ژیان

نەخۆشی شەکرە چۆن کاریگەری لەسەر بیرچوونەوە هەیە؟

Mic
2024-09-02

بەڵام بەگوێرەی تیمی توێژینەوەی دامەزراوەی کارۆلینسکای سوید، گۆڕینی شێوازی ژیانی تەندروست دەتوانێت یارمەتیدەر بێت بۆ رێگریکردن لە پیربوونی دەمارەکان.
توێژەری سەرەکی توێژینەوەکە، ئەبیگایل دۆڤ، بۆی دەرکەوتووە ئەو کەسانەی چالاکی جەستەیییان هەیە و جگەرەیان نەکێشاوە و کحولیان نەخواردووە، کەمتر تووشی پیربوونی مێشک دەبن.
لە کاتێکدا نەخۆشی شەکرەی جۆری دووەم لە مێژە وەک هۆکارێکی مەترسی بۆ تووشبوون بە نەخۆشی بیرچوونەوە ناسراوە، بەڵام کاریگەرییەکانی پێش ئەم جۆرەی شەکرە و دوای نەخۆشییەکە لەسەر تەندروستی مێشکی ئەو کەسانەی کە نەخۆشی بیرچوونەوەیان نییە کەمتر هەستی پێ کراوە، دۆڤ و هاوکارەکانی ئاماژە بەوە دەکەن.
بەپێی راپۆرتی رۆژی تەندروستی، توێژەران پشتیان بە شیکردنەوەی سکانی MRIی مێشک بەستووە بۆ زیاتر لە ٣١ هەزار کەس کە تەمەنیان لە نێوان ٤٠ بۆ ٧٠ ساڵدایە، لە تۆمارەکانی بنکەدراوەی بایۆبانکی بەریتانی.
دۆڤ و هاوکارەکانی تەکنەلۆژیای زیرەکی دەستکردیان بەکارهێنا بۆ پێوانەکردنی "تەمەنی مێشکـ"ـی رێژەیی هەر تاکێک، بۆیان دەرکەوت ئەوانەی دووچاری نەخۆشی شەکرە بوون تێکڕای تەمەنی مێشکیان نیو ساڵ زیاترە لەو کەسانەی کە ئەو حاڵەتەیان نەبووە.
دۆڤ وتی: "رێژەی بەرز لە تووشبوون بە نەخۆشی شەکرە هەیە، هیوادارین توێژینەوەکانمان یارمەتیدەر بن بۆ رێگریکردن لە تێکچوونی یادگە و تووشبوون بە خەمۆکی لە کەسانی تووشبوو بە نەخۆشی شەکرە."

 

بابەتی لێکچو

More News

Most Popular

هەواڵ

هەڵبژاردن شەڕی نەوەی نوێ و کۆمەڵ گەرم دەکات

Mic
2025-07-01

شەڕی میدیایی جوڵانەوەی نەوەی نوێ و کۆمەڵی دادگەریی لەگەڵ نزیکبوونەوە لە هەڵبژاردن گەرمتردەبێت، بەشێکیش وەک هۆکارێک بۆ پەرتبوونی دەنگی ناڕازی پێناسەی دەکەن.

نزیکبونەوەی لە هەڵبژاردنی پەرلەمانی کوردستان شەڕی میدیایی جوڵانەوەی نەوەی نوێ بە سەرۆکایەتی شاسوار عەبدولواحید و کۆمەڵی دادگەریی کوردستان بە سەرۆکایەتی عەلی باپیر گەرم دەکات.

دەستپێکردنی پشووی هاوینەی پەرلەمانی کوردستان کە سەرۆکە بەتەمەنەکەی لە لیستی نەوەی نوێیە، دیسانەوە بووەتە بابەتێکی دیکەی جەنگی میدیایی نێوان نەوەی نوێ و کۆمەڵی دادگەریی.

کۆمەڵی دادگەریی، تاکە هێزی سیاسی هەرێمی کوردستانە کە بەهۆی ناڕازیبوونی بە ئەنجامەکانی هەڵبژاردن بایکۆتی پەرلەمانی کوردستانی کردووە.

نەوەی نوێ ترسی هەیە هەڵوێستەکەی کۆمەڵ کاریگەری لەسەر شەقام هەبێت و بەشێکی دەنگی ناڕازی لە رێگەی ئەو هەڵوێستەوە بۆ خۆی ببات بە تایبەت کە تائێستا پەرلەمان کارا نەبووە. 

ئەوەی وایکردووە ئەو گریمانەیە بەهێزبێت، هێرشی توندی میدیایی نەوەی نوێیە بۆ سەر بڕیارەکەی کۆمەڵ بۆ بایکۆتکردنی پەرلەمانی کوردستان.

 نەوەی نوێ، کۆمەڵی دادگەری بەوە تۆمەتبارکردووە کە کۆتا هەڵبژاردن بەهۆی ساختەکاریی رۆژی هەڵبژاردن و جیاکردنەوەی دەنگەکانەوە بایکۆتی پەرلەمانی کردووە، کەچی دیسان بەشداریی هەڵبژاردن دەکاتەوە. 

کۆمەڵ لەسەرەتاوە بێدەنگیی هەڵبژارد، بەڵام دواتر وەڵامی هێرشەکەی نەوەی نوێی دایەوە و جوڵانەوەکەی بە "ئاڕاستەکراو" تۆمەتبار کرد.

کۆمەڵی دادگەری بە تایبەت رەخنەی لەو هەڵوێستەی نەوەی نوێ گرتووە کە لە پەرلەمانی عێراق دەنگی بە یاسای "بە تاوانکردنی هاوڕەگەزخوازیی و ڕەگەز گۆڕین" نەداوە. 

هاوڵاتییان رای جیاوازییان لەسەر شەڕی میدیایی نەوەی نوێ و کۆمەڵی دادگەری هەیە، بەشێکیان وەک بابەتێکی ئاسایی و هەڵمەتێکی پێشوەختەی هەڵبژاردن لێی دەڕوانن، بەڵام زۆرن ئەوانەشی پێیان وایە شەڕی میدیایی حزبە ئۆپۆزسیۆنەکان کاریگەری لەسەر پەرتکردنی دەنگە ناڕازییەکان دەبێت. 

نەوەی نوێ و کۆمەڵی دادگەری لە کاتێکدا شەڕی میدیایان دژ بە یەکتر گەرمکردووە کە دوو پارتەکە لەگەڵ لایەنە ئۆپۆزسیۆنەکانی دیکەدا لە هەوڵی دروستکردنی یەک لیست بوون بۆ هەڵبژاردنی پەرلەمانی عێراق، بەڵام هەوڵەکەیان شکستی هێنا. 

جوڵانەوەی نەوەی نوێ لە پەرلەمانی کوردستان خاوەنی 15 کورسییە و لە پەرلەمانی عێراقیش خاوەنی 9 کورسییە، کۆمەڵی دادگەری لە پەرلەمانی عێراق خاوەنی یەک کورسییە، ئەگەرچی لە پەرلەمانی کوردستان 3 کورسی بەدەستهێناوە، بەڵام وەک خۆیان رایانگەیاندووە، بەهۆی " ساختەکاری"یەوە بایکۆتی خولی شەشەمی پەرلەمانی کوردستانیان کردووە.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved