ژیان

چۆن بەسەر نەخۆشی جوڵەدا زاڵ دەبیت؟ ئەو نەخۆشییەی زۆربەی گەشتیارەکان بەدەستیەوە دەناڵێنن

نەخۆشی جوڵە یەکێکە لە کێشە تەندروستییە باوەکان لەکاتی گەشتکردن بە ئۆتۆمبێل، شەمەندەفەر، کەشتی، یان تەنانەت فڕۆکە روودەدات ،نەخۆشی جوڵە بەهۆی ناتەبایی نێوان جوڵە و هەستکردن بەوەوە دروست دەبێت، لەوانەیە مرۆڤ لە ئەنجامی هەستکردن بە جووڵە بەبێ بینینی، یان بینینی جوڵە بەڵام هەستی پێنەکردنی، یان نەگونجان لەگەڵ هەستی جوڵە و بینینی، تووشی ببێت.

لە هەر ١٠ کەسێک ٣ کەس تووشی نیشانە توندەکانی نەخۆشی جووڵە دەبن، دیارترینیان:

📌زیادبوونی دەردانی لیک
📌ماندوێتی
📌کاڵبوونەوەی بینین
📌سەرگێژخواردن
📌هێڵنج ڕشانەوە
📌ئارەق کردنەوەی سارد
بەگوێرەی سەنتەری سەفەر و پزیشکی گەرمی ئەڵمانی، نەخۆشی جوڵە بەهۆی ناکۆکی نێوان هەستە هەستیارە جیاوازەکانەوە ڕوودەدات، ئاماژە بەوەدەکات کە هەندێک هۆکار ئەگەری تووشبوون بە نەخۆشی جووڵە زیاد دەکەن، وەک نەخۆشییەکانی وەک شەقیقە و تێکچوونی ناوەوەی گوێ (نەخۆشی مێنیێر)، دووگیانی، سوڕی مانگانە و ترس و دڵەڕاوکێ لە فڕین.

دەتوانرێت بە گرتنەبەری هەندێک ڕێوشوێن مامەڵە لەگەڵ نەخۆشی جوڵەدا بکرێت، وەک:

📌سەیرکردنی ئاسۆ
📌لەسەر پشت پاڵ بکەوە
📌چاو داخستن
📌دوورکەوتنەوە لە هەندێک چالاکیی وەک خوێندنەوە و بەکارهێنانی مۆبایل و تابلێتەکان
📌چای زەنجەفیل بخۆرەوە
📌پارچەیەک ڕەگی زەنجەبیلی تازە بجوێت
📌لە حاڵەتە توندەکاندا دەتوانرێت دەرمان بەکاربهێنرێت بۆ چارەسەرکردنی نەخۆشی جووڵە.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.