ژیان

مارێكی كۆبرا فڕۆكەیەك ناچار بە نیشتنەوە دەكات

Mic
2024-09-16


رۆژنامەی گاردیان-ی بەریتانی بڵاویكردەوە، لەكاتی گەشتێكی ئاسمانی لەوڵاتی ئەفریقای باشوور، فڕۆكەوانەكە، كە چوار سەرنشینی هەڵگرتبوو، لەكاتی فڕینی لە بەرزیی سێ هەزار مەتر، هەستی بە شتێك كرد كە لەژێر قاچەكانی دەجووڵێتەوە، كاتێك سەیری كرد، مارێكی بینی كە درێژییەكەی 1.5 مەتر دەبوو، لەژێر كورسییەكەی خۆی گرمۆڵەكردبوو.

فڕۆكەوانەكە كاتێك زانی مارەكە لەجۆری كۆبرای ژەهراوییە، كە یەكێكە لە مارە هەرە مەترسیدارەكانی جیهان، بە سەرنشینەكانی وت كە ناچارە لە نزیكترین فڕۆكەخانەدا بنیشێتەوەو گەشتەكە تەواو نەكات.

لەدوای نیشتنەوەیان، فڕۆكەوانەكە تووشی شۆك بوو كە چۆن ئەو مارە گەورەیە گەیشتووەتە ناو فڕۆكەكە، بێ ئەوەی هیچ كەسێك هەستی پێبكات، لەهەمان كاتدا دڵخۆشیش بوو كە بە سەلامەتی رزگاریان بوو. 

بابەتی لێکچو

More News

Most Popular

هەواڵ

بڕیارێکی ترەمپ عێراق روبەڕوی دۆخێکی سەخت دەکاتەوە

Mic
2025-03-13


لەگەڵ نزیکبوونەوەی هاوین و بەرزبوونەوەی خواست لەسەر بەکارهێنانی کارەبا، حکومەتی عێراق روبەڕوی ئاڵەنگارییەکی گەورە دەبێتەوە، پاش بڕیاری سەرۆکی ئەمەریکا دۆناڵد ترەمپ بۆ هەڵوەشاندنەوەی ئەو لێخۆشبوونەی کە بە عێراق درابوو بۆ هاوردەکردنی غاز لە ئێران.

لە ساڵی 2003ەوە عێراق نزیکەی 80 ملیار دۆلاری بۆ کەرتی کارەبا خەرج کردووە، لەگەڵ ئەوەشدا هێشتا سیستەمی کارەبا ناجێگیرە، جگە لەوەش وڵاتەکە زۆر پشت بە هاوردەکردنی غاز لە ئێرانەوە دەبەستێت، کە تێچووی هاوردەکردنی ساڵانە نزیکەی شەش ملیار دۆلارە.

جگە لە هاورەکردنی ‌غاز لە ئێرانەوە، لەم دواییانەدا، عێراق ساڵانە 2.3 ملیار دۆلار بۆ 2.4 ملیار دۆلار غازی لە تورکمانستانەوە هاوردە کردووە.
 
ئەحمەد موسی، وتەبێژی وەزارەتی کارەبای عێراق بە رۆژنامەی عەرەبیە جەدیدی راگەیاندووە، حکومەت هەوڵی چڕوپڕ دەدات بۆ چارەسەرکردنی قەیرانی غازی ئێران و هەروەها مامەڵەکردن لەگەڵ بڕیاری ئەمەریکا بۆ هەڵوەشاندنەوەی ئەو لێخۆشبوونەی کە بۆ بەغدا بۆ هاوردەکردنی سەرچاوەکانی وزە لە تارانەوە درابوو (کارەبا و غاز).

موسی ئاشکرای کرد، لەئێستادا گفتوگۆ لەگەڵ ژمارەیەک لەوڵاتانی عەرەبی بەرهەمهێنەری غازدا دەکرێت بەمەبەستی هاوردەکردنی غازی شلکراو دوای تەواوکردنی قۆناغەکانی ئامادەکردنی ژێرخانی پێویست.

