستیش بەروارێکی بەسەرچونی هەیە ئەگەر دانیشی پێدانەنێین. بە شێوەیەکی گشتی، نابێت ئایین یاخود مەزهەب لایەنێک یان هۆکارێک بن لە دیاریکردنی ئەوەی کە کێمان خۆشدەوێت.
بەڵام لە زۆربەی کۆمەڵگاکان وەک بابەتێکی مردن و ژیان(مان و نەمان) سەیر دەکرێت چونکە شتەکە گەورەترە لە تەنها خێزانەکەت، لەم حاڵەتەدا ترسی کاردانەوەی هەموو کۆمەڵگا هەیە. بۆیە گرنگە بزانرێت بردنەوەی خۆشەویستی بە مانای لە دەستدانی شتی دیکە دێت.

باشتره‌ شتەکان وەک خۆیان بمێیننەوە و پەیوەندیەکەتان تایبەت بهێڵنەوە، هەوڵبدەن شتەکان باشتربکەن تا ڕێک بکەوێت لەگەڵ ڕاستی حاڵەتەکەتان، زیاتر یەکتر ببینن و یەکتربناسن بۆ بڕیاردان لەسەر پەیوەندیەکی قوڵ و گرنگی بەو جۆرە بۆ داهاتوو.
هه‌روه‌ها لە هەمان کاتدا بەردەوامبە لە خوێندن و هەوڵبدە بۆ دامەزراندن و  داهاتووت تێبکۆشە، ئەوکاتە باشتر دەتوانیت بڕیار لەسەر داهاتوو، ژیان، خۆشەویستەکەت و ئەوڵاتە بدەیت کە تێیدا دەژیت.
خۆشەویستی ئاسان نییە تەنانەت بۆ دوو کەس کە هەمان بیروباوەڕی ئایینیان هەیەو سەر بە هەمان مەزهەبن، بۆیە هەوڵ بدە زۆر بیر لەوە نەکەیتەوەو لە هەوڵی دروستکردنی پەیوەندیەکی پتەودابە لەگەڵ هاوبەشەکەت، پاشان وردە وردە دەزانیت لە کاتی گونجاودا چی بکەیت.

هەواڵ

لایەنەکانی هەرێمی کوردستان هەڕەشەی وەرگرتنی هەڵوێست دژی بەغدا دەکەن

پارتی و یەکێتی بەهۆی بڕیاری نەناردنی پارە بۆ هەرێمی کوردستان، هەڕەشەی راگەیاندنی هەڵوێستی نوێ دژی بەغدا دەکەن، فراکسیۆنە کوردییەکانی پەرلەمانی عێراق هەڵوێستی هاوبەش رادەگەیەنن و محەمەد حاجی مەحمودیش دەڵێت، باشترین کاتە ئێستا دەوڵەتی کوردی رابگەیەنین. 

 بڕیارەکانی حکومەتی عێراق بۆ نەناردنی پارەی مووچە ناڕەزایەتی لایەنە سیاسییەکانی هەرێمی کوردستانی لێکەوتەوە، مەکەبی سیاسی پارتی دیموکراتی کوردستان رایگەیاند، تا پێش جەژنی قوربان وەزارەتی دارایی عێراق شایستە داراییەکانی هەرێمی کوردستان نەنێرێت، هەڵوێستی جیددییان دەبێت. 

پارتی حکومەتی فیدراڵی بە "پێشێلکردنی مافە دەستوورییەکانی هەرێمی کوردستان" تۆمەتبار کردووە، نوسراوەکەی وەزارەتی دارایی عێراقیشی بۆ نەناردنی مووچە بۆ هەرێمی کوردستان وەک دوا پێشلکاری دژی دەستوور و بنەماکانی ڕێککەوتنی پێکهێنانی حکومەت وەسفکردووە. 

