هەواڵ

کۆرۆنا چی لە کەرتی پەروەردە کرد؟

ڤایرۆسی کۆرۆنا کاریگەری نەرێنی کردۆتە سەر کەرتی پەروەردە و پسپۆڕانی بوارەکەش دەڵێن پرۆسەی خوێندن پەكی كەوتووە و ئاستی زانستی خوێندكارانیش دابەزیوە.

تێکڕای رۆژەکانی خوێندن لە هەرێمی کوردستان بۆ ساڵی خوێندنی ٢٠٢٠/٢٠٢١ تەنها ٥٧ رۆژ بووە بە شێوازی نۆرە (تناوب)، واتە هەر خوێندكارێك لە قۆناغەکانی یەک هەتا یازدە تەنها ٢٩ رۆژ بەشداری خوێندنی ناو پۆل بووە. 

لە ساڵانی رابردوودا، ساڵی نوێی خوێندن لە سەرەتای مانگی ١٠ دەستیپێدەکرد و لە کۆتایی مانگی پێنج کۆتایی پێدەهێنرا، بەڵام دەستپێکردنی خوێندنی ئەمساڵ بە بیانووی بڵاوبوونەوەی ڤایرۆسی کۆرۆنا زۆر لە وادەی خۆی دواکەوت. 

وەزری یەکەمی خوێندن لە سەرەتای مانگی شوباتی ٢٠٢١ دەستیپێکرد و بە شێوەی تەناوب بۆ ماوەی ٢٩ رۆژ بەردەوام بوو. لە دوای دوبارە داخستنەوەی دەرگای خوێندنگەكان،خوێندنی ئەلیکترۆنی یەکێک بوو لەو بژاردانەی کە وەزارەتی پەروەردە وەک ڕێگاچارەیەک بۆ بەردەوامیدان بە  خوێندنی ئەمساڵ پێشنیازیکرد.

 نەبوونی زەمینەسازی پێشوەختە بۆ شێوازی ئەلكترۆنی، بووە هۆی ئەوەی ئەم ڕێگایەش سەرکەوتوو نەبێت، نەیتوانی ببێتە جێگرەوەیەکی گونجاو بۆ خوێندنی ناوپۆل.
دوای دابڕانێکی زۆر وەزارەتی پەروەردە بڕیاریدا لە ناوەڕاستی مانگی پێنج دووبارە خوێندنی ناو پۆل دەستپێبکاتەوە,  ئەمجارەش بۆ ماوەی ٢٩ رۆژ بە شێوازی نۆرە بەردەوامبوو.

بۆ وەرزی دووەمی خوێندن، وەزارەتی پەروەردە بڕیاریدا بابەتەکانی خوێندنی سەرجەم وانەکان پوخت بکرێنەوە بۆ ئەوەی بتوانرێت لەو ماوە کەمەی خوێندندا بابەتەکان تەواوبکرێن.

پسپۆڕانی بواری پەروەردە دەڵێن، ساڵی خوێندنی  ٢٠٢٠/٢٠٢١، دەکرێت وەک یەکێک لە خراپترین و کورتترین ساڵەکانی خوێندن هەژمار بکرێت.

هەواڵ

چاوەڕوان دەکرێت ئەمڕۆ بەغدا مووچەی مانگی حوزەیران خەرج بکات

بڕیارە ئەمڕۆ ئەنجومەنی وەزیرانی عێراق نووسراوی فەرمی خەرجکردنی پارەی مووچەی هەرێمی کوردستان رادەستی وەزارەتی دارایی عێراق بکات.

دوای ئەوەی وەزارەتی دارایی عێراق، نووسروای فەرمی ئەنجومەنی وەزیرانی پێ دەگات دەست بە رێکارەکانی خەرجکردنی پارەی مووچەی مانگی حوزەیرانی هەرێمی کوردستان دەکات.

بڕیارە هەر ئەمڕۆش وەزارەتی دارایی و ئابووریی هەرێمی کوردستان رێکارەکانی خەرجکردنی مووچەی مانگی شەشی مووچەخۆرانی هەرێمی کوردستان دەستپێدەکات.

بەپێی زانیارییەکانی دیجیتاڵ میدیای MIC هەر کات ڕێکارەکان لە بەغدا دەستپێبکات، وەزارەتی دارایی هەرێم-یش 120 ملیار دیناری داهاتی نانەوتی بۆ وەزارەتی دارایی عێراق دەنێرین.

دیجیتاڵ میدیای MIC زانیویەتی وەزارەتی دارایی و ئابووریی هەرێمی کوردستان 120 ملیار دینارەکەی ئامادەیە، تەنها چاوەڕێی فەرمانن بۆ ئەوەی پارەکە بخەنە سەر هەژماری بانکی وەزارەتی دارایی عێراق.

هەرێمی کوردستان چاوەڕێی تەیف سامی، وەزارەتی دارایی عێراقە، نوسراوی ئەنجومەنی وەزیرانی پێبگات بۆ خەرجکردنی مووچەی مانگی حوزەیران.

هەر بەگوێرەی زانیارییەکانی دیجیتاڵ میدیای MIC وەزارەتی دارایی حکومەتی هەرێمی کوردستان لیستی مووچەی ئامادەکردووە و چاوەڕێی پارەیە، لەگەڵ هاتنی پارە لە بە‌غداوە لیستەکە بڵاودەکاتەوە

ڕۆژی سێشەممە ئەنجوومەنی وەزیرانی عێراق کۆبوونەوە، لە کۆبوونەوەکەدا محەمەد شیاع سودانی، سەرۆک وەزیرانی عێراق بڕیاری دا مووچەی مانگی حوزەیرانی فەرمانبەرانی هەرێمی کوردستان خەرج بکات، بەو مەرجەی هەرێمی کوردستان 120 ملیار دیناری داهاتی ناوخۆ بداتە بەغدا.