زانست

ترەمپ؛ ئەمریکا دەبێتە “پایتەختی دراوی ئەلیکترۆنی”

لە میانی گەورەترین کۆنفرانسی بیتکۆین لە ئەمریکا، دۆناڵد ترەمپ وتی؛ دەیەوێت ئەمریکا کانگای دراوە دیجیتاڵییەکان بێت، هەر ئەوەش نا بەڵکو وڵات ببێتە پایتەختی دراوە دیجیتاڵیی و ئەلیکترۆنییەکان.

ترەمپ لە درێژەی قسەکانیدا وتی: “ئەمڕۆ پڕ لە ڕێز و سەرسامی وەستاوم بۆ ئەوەی کۆمەڵگەی بیتکۆین بەدەستی هێناوە، بەڕاستی سەرسوڕهێنەرە، ئەگەر بتەوێت بیتکۆین بەراورد بکەیت، وەک ئەوە وایە، کە پیشەسازی پۆڵا سەد ساڵ لەمەوبەر بەدەستی هێنا”.

ترەمپ وتی: پلانەکەم دەخەمەڕوو بۆ دڵنیابوون لەوەی ئەمریکا پایتەختی دراوی ئەلیکترۆنی و زلهێزی بیتکۆینی جیهانە، ئەگەر بڕیارە دراوە ئەلیکترۆنییەکان داهاتوو پێناسە بکەن، دەمەوێت کانگاکەیان ئێرە بێت.

ترەمپ و کامالا هاریس کاندیدی ئەگەری دیموکراتەکان لە پێشبڕکێدان بۆ بەدەستهێنانی زۆرترین دەنگی لایەنگرانیان پێش هەڵبژاردنەکانی سەرۆکایەتی لە مانگی نۆڤەمبەردا.

ڕاپرسییەکی وۆڵ ستریت جۆرناڵ کە ڕۆژی هەینی رابردوو بڵاوکرایەوە دەریخست کە ترەمپ بە دوو خاڵ پێشەنگی لە هاریس گرتووە کە ئێستا جێگری سەرۆکی ئەمریکایە.

ترەمپ لە ڕاپرسییەکدا کە سەرەتای ئەم مانگە ئەنجامدرا بە ڕێژەی ٦ خاڵ لە پێشەوە بوو بەرامبەر جۆ بایدن سەرۆکی ئەمریکا کە چەند ڕۆژێک لەمەوبەر لە کێبڕکێی سەرۆکایەتی کشایەوە.

هەواڵ

درۆنەکانی ئیسرائیل ئەحمەد حاجی رەشید راپێچی بەردەم دادگای هەولێر دەکەن

دادگای لێکۆڵینەوەی هەولێر بە تۆمەتی هەڵبەستن و مامەڵەکردن دژی ئاسایشی نیشتمانی فەرمانی دەستگیرکردنی بۆ ئەحمەدی حاجی ڕەشید، ئەندامی پێشووی فراکسیۆنی کۆمەڵی دادگەریی کوردستان لە پەرمانی عێراق دەرکرد.

 دادگای لێكۆڵینه‌وه‌ی هه‌ولێر لە نوسراوێکدا سه‌رجه‌م هێزه‌ ئه‌منییه‌كان و لایه‌نی په‌یوه‌ندیدار ئاگادار کردوەتەوە، "له‌هه‌ر شوێنێك ئه‌حمه‌د حاجی ڕه‌شید، ئه‌ندامی مه‌كته‌بی سیاسی كۆمه‌ڵی دادگه‌ریتان بینی ده‌ستگیری بكه‌ن، چونكه‌ له‌ دادگا سكاڵای له‌سه‌ر تۆمار كراوه‌ و فه‌رمانی ده‌ستگیركردنی بۆ ده‌رچووه‌".

فەرمانگەی لێکۆڵەرەوەی دادوەری لە دادگای لێکۆڵینەوەی هەولێر، بە نووسراوی 1980، داوای لە دادگای لێکۆڵینەوەی سلێمانی کردووە تۆمەتبارەکەیان بە دەستگیرکراوی ڕادەست بکات.

فەرمانی دەستگیرکردنەکە بە پێی ماددەی 226ـی یاسای سزادانی عێراقی دەرچووە، ئەوەیش دوای ئەوەی کەناڵی "عەهد " لە زاری ئەحمەد حاجی رەشیدەوە بڵایکردەوە،" هەندێک لایەنی کوردی خزمەتێکی گەورەیان پێشکەشی ئیسرایل کردووە و ئاسانکارییان بۆ ناردنی 10 هەزار درۆن بۆ خاکی ئێران کردووە". 

لە ماددەی 226 لەیاسای سزادانی عێراقیدا هاتوە"هەر كەسێك بەشێوەیەكی ئاشكرا سوكایەتی بە ئەنجومەنی گەل، حكومەت، دادگاكان، هێزە چەكدارەكان یان هەر دەستەیەكی نیزامی‌و دەسەڵاتێكی گشتی، بەرژەوەندی یان فەرمانگەیەكی فەرمی‌ و نیمچە فەرمی بكات، سزا دەدرێت بە زیندانیكردن بۆ ماوەیەك كە لە حەوت ساڵ زیاتر نەبێت یان حەبسكردنی یاخود غەرامەكردنی". 

دوای ده‌رچوونی فەرمانی دەستگیرکردنەکە، ئه‌حمه‌دی حاجی ره‌شید لە رونکردنەوەیەکدا بڵاویکردەوە"کەناڵی عەهد لێدوانیکی منیان بەشێواوی بڵاوکردووەتەوە، دوای قسەکردن لەگەڵ کەناڵی ناوبراو و ئاگادارکردنەوەیان، سکاڵای یاساییان لەسەر تۆمار دەکەم"، هەر بۆیە داوای لێبووردنیان کردووه‌، دوو سەرنووسەری کەناڵەکەیان لەکار دورخستووەتەوە و سەرجەم هەواڵەکەشیان لەته‌واوی گرووپی تیلیگرام و سۆشیال میدیاكانیان سڕییەوە.