بڕیارە رۆژی 2ـی حوزەیرانی 2025، کۆمیتەی ناوەندیی پارتی لەسەر پرسەکە کۆبێتەوە تاتوێی پرسەکە بکات، وەک لە راگەیەندراوەکەی پارتیدا هاتووە، ئەگەر ماف و شایستە داراییەکانی خەڵکی هەرێمی کوردستان ڕەوانە نەکرێت هەڵوێستی جدییان دەبێت". 
یەکێتیی نیشتمانی کوردستان تا ئێستا بە فەرمی هەڵوێستی خۆی  لەسەر بڕیارەکانی وەزارەتی دارایی عێراق رانەگەیاندووە، تەنها هەرێم كەمال ئاغا سەرۆكی فراكسیۆنی یەكێتی لە پەرلەمانی عێراق بە میدیای حزبەکەی راگەیاندووە، بڕیارەكەی تەیف سامی وەزیری دارایی نایاساییە و دژی بڕیارەكانی دادگای فیدڕاڵییە.

باسی لەوەشكردووە، هێشتا خشتەی یاسای بودجەی 2025 رەوانەی پەرلەمان نەکراوە و پەسند نەکراوە، ئەم ساڵ مانگی پێنج تەواو نەبووە، بە چ پێوەرێک مووچەی فەرمانبەران و مووچەخۆرانی و شایستەی هەرێمی کوردستان دەبڕێت؟. 
رۆژی 21ـی شوباتی 2024، دادگای فیدراڵی عێراق لەسەر سکاڵایەکی یەکگرتوو، دادگای فیدراڵی چەند بڕیارێکی لەبارەی مووچەی مووچەخۆرانی هەرێمی کوردستانەوە دەرکرد، یەکێک لە بڕیارەکان پابەندکردنی بەغدا و هەولێر بوو بە خەرجکردنی مووچە دور لە ملمانێ سیاسییەکان.

دارا سێکانیانی، ئەندامی پەرلەمانی عێراق فراکسیۆنی یەکگرتووی ئیسلامی کوردستان، هەولێر و بەغدا بە وەلانانی بڕیارەکانی دادگای فیدراڵی تۆمەتبار کرد و وتی،" نووسراوەکەی تەیف سامی، وەزیری دارایی عێراق پێچەوانەی بڕیاری دادگای فیدراڵییە و  هۆکارەکەی بێ متمانەیی و پابەند نەبوونە بەبڕیارەکانی دادگای فیدراڵیەوە".

باسی لەوەشکرد، زمانی هەڕەشەی سەرکردە سیاسییەکان خزمەت بە هیچ بوارێک و سەقامگیریی کەرتی ئابوری ناکات، ناکرێت مووچەخۆران باجی هەڵەکانی حکومەت بدەن. 
بڕیارە، فراکسیۆنە کوردستانییەکان بۆ رونکردنەوەی نیگەرانییەکان یاداشتێکی ناڕەزایەتیی لە دژی بڕیاری تەیف سامی، وەزیری دارایی عێراق بۆ نەناردنی مووچەی فەرمانبەرانی حکوومەتی هەرێمی کوردستان، بدەنە محەمەد شیاع سودانی، سەرۆک وەزیرانی عێراق. 

پارتی چاکسازیی تورکمان لەگەڵ داواکاری بۆ راگەیاندنی هەڵوێستی توندی هاوبەش دژ بە بڕیارەکانی حکومەتی عێراق، لە راگەیەندراوێکدا راگەیاندووە، " حکومەتی فیدراڵی عێراق بەردەوامە لە سزادانی هاووڵاتیانی هەرێمی کوردستان و ماددەکانی دەستوور پێشێڵ دەکات  و پاشگەز دەبێتەوە لە ڕێککەوتنەکان بە بیانوی بێ پاسا و بێ بنەما کە لەسەر مووچە و شایستە داراییەکان ئەنجام درابوون. 

باسی لەوەیشکردووە، بەغدا مووچەی کردووەتە کارتێکی سیاسی بۆ لاوازکردن و دژایەتیکردنی حکومەتی هەرێمی کوردستان و خەڵکەکەی.