وتەبێژی وەزارەتی کارەبا دەشڵێت: وەزارەتەکەی هەوڵی هەمەجۆرکردنی سەرچاوەکانی غازی دەدات، چونکە 20 ملیۆن مەتر سێجا غاز لە ڕێگەی میکانیزمی نوێی گواستنەوە هاوردە دەکرێت، کە بەم زووانە تەواو دەبێت، هەرچەندە ئەم بڕە تەنها نیوەی ئەو غازە دەگرێتەوە کە لە ئێرانەوە هاوردە کراوە.

ئاماژەی بەوەشکرد، وەزارەتی نەوت بەرپرسە لەدابینکردنی ئەو بڕانە کە یارمەتیدەر دەبێت بۆ کارکردنی وێستگەکانی کارەبا بە توانای چوار هەزار مێگاوات، بەمەرجێک ئەم پلانانە پێش مانگی حوزەیرانی داهاتوو جێبەجێ بکرێن و بۆری نوێ دادەنرێت بۆ بەستنەوەی سەکۆکان بە وێستگەکانی باشورەوە بۆ دڵنیابوون لە گەیاندنی سوتەمەنی پێویست.

عەلی عامری، توێژەری ئابوری پێیوایە، عێراق روبەڕوی ئاستەنگی دارایی ئاڵۆز دەبێتەوە کە لەوانەیە کاریگەری لەسەر خێرایی جێبەجێکردنی ئەم پرۆژانە هەبێت و هەروەها ژێرخانی وێران کە ڕێگرە لە باشترکردنی کارایی دابەشکردن.

لیژنەی وزە و کارەبا لە پەرلەمانی عێراق جەختی لەوە کردەوە، کە حکومەتی عێراق هێشتا نەگەیشتووەتە جێگرەوەی غازی ئێران بۆ کارپێکردنی وێستگەکانی کارەبا، ئەمەش دەریدەخات عێراق روبەروی قەیرانێکی چاوەڕوانکراو دەبێتەوە لە هاوینی ئەمساڵدا.

محەمەد نوری، سەرۆکی لیژنەی وزە و کارەبا رایگەیاندووە، پێویستە هەنگاوی بەپەلە و خێرا بگیرێت بۆ گەڕان بەدوای بەدیلدا بەتایبەتی کە عێراق بەجدی بیر لە دامەزراندنی پلاتفۆرمێک دەکاتەوە بۆ وەرگرتنی غاز کە یارمەتیدەر بێت بۆ هاوردەکردنی غاز لە وڵاتانی ترەوە.

لیژنەی وزە و کارەبا وتیشی: عێراق دوای هەڵوەشاندنەوەی لێخۆشبوونەکان و پابەندبوونی بەو کارە، دەبێت بەپەلە بەدوای جێگرەوەدا بگەڕێت، جێگرەوەکانی بەردەست هاوردەکردنی غازی ڕوسیا و قەتەر و تورکمانستانیە.

جەختی لەوە کردەوە، کە قەیرانی ڕاگرتنی غازی ئێران لەگەڵ هاتنی هاوین دووبارە دەبێتەوە و عێراق بەهۆی قەیرانی غاز بەرەو هاوینێکی سوتێنەر دەڕوات و چارەنووسی کارەبا لە عێراق بە غازی ئێرانەوە گرێدراوە.

بەپێی رێككەوتنی نێوان بەغدا و تاران سەبارەت بە دابینکردنی غازی ئێرانی بۆ وێسگەکانی کارەبا لە عێراق،  پێویستە ئێران ڕۆژانە بڕی 50 ملیۆن مەتر سێجا غاز بدات بە عێراق و هەروەها، کارەباى عێراق بەڕێژەى 40% پشت بە کارەبای ئێران دەبەستێت کە 11 هەزار مێگاواتە.

رۆژی 5ی شوبات، دۆناڵد ترەمپ، سەرۆکی ئەمریکا ئیمزا لەسەر یاداشتێکی کرد، بە ئامانجی ئەوەی زۆرترین فشار بخاتە سەر ئێران، لەو چوارچێوەیەدا ئەو لێخۆشبوونەی به عێراق درابوو بۆ هاوردەکردنی کارەبا و غاز له ئێرانەوە، لەلایەن ترەمپەوە هەڵوەشێنرایەوە.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved