ژیان

لەمەودوا وانەی ژینگە لەقوتابخانەكانی هەرێمی كوردستان دەخوێنرێت

Mic
2022-10-04

سەرۆكی دەستەی ژینگەی هەرێمی كوردستان رایگەیاند لە هەر قوتابخانەیەك مامۆستایەك وەك رێبەری ژینگە دەستنیشان دەكرێت و نامیلكەیەكی پێدەدرێت كە وانەی هۆشیاركردنەوەی ژینگەیی بە قوتابیان دەڵێتەوە، وتیشی بۆ ئەوەی وانەكە لای قوتابیان خۆشەویستبێت، ناخرێتە تاقیكردنەوەی كۆتایی ساڵەوە.
ئەمرۆ ئەنجوومەنی باڵای پاراستن و چاككردنی ژینگە و بەڕێوەبەری گشتییەكان لە 18 وەزارەتی حكومەتی هەرێمی كوردستان كۆبوونەوە، دوای كۆبوونەوەكە عەبدولڕەحمان سدیق، سەرۆكی دەستەی ژینگەی هەرێمی كوردستان لە كۆنگرەیەكی رۆژنامەوانیدا رایگەیاند: هەمیشە كەناڵەكانی راگەیاندن و رێكخراوەكانی كۆمەڵگەی مەدەنی دەڵێن دەبێ لە پەروەردە و منداڵانەوە بڵاوبوونەوەی كولتووری ژینگەپارێزی دەستپێبكەین، دەستەی ژینگە بەو مەبەستە رێبەرێكی پاراستنی ژینگەی ئامادەكردبوو و پێویست بوو وەزیری پەروەردەش لێی ئاگاداربێت بۆ ئەوەی لە قوتابخانەكان بدرێتە مامۆستای زانست و لەپاڵ وانەی زانستدا بخوێندرێت، بۆ ئەوەی قوتابی تاڕادەیەك ئاشنای بابەتەكانی پەروەردەی ژینگەیی ببێت.
سەرۆكی دەستەی ژینگە وتیشی: ئێمە لەگەڵ ئەوە نین ئەركی قوتابی قورس بكرێت، بەڵكو دەمانەوێ بابەتی ژینگەپارێزی وەك رێبەرێك لەپاڵ وانەی زانست بخوێندرێت، بەڵام نەخرێتە تاقیكردنەوەكان، لەبەرئەوەی بابەتەكە بۆ هۆشیاركردنەوە و رۆشنبیری ژینگەییە لە زۆربەی وڵاتانیش ناخرێتە تاقیكردنەوەكان بۆ ئەوەی بابەتەكە لای قوتابیان خۆشەویست بێت.
 عەبدولڕەحمان سدیق دەشڵێت: دەمانەوێت وەكو هەموو ئەو وڵاتانەی لەڕووی ژینگەییەوە پێشكەوتوون، ئێمەش لە سەرەتاوە و لە قوتابخانەكانەوە دەست بكەین بە وشیاركردنەوەی تاكەكاكان بەرامبەر ژینگەی هەرێمی كوردستان.
 بەگوێرەی رێنماییەكانی دەستەی ژینگەی هەرێمی كوردستان، كە بە هەماهەنگی لەگەڵ وەزارەتی پەروەردە ئامادەكراوە، ئەو مامۆستایانەی وەك وانەبێژی واتە رێبەری ژینگەیی لە قوتابخانەكان دەستنیشان دەكرێن، لەلایەن دەستەی ژینگەوە لە سیمینارێكدا بەشدارییان پێدەكرێت و دواتر نامیلكەكەیان پێدەدرێت بۆ ئەوەی لە قوتابخانە وەك وانەیەك بە قوتابیانی بڵێنەوە.

More News

Most Popular

هەواڵ

لە2019 ەوە لەهەرێمی كوردستان 743 ژن بەڕووداوی جیاجیا گیانیان لەدەستداوە

Mic
2022-11-30

بە پێی ئامارەكانی بەڕێوەبەرایەتی بەرەنگاربوونەوەی توندووتیژی دژی ژنان و خێزان لەهەرێمی كوردستان لەساڵی 2019 ەوە تا شەش مانگی یەكەمی 2022 ، 117 ژن كوژراون و 193 ژنیش خۆیان كوشتووە و 155 ژنیش بەهۆكاری جیاجیا "سوتاون" و 278 ژنیش خۆیان سوتاندووە كە كۆی گشتی دەكاتە 743 ژن كە بەهەر هۆكارێك بێت لەهەرێمی كوردستان گیانیان لەدەستداوە.
بەپێی ئامارەی بەڕێوەبەرایەتی بەرەنگاربوونەوەی توندوتیژی دژ ژنان و خێزان لەهەرێمی كوردستان، لەساڵی 2019 45 ژن كوژراون و لەساڵی 2020 دابەزیوە بۆ 25 ژن و لە 2021 یشدا 25 ژن كوژراون، بەڵام لەشەش مانگی یەكەمی 2022 دا 22 ژن لەهەرێم كوژراون، جگە لەوەی لە2019 دا لەهەرێم 62 ژن خۆیان كوشتووە و 155 ژن سوتاون و 104 ژنیش خۆیان سوتاندووە، لەساڵی 2020 یش 25 ژن كوژراون و 38 ژن خۆیان كوشتووە و 68 ژنیش خۆیان سوتاندووە، هاوكات لەساڵی 2021 دا 25 ژن كوژراون و 62 ژن خۆیان كوشتووە و 78 ژنیش خۆیان سوتاندووە، بەڵام لەشەش مانگی یەكەمی 2022 دا لەهەرێمی كوردستان جگە لەوەی 22 ژن كوژراون 31 ژنیش خۆیان كوشتووە و 29 ژنیش خۆیان سوتاندووە.