نەوەی نوێ و کۆمەڵ حکومەتی هەرێمی کوردستان بە هۆکار دەزانن
جوڵانەوەی نەوەی نوێ کە لەناو هێزە ئۆپۆزسیۆنەکاندا خاوەنی زۆرترین کورسییە، تا ئێستا بە شێوەیەکی فەرمی هەڵوێستی خۆی رانەگەیاندووە، بەڵام لە رێگەی میدیاکانییەوە حکومەتی هەرێمی کوردستانی وەک هۆکار دیاریکردووە و بە پابەندنەبوو بە داواکارییەکانی حکومەتی عێراقەوە تۆمەتباری کردووە. 

کۆمەڵی دادگەری کوردستان لە راگەیەندراوێکدا بڵاویکردەوە، "ئۆباڵی کێشەی مووچە بە پلەی یەکەم دەکەوێتە ئەستۆی بەرپرسانی حکومەتی کاربەڕێکەری هەرێمی کوردستان، بەڵام بێگومان حکومەتی فیدراڵیش بەشێکی تاوانەکەی دەکەوێتە ئەستۆ، بەو پێیەی مووچە وەک کارتی سیاسی بەکار دەهێنێت و دەشزانێت کە خەڵک باجەکەی دەدەن".

باس لەوەیشکراوە، بابەتی مووچە کراوەتە چەکی ململانێی نێوان دەسەڵاتدارانی هەرێم و بەغداد و هاوڵاتییانی هەرێمی پێوە گیرۆدە کراوە و دەبێت جارێکی دیکە هاوڵاتیان دەبێت باجی هەڵەی بەرپرسانی هەردوولا بدەن و بە گیرفانی خاڵی جەژن بەڕێ بکەن.

عەلی حەمەساڵح بڕیاردەری رەوتی هەڵوێست بڵاویکردەوە، ئەوان دەڵێن داهاتی نەوت و ناوخۆ نەگەڕاوەتەوە، لەبری سزای بەرپرسانی هەرێم بدەن و ڕێکاری یاسایی بگرنەبەر هاتون سزای موچەخۆرێک دەدەن، کە چەندین ساڵە قوربانیە. 

بڕیاردەری رەوتی هەڵوێست پێی وایە، عێراقیش بێ خەتا نییە و وەک خۆی نوسیوویەتی،" ئەوان بە دەسەڵاتدارانی پارتی و یەکێتی دەڵێن، لە بازرگانی نەوت و قاچاخی و بردنی پارەی هەرێم بەردەوام بن و نەینێرنەوە بۆ عێراق، ئێمەش سزای موچەخۆران دەدەین".

محەمەدی حاجی مەحمود داوای راگەیاندنی دەوڵەتی کوردی دەکات
محەمەد حاجی مەحمود، سکرتێری گشتیی پارتی سۆسیال دیموکراتی کوردستان جارێکی دیکە پرسی ریفراندۆمی ورژاندووە و پێی وایە، ڕیفراندۆم هەیە و دەبێت هەرێمی کوردستان بڕیاری خۆی بدات، چونکە ڕیفراندۆم دەنگی پێویستی بۆ جیابوونەوەی کورد لە عێراق بەدەستهێناوە.

باسی لەوەشکردووە، ئەوەی بەرامبەر بە کورد دەکرێت بڕیاری هەموو سیاسییەکانی عێراقە نەک تەنها وەزیری دارایی، ئەوەی عێراق دەیکات کاردانەوەی واژۆکردنی گرێبەستەکانی کوردستانە لە ئەمریکا.

محەمەد حاجی مەحمود بۆچوونی وایە، عێراق زۆر لاوازە و کورد زۆر بەهێزە، بۆیە عێراق بەبێ کورد هەڵبژاردنی بۆ ناکرێت، بەبێ بەشداریی کورد لە پرۆسەی سیاسیدا هەموو شتێک لە عیراق تێکدەچێت.

نوسراوەکەی تەیف سامی
تەیف سامى، وەزارەتى دارایی عێراق، بە نووسراوێکی فەرمی حکومەتی هەرێمى کوردستانى ئاگادار کردووەتەوە لەوەى چیدیکە ناتوانێت لە ناردنى پارەی مووچە بەردەوام بێت، بە پاساوى ئەوەى بڕى پشکى دیاریکراوى خۆى لە یاسای بودجە تێ پەڕاندووە