ژیان

ئەختەبووتێك سوورێنچكی پیاوێك كوندەكات و بە سەختی دەیهێننەدەرەوە

پاش ئەوەی چارەخوازێك سەردانی نەخۆشخانەیەكی سەنگاپوور دەكات كە بە وتەی خۆی كێشەی هەبووە لە گەدە و سوورێنچكیدا، پزیشكان نازووری بۆ ئەنجامدەدەن و بە دیمەنی پشكنینەكە شۆك دەبن.

ئەو پیاوەی سەردانی نەخۆشخانەی كردووە، بە پزیشكانی راگەیاندووە رشاوەتەوە و ناشتوانێت هیچ قوتبدات، كاتیك پزیشكان پشكنینی بۆ دەكەن دەبینن ئەختەبووتێك لەنێوان گەدە و سوورێنچكیدا خۆی جێگیركردووە و كونێكیشی كردووەتە سوورێنچكی نەخۆشەكە.

وێنەكانی ئەو كامێرا بچووكەی لە نازۆرەكەدا بەكارهاتووە دەریدەخات چۆن ئەو گیاندارە ئاوییە خۆی لە سوورێنچكی نەخۆشەكە گیركردووە، لەكاتێكدا پزیشكان هەوڵیانداوە پاڵیپێوەبنێن بەرەو ناو گەدەی چارەخوازەكە، هێندە توند خۆی نووساندووە بە دیواری سوورێنچكییەوە مەترسی دڕان و خوێنبەربوونی دروستكردووە.

سەرەنجام بە رێكارێكی پزیشكی ئەختەبووتەكەیان لە سوورێنچكی نەخۆشەكە بەرەو دەرەوە راكێشاوە، بەپێی زانیارییەكانیش ئەو پیاوە كاتێك خواردنی دەریایی خاوی خواردووە، ئەختەبووتەكەی بە یەكجار قووتداوە و ئەو رووداوەی لێكەوتووەتەوە.

لە بڵاوكراوەی سەرچاوە هەواڵییەكانی سەنگاپوور هاتووە، ئەو رووداوە 10ی تەمموزی 2023 روویداوە و لەئێستادا رەوشی تەندروستیی چارەخوازەكە زۆر باشە و گەڕاوەتەوە دۆخی ئاسایی.

هەواڵ

بەرهەمهێنانی نەوت راگیراوە و تا هەرێمی کوردستانیش نەوت رادەست نەکات مووچە نایەت

بەپێی رێککەوتنی حکومەتی هەرێمی کوردستان و حکومەتی عێراق تا نەوت رادەستی کۆمپانیای سۆمۆ نەکرێت بەغدا پارەی مووچە رەوانە ناکات؛ زیاتر لە 24 کاتژمێرە بەهۆی هێرشە درۆنییەکانەوە بەرهەمهێنانی نەوت لە هەرێمی کوردستان راگیراوە. 

 حکومەتی هەرێمی کوردستان دوای چەندین کۆبوونەوە لەگەڵ حکومەتی عێراق لەسەر پرسی نەوت و داهاتە نانەوتییەکان رێککەوتنی کرد. 

بەپێی دەقی ئەو رێککەوتنە کە ئەنجومەنی وەزیرانی عێراق بڵاویکردوەتەوە، تا وەزارەتی نەوت و کۆمپانیا سۆمۆ وەرگرتنی نەوت لە بەندەری جەیهان پشتراست نەکەنەوە، وەزارەتی دارایی پارە بۆ هەرێمی کوردستان نانێرێت. 

بەپێی رێککەوتنەکەی هەولێر و بەغدا دەبێت هەرێمی کوردستان رۆژانە 280 هەزار بەرمیل نەوت بەرهەم بهێنێت، 230 هەزاری بداتە بەغدا و 50 هەزاریشی لە ناوخۆدا بەکاربهینێتەوە. 

ناردنی پارەی مووچە بە مەرجی رادەستکردنی نەوت لە کاتێکدایە زیاتر لە 24 کاتژمێرە بەهۆی هێرشی درۆنییەوە بەرهەمهێنانی نەوت لە هەرێمی کوردستان رایگراوە. 

عەزیز ئەحمەد جێگری بەڕێوەبەری نوسینگەی سەرۆکی حکومەتی هەرێمی کوردستان و کۆمەڵەی پیشەسازی نەوتی کوردستان - ئەپیکور لە دوو راگەیەندراوی جیاوازدا رایانگەیاند، بەهۆی هێرشە درۆنییەکانەوە هەرێمی کوردستان نزیکەی 200 هەزار بەرمیل بەرهەمهێنانی نەوتی لەدەستداوە. 

ئەگەرچی هەولێر و بەغدا رێککەوتنیان کردووە، بەڵام ناو بەناو هێرشی دۆرنییەکان دەست پێدەکەنەوە و کێڵە نەوتییەکان بە ئامانج دەگرن دیار نیە درۆنەکان رێگە بە دەستپێکردنەوەی نەوت دەدەن یاخود هێرش دەکەنەوە. 

هەموو ئاماژەکان بەو ئاڕاستەیەن رێککەوتنەکەی هەولێر و بەغدا کۆتایی بە هێرشی درۆنەکان بهێنێت، چونکە ئەو هێرشانە وەک کارتی فشار دژی هەرێمی کوردستان دەبینران تا نەرمی بۆ رێککەوتن بنوینێت و نەوتەکەی رادەست بکات.